Jesaea 48
48
Keṭecʼ hoṭokʼan Israelko
1E Jakob bõsrenko, noa ańjompe. Ape okoe do Israelpe ńum ocokʼkan, ape do Jihudạ bõs khonpe hecʼakana, ape do Probhu Isor ńutumtepe kiriyạkʼ kana ar Israelren Isor ṭhenpe koejoṅ kana, menkhan sạri se dhoromte do bape onkayeda. 2Ape do sonot nagraharen hoṛ mentepe ńumogokʼ kana ar Israelren Isor cetanrepe bhorsakʼ kana, one uniyakʼ ńutum do phạdkoren Probhuge. 3Probhu Isore meneda, “Oka hoyakan ona do sedaeregeń menleda; ariń baḍae ocoleda ar ińakʼ moca do onae lại jạhirleda. Ona tayom ackageń onkakeda ar ona do hoyena. 4Entepe keṭecʼ hoṭokʼan hoṛkan ona doń baḍaekan tahẽkana; apeakʼ taren reakʼ jel do mẽṛhẽtʼ leka ar cạndi do pitạl leka hoyakantapea. 5Ona iạte sedaerege iń do niạkoń lạileda ar ona hoyokʼ laharege ape ṭheniń lại jạhirleda, jemon bape mendaṛeakʼ, ‘aleren goṛhon muṭhạnko, aleren murhutʼko ar chãchre dul muṭhạnkoge niạ doko hukumakada.’ 6Ape do niạkope ańjomakada; ar noa sanamakʼ secʼpe koyokʼ horakada. Ape do cetʼ ona bape aṅgoca?
Ńitokʼ khon iń do nãwã nãwãnakʼkoń ańjom ocopea oka do danaṅ reakʼakʼko kan. 7Sedaere onako do baṅ sirjạu akan tahẽkana, ona do ńitokʼge sirjạu akana; teheń lahare onako do bape ańjomakada. Onatege bape lại daṛeakʼ kana, ‘hẽ, ale do onale baḍaekan tahẽkana.’ 8Ape do ona bape ańjomakada ar bujhạu hõ bape bujhạu daṛeakada; sedae khon apeakʼ lutur hõ baṅ jhicʼ akantape tahẽkana. Enteń baḍaekan tahẽkana ape do bepạtiạr hoṛ kanape mente, ar janam khonge huhulko mentepe ńum ocokʼkana. 9Ińakʼ ńutum iạte ińakʼ edreń bilom ocoyeda; ar ińakʼ sabasi lạgitʼ ona doń sambṛaoa jemon aloń marao giḍipe. 10Ńelpe, seṅgelreń khadlepea, menkhan ape do rupạ leka nirại do bape oḍok hecʼakana; iń do duk reakʼ bhaṭareń biḍạu aṭkar akatʼpea. 11Iń okakoń cekae ona do iń lạgitʼge, eken iń lạgitʼgeń kạmiyeda. Iń do cetʼ ińakʼ ńutumiń besonot ocoytińạ? Ińakʼ sarhao eṭagicʼ do ohoń emlea.
Israel doe sạdhinen
12 #
Jes 44.6; Sod 1.17; 22.13 “E Jakob, E ińiń bachao akawan Israel, aben do ińakʼ katha ańjomben. Iń kangeạń uni do; ińge pạhilicʼ ar ińge sesicʼ. 13Ińakʼ tite pirthimi reakʼ rehetʼ iń bạisạu akada ar jojomtite sermakoń pasnao akada; ar onakoń hohowakʼre mitʼ domte teṅgo godokʼ kana.
14“Ape sanamko jarwa mitʼkate ańjompe. Goṛhon muṭhạnko reaṅ do lahare okoeye lạiyakada? Babel upạrte Probhu Isorren bachao hoṛko do uniyakʼ sanako purạutaea; Probhu Isorakʼ ti do Babelrenko upạrte rakabokʼa. 15Ińge, iń Probhuge kathań roṛ akada; hẽ, ińge uni doń hohoakadea. Iń do uniń ạguiyea ar uni do acʼakʼ kạmireye jo bahakʼa.
16“Ape do iń ṭhen hijukʼte ańjompe. Iń do pạhil khon jãhãnakʼ katha danaṅ dohoy lạgitʼ do bạń roṛ akada; onako katha purạukʼ oktere iń do onḍegeń tahẽkana.”
Ńitokʼ Probhu Isor do acʼren Jiu ińre emkateye kol akadińạ.
17Probhu Isor, aperen chakʼḍaoicʼ, Israelren uni sonoticʼ do niạ kathae meneda, “Aperen Probhu Isor doń ińkangea; ar ape bhạlạiype lạgitʼgeń cetʼ apekana. Oka horte calakʼ lek kanpe ona hortegeń ạyuretʼpea. 18Ape do eken ińakʼ hukumpe ańjomletiń khan apeakʼ suluk do gaḍa leka ar dhorom do jalapuriko leka hoyokʼtapea. 19Ona chaḍa aperen bõsko do gitil lekako hoyokʼa ar aperen gidrạko do lemeń gitil leka alekhako hoyokʼa. Onkoakʼ ńutum do iń samaṅ khon tishõ baṅ getʼ giḍikʼtakoa se tis hõ baṅ mohor meṭaokʼa.”
20 #
Sod 18.4
Ape do Babel khon oḍok calakʼpe, ar Babelrenko khon dạṛ pharakokʼpe. Ar rạskạ reakʼ aṛaṅte lại saḍepe ar noa jạhirpe, “Probhu Isor do acʼren golam Jakobe chaḍao akadea.” 21Tinre uni do hahaṅkar talateye ạyuretʼko tahẽkana unre onko do tetaṅte bako laṅgalena, ente dhiri khon dakʼe oḍok ocoleda; uni do dhiriye paṛakʼ ocoleda ar ona khon dakʼ oḍoklena.
22 #
Jes 57.21
Probhu Isore meneda, “Bedhoromko lạgitʼ suluk do bạnukʼa.”
Santali Bible © Bangladesh Bible Society, 2021.