Jesaea 29
29
Jerusalem reakʼ bạṛicʼ dosa
1Hae, Ariel, E Ariel, Dạudakʼ tahen ṭhạ̃i reakʼ nagraha! Am do bochor bochorgem juṭicʼakʼ kana ar amakʼ porobko do ạcur ạcurte hecʼ ruạṛokʼ kana. 2Menkhan iń do Ariel cetanre muhiniń ạguiya. Uni do hae hae are jare jarekʼa; ar iń ṭhen do mitʼṭecʼ Ariel lekae hoyokʼa, metakʼme seṅgelanakʼ pinḍ lekage. 3Iń do am beṛhaete ar am upạrteń chạunikʼa; gaṛiń benaoa ariń gherao ạcurmea, ar am upạrte buruńjkoń benaoa. 4Am do latartem ńur ocokʼa ar ot khon katham roṛa; ar amakʼ katha do baṅ pusṭạukʼtama. Bhutakʼ aṛaṅ leka amakʼ katha do ot khon rakabokʼa; ar dhuṛi khon do khae khoe oḍokokʼtama.
5-6Menkhan amren locotʼ locotʼ bạiriko do lopotʼ dhuṛi lekako hoyokʼa; onko kurmutạhako do oṭaṅokʼkan bhusạ lekako hoyokʼa. Hẽ, mitʼ ripitʼrege phạdkoren Probhu Isor do huḍur, ot laṛao ar ãṭ saḍete, bharḍo ar birbão hoe ar jojomkan seṅgelteye sạjạikoa. 7Unre sanam gad gad boṅgan hoṛ jạtrenko okoe do Ariel upạrteko lạṛhạikan, metakʼme okoe do uni ar uniyakʼ gaṛ upạrteko lạṛhạikan arko cipạyede onko do kukmũ ar ńindạ reakʼ dorson lekako hoyokʼa. 8Reṅgecʼ akade hoṛ kukmũte jom mae jojomkan, menkhan ebhenlenre ńelme, reṅgecʼma tahenkange. Ar tetaṅakade hoṛ kukmũte ńũ mae ńũńũkan, menkhan ebhenlenre ńelme, uni do nijor ar tetaṅedekangea. Onkage onkoakʼ hõ hoyokʼtakoa sanam gad gad boṅgan hoṛ jạtrenkoakʼ do, one okoe Sion buru upạrteko lạṛhạikan.
9Ape do ṭhak ar hahaṛakʼpe; jạpitʼkate kãṛãkʼpe, menkhan darkha rasa ńũte do alo; konḍe manḍekʼpe, menkhan bubulakʼ iạte do alo; 10#Rom 11.8 ente Probhu Isor do ape cetanre mitʼṭecʼ jạpitʼe ạguakada; apeakʼ mẽtʼ do nạbiko kana, apeakʼ ona mẽtʼ uni doe bond akada ar apeakʼ bohokʼ do cholte ńeńelkoakʼ kana, apeakʼ ona bohokʼ doe poṭom akatʼtapea.
11Niạ goṭa dorsonge ape ṭhen do eken chapkate bedhao akatʼ puthi lekage hoyakana. Okoe paṛhaokʼe baḍae uni ona puthi emkate metae khan, “Dayakate niạ paṛhaome,” Enḍekhan uni doe roṛ ruạṛa, “Iń do bạń daṛeakʼa, ente niạ do chapte bond akana.” 12Ar paṛhao baṅ baḍaeyicʼ niạ puthi emkate metae khan, “Dayakate ma niạ paṛhaome,” Enḍekhan uni doe roṛ ruạṛa, “Iń do paṛhaokʼ bạń baḍaea.”
13 #
Mat 15.8,9; Mrk 7.6,7 Probhu Isore meneda, “Noko do mocategeko ganaoedeńkana ar luṭitegeko manotedeńkana, menkhan onkoakʼ ontor do iń khon sạṅgińgetakoa. Onko do manwa cecetʼakʼ niạmkote ińko sewawạń kana. 14#1 Kor 1.19 Onate iń do arhõ hahaṛawakʼ kạmikote noko hoṛ doń ṭhak utạrkoa; onate ạkilankoakʼ ạkil do maraokʼtakoa ar budankoakʼ bud hõ danaṅokʼa.”
15Hae onko hoṛ do, okoe do akoakʼ goṭawakʼko Probhu Isor ṭhen okoe reakʼko kurumuṭukan. Onko do ńutreko kạmiya arko hudisa, “Okoe baṅ abo doe ńeletʼ bon? Ar cele baṅe baḍayetʼbon?” 16#Jes 45.9; Rom 9.20 Apeakʼ bud do ulṭạ palṭagea! Kuṅkạl ar jaṭaṅ hasa do mitʼ lekagepe hudiseda! Okoeye benaoetʼkan uniyakʼ benao jinis do cetʼ uni reaṅe roṛ daṛeakʼa, “Uni do bae benao akadińạ mente?” Ar bhajan do cetʼ kuṅkạl babotreye mena, “Uni do cetʼge bae baḍaea?”
17Ar thoṛa din khange cetʼ Lebanon do jo bahakʼkan bagwan leka baṅ hoyokʼa? Ar jo bahakʼkan bagwan do bir gajaṛ tulni baṅ lekhakʼa? 18Enhilokʼ kalako do ona bedhao akatʼ puthi reakʼ kathako ańjoma, ar kaṛaṅ ńutre tahenkan kãṛãko doko ńeńela. 19Mạ̃hir hoṛko do arhõ Probhu Isor iạteko rạskạkʼa, ar okoe ḍherko reṅgecʼge onko do Israelren uni sonoticʼ iạteko rạskạkʼa. 20Kurmutạhako do ar bako tahena; ṭiṭkạri hoṛko hõko caba utạrokʼa, ar okoe bạṛicʼakʼ kạmiko menjoṅkan onko doko marao ocokʼa. 21Onko do eṛe kathate hoṛko dusikoa, nagraha reakʼ phaṭok duạrre okoe do bindusạnko secʼe tahenkan uni do pạsiko oḍaoae kana ar sạriyakʼreye tahenkan hoṛ do ạuṛiyakʼteko or ghańjeṛ edekana.
22Ona iạte Abrahamren babańcaoicʼ Probhu Isor do Jakobakʼ bõs babotreye meneda, “Jakob do ar bae lajao ocokʼa; uniyakʼ mẽtʼãhã do ar baṅ mulinokʼtaea. 23Tinre onko do ako talare ińakʼ ti reakʼ kạmi, metakʼme akoren gidrạkoko ńelkoa unre sonoticʼ menteko manaoińạ. Jakobren uni sonoticʼ do sonot menteko aṅgocea ar Israelren Isorko botoraea. 24Ar okoe ṭhik leka bako bujhạu daṛeakʼkan tahẽkan onko do mońjteko bujhạua, ar okoeko karacʼ kurujokʼkan tahẽkan onko do ạkilko cetʼjoṅa.
Santali Bible © Bangladesh Bible Society, 2021.