Jesaea 49
49
Probhu Isorren golam
1 #
Jir 1.5
E sạṅgiń disạmren hoṛko, ińakʼ katha ańjompe; E sạṅgiń jạtrenko, luturakʼ tińpe. Probhu Isor do kukhi khone ḍakao akadińạ; ar eṅgạńakʼ hoṛmoreń tahẽkan khonge uni do ińakʼ ńutume ńum akatʼtińa. 2#Ibr 4.12; Sod 1.16 Ińakʼ moca do laser tarwaṛe lekae hoyoco akatʼtińạ. Uni do acʼakʼ ti reakʼ umulreye danaṅ akadińạ. Uni do jhak jhak ạ̃pạ̃ṛi lekae benao akadińạ ar acʼakʼ sar ṭhoṅgareye doho akadińạ. 3Uni doe metadińạ, “E Israel, am do ińren golam kanam; am talate iń do ińakʼ ṭhonokiń sodortińạ.” 4Menkhan ińiń menkeda, “Iń do nahakgeń khaṭao akana; ạuṛiyakʼ ar michạge ińakʼ daṛekoń khoroc akatʼtińạ. Enhõ ińakʼ paona do Probhuakʼ tirege menakʼa, ar ińakʼ kuṛại do Isor ṭhenge.
5Probhu Isor do acʼren golame hoeocoyiń lạgitʼ kukhireye benaoledińạ jemon Jakob do uni ṭheniń ạgu ruạṛe ar Israel do uni ṭhenko jarwakʼ. Iń do Probhu Isor nońjorreń manot ocoakana ar ińren Isor do ińakʼ daṛegeye hoyakana. 6#Jes 42.6; Luk 2.32; Apos 26.23; Apos 13.47 Uniye meneda, “Eken Jakobakʼ bõsrenko bańcaoko lạgitʼ ar Israelren sarecʼ hoṛko ruạṛ ạguko lạgitʼ ińren golamem hoyokʼa ona do baṅa; ente ona do ḍherge komgea. Ona chaḍa iń do boṅgan hoṛ jạtrenko ṭhen hõ marsal lekań hoyocomea jemon am hotete goṭa dhạrtiren hoṛ do kại khon bańcaoko ńam.”
7Hoṛko okoeko nihạ̃t giḍi akade arko hirkhạwaekan, okoe doe disạm cakʼlaokoren golamkan, uni Israelren sonoticʼ ar chakʼḍaoicʼ do Probhu Isor niạ kathae metaekana, “Rapajko do am ńelteko beredokʼa, ar mukhiyạko do amko ḍobokʼama, ente Probhu Isor do ame bachao akatʼmea; Israelren uni sonoticʼ doe pạtiạranicʼ kana.”
Israelakʼ bańcao
8 #
2 Kor 6.2
Probhu Isor do nonkae meneda, “Bạsutakʼ okterege amiń roṛ ruạṛama ar bańcaokʼ reakʼ dinre amiń goṛowama. Iń do amiń rukhiyạmea ar am hotete hoṛko lạgitʼ mitʼṭecʼ bondobosiń dohoya, jemon disạmem teṅgo ruạṛ daṛeakʼ ar ujạṛakʼ jaegakore hoṛko arhõm ạidạri daṛeako. 9Am do bondi akankom metakoa, ‘Dela oḍok hijukʼpe.’ Onko do hoṛ aṛe aṛeteko ạtińa ar poṭor buruko do onkoakʼ ạtiń ṭạnḍiko hoyokʼa. 10#Sod 7.16,17 Onko do baṅ reṅgecʼkoa, ar baṅ tetaṅkoa se hahaṅkar reakʼ lolo se siń cando reakʼ jharla jhạrli setoṅ hõ baṅ paṛaoakoa. Onko cetanre okoeye mãyãkʼkan unige hore udukʼakoa ar dakʼ jharna ṭhene ạyur idikoa. 11Ińakʼ sanam buruko do horiń hoeocoya; ar ińakʼ ḍaharko do sạriạukʼa. 12Ńelpe, onko do sạṅgiń khonko hijukʼa; okoe do utạr khon, okoe do pạchim khon ar okoe do Sinim disạm khonko hijukʼa.”
13E sermako rạskạte sereńpe;
E pirthimi, hulạsokʼme;
E buru-ḍuṅgriko, hulạsokʼpe;
ente Probhu Isor do acʼren hoṛko jiwi raṛecʼe emakoa
ar santao ocokʼkan acʼren hoṛko cetanreye mãyãkʼa.
14Menkhan Sion doe meneda, “Probhu Isor do ińe bạgi giḍi akadińạ, uni doe hiṛińkedeńạ.”
15Ona iạte Probhu Isore meneda, “Gogo do cetʼ acʼren nunu gidrại hiṛiń daṛekea? Gidrạ janam akadiyicʼ do cetʼ gidrạ cetanre bae mãyãkʼa? Hẽ, Eṅgat do acʼren gidrại hiṛiń daṛekea menkhan iń do tishõ bạń hiṛińmea. 16Ńelme, ińakʼ ti talkare amakʼ ńutumiń ol dohoakatʼa; am beṛhaeteakʼ pạcriko do jaoge iń samaṅre menakʼa. 17Amren hoponko do ruạṛ hijukʼ lạgitʼko usạrayeda ar okoe amko jarkhar akatʼme onko do am khonko calaojoṅa. 18Beṛhaete beṅgetʼ ạcurme; ar ńelme amren hoponko do jarwakate am ṭhenko hijukʼkana. Kiriạkateń metamkana, onko jotoge amakʼ abhran lekako hoyokʼa, bapla bạhu kuṛiyakʼ abhran lekage.
19“Am dom jarkhar akana arem ujạṛakana ar amakʼ disạm do nasao akatʼ disạm leka hoyakanre hõ enhõ okteko hijukʼkana unre amren hoṛko amre jaega do bam em daṛeakoa, ar okoe amko tạhuṛletʼme onko doko sạṅgińokʼa. 20Amren okoeko hoponem atʼletʼko onko do am ṭhen hecʼkateko mena, ‘ale lạgitʼ niạ jaega do huḍińgea; tahen lạgitʼ arho maraṅ jaega emaleme.’ 21Unre am do mone monetem mena, ‘noko do okoeye janam akawạdińa? Iń do hoponkoń atʼletʼkote bạńjhi lekań hoylena; ariń sạṅgiń ocolena; iń doń ńir baṛaekan tahẽkana. Enḍekhan noko do okoeye ạsul haraketʼkoa? Iń ma coṅ eskargeń giḍi ocolen, menkhan noko? Noko do oka khonko hecʼakana?’ ”
22Probhu Isore meneda, “Ńelme, iń do isạrate eṭakʼ jạtrenkoń hohowakoa ar ińakʼ nisạn iń udukʼakoa. Onate onko do hoborate ińren hoponkoko ạgukoa ar ińren hoponerko doko ghõṛa ạgukoa. 23Rapajko do amko ạsul haramea ar onkoren rạniko do amren bukạ getʼ buḍhiko hoyokʼa. Onko do otre ombakʼkateko ḍobokʼama ar amakʼ jaṅga reakʼ dhuṛiko caṭoga. Unrem baḍae daṛeakʼa, ińkangeạń Probhu Isor do; ar okoe ińreko bhorsakʼkan onko do bako lajao ocokʼa.”
24Daṛean hoṛ ṭhen khon cetʼ luṭ reakʼ jinis dom recʼ daṛeakʼa? Se kumãyãicʼren jhuṭiạuicʼ do cetʼem chaḍao daṛekea?
25Mekhan Probhu Isore meneda, “Hẽ, daṛeanicʼren jhuṭiạuicʼ hõe recʼ idi ocokʼa ar kumãyaicʼren recʼ akawanicʼ hõe chaḍao ocokʼa. Okoe am tulucʼko jhogṛakʼ onko tulucʼ do ińgeń jhogṛakʼa ar amren hoponko do ińgeń rukhiyạkoa. 26Okoe amko santaome onkoakʼ jel do onkogeń jom ocokoa; onko do bubulakʼ leka akoakʼ mãyãmko ńũiya arko bulokʼa. Unre sanam manwako baḍaea, iń Probhu Isorge amren babańcaoicʼ ar chakʼḍaoicʼ, ar Jakobren uni daṛeanicʼ do.”
Santali Bible © Bangladesh Bible Society, 2021.