Jesaea 28
28
Ephrayimakʼ bạṛicʼ dosa
1Hae, Ephrayimren bul hoṛkoakʼ mukuṭ lekan nagraha, one oka iạte onko doko bạḍạiyetʼ tahẽkan! Hae, ona Ephrayim reakʼ bạḍạite perecʼ ṭhonok reakʼ mosotʼ akan mala, one oka do buru-nala otet reakʼ muthnire menakʼakʼ! Ona buru-nalaren hoṛko do darkha rasateko ńũ oborakana. 2Ńelpe, Probhu Isorren mitʼṭen ektiạran ar daṛean hoṛ menaea. Arel ar jarkharicʼ mitʼṭecʼ birbão hoe lekage, uni do daṛean birbão reakʼ banbạsi dakʼ leka otre ona nagraha doe tawakʼ giḍikakʼa. 3Ephrayimren bubulkoakʼ ona bạḍạiteakʼ mukuṭ do otre lebetʼ gasmanḍaokʼa. 4Ephrayim reakʼ ṭhonok mosotʼ akan mala oka do buru-nala otet reakʼ muthnire menakʼ, ona do bele loa leka pạhilrege caba utạrokʼa; one jãhãege ona ńelkate hataokateye jomke.
5Enhilokʼ phạdkoren Probhu Isor do acʼren sarecʼ hoṛko lạgitʼ mitʼṭecʼ ṭhonokanakʼ mukuṭ ar mitʼṭecʼ mońj malae hoyokʼa. 6Uni do bikʼcạrkoakʼ ontorre dhorom reakʼ monsubại danakoa. Ar okoe phaṭok-duạr ṭhen khon lạṛhạiko ocog onko do daṛeye emakoa.
7Menkhan Ephrayimren naekeko ar nạbiko do ńitokʼ darkha rasa ńũkateko bul akana arko guṛdạu baṛaekana; onko do kiḍạkaḍe akan tahenrege dorsonko ńela ar inạ dosarege rayko ema. 8Onkoakʼ joto ṭebil do becʼte perecʼ akana; ar oka jaega hõ sapha do bạnukʼa.
9Onkoko mena, “Uni do bidiạ okoeye cetʼakoa? Ar acʼakʼ katha do okoeye bujhạu ocokoa? Okoe ńũńũko bạgi akatʼ ar okoe bạ̃s khonko or chaḍao ocoakan onko ṭhenge cetʼ baṅa? 10Ente sikhạuna upạr sikhạuna menakʼa, sikhạuna upạr sikhạunage. Thar upạr thar, ar thar upạr tharge, nonḍe thoṛa hanḍe thoṛa. ”
11 #
1 Kor 14.21
Bhagegea, enḍekhan Probhu Isor do bidisiạkoakʼ moca reakʼ hahaṛa pạrsite onko hoṛko ṭhen kathae roṛa. 12Uni do onkoe metatʼko tahẽkana, “Niạ kangea ona jirạukʼ jaega do, laṅga akan hoṛ do nonḍegeko jirạu joṅma. Ńelpe, ona kangea aosan jaega do.” Menkhan onko do ona bako ańjomleda. 13Onatege onko ṭhen Probhu Isorakʼ katha do hoyokʼa, “sikhạuna upạr sikhạuna, sikhạuna upạr sikhạuna. Thar upạr thar, thar upạr thar. nonḍe thoṛa hanḍe thoṛa,” Jemon onko do taṛamle khange sạmbirteko bhindạṛokʼ arko hạnokʼte pạsireko sapʼ ṭarhaokʼ.
14Ona iạte E ṭiṭkạrikan hoṛko, okoe do Jerusalemre onko hoṛko cetanre mạlikipe calaoetʼ, ape do Probhu Isorakʼ katha ańjompe. 15Ape do bạḍạitepe meneda, “Ale do moron ar Sheol sãote mitʼṭecʼ bondobosle bandhao akada. Maraokʼ reakʼ cạbuk pheḍ hecʼlenre hõ ale do bae tiyokʼlea, ente eṛeteakʼ do aleakʼ hirlạ ar phikir do aleakʼ asraygele benao akawana.”
16 #
Ser 118.22,23; Rom 9.33; 10.11; 1 Pat 2.6 Onatege Probhu Isor do niạ kathae meneda, “Ńelpe, biḍạu aṭkarkate mitʼṭecʼ dhiriyiń bachao akawana; ona do Sion reakʼ konac dhiri lekateń bạisạu akada. Okoe onareye pạtiạukʼ uni do ṭarhao akane tahena. 17Hok reakʼ bicạr do jokha baber ar dhorom do sạhul baberiń benaoa; arel do apeakʼ eṛeteakʼ hirlạkoe marao tapea, ar ḍubạ dakʼ do apeakʼ okoakʼ asraye cape iditapea. 18Moron tulucʼ okaṭakʼpe bondobos akatʼ ona do bạtilokʼa; ar Sheol sãote oka bondobospe bandhao akatʼ ona hõ baṅ ṭikạukʼtapea. Maraokʼ reakʼ cạbuk pheḍ hijukʼre, ape do onatepe dal ocokʼa. 19Ar tinạkʼ dhao ona pheḍ hijukʼa unạkʼ dhaogepe dal ocokʼa; aṅga marsalokʼ khon setakʼ hạbicʼ, siń ar ńindạ ona do kajakte pheḍ hijukʼa. Niạ kathape bujhạule khan torasge hoyokʼtapea.”
20Ar apeakʼ gitijokʼakʼ aṭetʼ hõ khaṭokʼtapea, ar oyokʼ lạgitʼ kombol hõ sakṛakʼtapea. 21#2 Sam 5.20; 1 Bõs 14.11; Josu 10.10-12 Probhu Isorgeye lạṛhạiya, cetʼleka uni do Perasim buru ṭhene kạmiletʼ. Uni doe raṅgaokʼa, cetʼleka Gibeon buru ṭhene raṅgaolen. Nonkate uni do acʼakʼ kạmi, acʼakʼ hahaṛa kạmiye sạta. 22Onate ńitokʼ apeakʼ ṭiṭkạri katha do thirtape, ar baṅkhan apeakʼ totolakʼ do arhõ urijokʼtapea; ente phạdkoren Probhu Isorakʼ mocare goṭa dhạrti jarkharokʼ reakʼ kathageń ańjomakada.
23Ańjompe, ar ińakʼ katha luturakʼpe; ar okań roṛetʼkan monte ona ańjompe. 24Casokʼicʼ do itạ erokʼ lạgitʼ cacastegeye tahena? Uni do cetʼ jaoge ḍhelake gejera are ãṛgom somana? 25Hasae somanlere uni do cetʼ kạliạ jirạ ar jirạ bae eretʼ kana? Uni do cetʼ sạr sạrte guhum ar ṭhik jaegare jao ar phạ̃kṛạ̃kʼ guhumko simạnare bae rohoeyeda? 26Uniren Isorge uni doe hukumaea ar ṭhik hor reakʼe cetʼaea. 27Kạliạ jirạ do paṭate bako ena, se sagaṛ reakʼ pạ̃ihạ̃ hõ bako guṛgạu baṛaea, bickom ṭheṅgatege kạliạ jirạ ar jirạ doko ena. 28Okoehõ ḍher din hạbicʼ guhum do bako manḍaea, onate ona do bạṛijokʼa; manḍae jokhecʼ ona cetante pạ̃ihạ̃ se sadom nonkako calao koa jemon ona alo nosṭokʼ. 29Niạko ạkil do phạdkoren Probhu ṭhen khonge hijukʼa. Uniyakʼ sopolha do hahaṛagea ar uniyakʼ ạkil do sorosgea.
Santali Bible © Bangladesh Bible Society, 2021.