Jesaea 14
14
Bondi dosa khon ruạṛ hijukʼ
1Probhu Isor do Jakobe mãyãwaea; uni do arhõ Israele bachaoea ar onkoakʼ disạmreye duṛubea. Bidisiạ hoṛko do onko sãoteko seledokʼa ar onko do Jakobakʼ bõsrenko tulucʼko midokʼa. 2Ar eṭakʼ eṭakʼ jạtrenko do akoakʼ disạmteko idi seṭerkoa. Probhu Isorakʼ disạmre eṭakʼ jạtrenko do Israelren guti kạ̃ṛmĩko hoyokʼa. Ar okoe do Israelko bondiletʼko ńitokʼ onko do akogeko bondi ocokʼa ar Israelko do akoren sasantaoko cetanre mạlikiko calaoa.
Gocʼkoakʼ disạmre Babelren raj
3-4E Israel, oka hilokʼ Probhu Isor do amakʼ harkhet saset khon, amakʼ jala, hamal kạmi ar golam khone rukhiyạmea enhilokʼ am do Babelren raj upạrte nonkage ṭiṭkạri katham roṛa, “Ńelpe, sasantaoicʼ do cetʼlekae cabayena! Uniyakʼ sasantao edre do mucạtʼentaea. 5Probhu Isor do bedhoromkoakʼ ṭheṅgae rạputʼakada. Ar mạliki cakʼlaoko reakʼ mutạk hõ. 6Uni do kurkurạukʼ edrete jạt jạtrenkoe ńẽtʼetʼko tahẽkana, one baṅ thirokʼ ńẽtʼkotege. Uni do edrekate jạt jạtrenko cetanre mạlikiye calaoetʼ tahẽkana, ar santaokateye domonetʼko tahẽkana. 7Ar ṅitokʼ do goṭa dhạrti jirạu ar nirại akana; ar onatege rạskạteko sereńeda. 8Saro dareko ar Lebanon reakʼ debdạru dareko hõ rạskạ salakʼ Babelren rajko metaekana, ‘am dom copotʼena, ar bhagege hoyakana; cele mamakʼko hõ ale ṭhen do ar bako hijukʼa’
9“Sheoltem calakʼkante Sheolren hoṛko do am tulucʼ ńapamokʼ lạgitʼ ạḍiko asbasao caba akana. Onate gocʼkoren jiu do am daram idime lạgitʼko beretʼ akana. Okoe niạ dhạrtiren mukhiyạko tahẽkan onko jotogeko beredokʼ kana; ar okoe do jạtrenko cetanre rapajko tahẽkan onko sanamkoge siṅghạson khonko beredokʼ kana. 10Ar sanamkoge hohoateko metama, ‘Am hõ ale lekagem nijor akana; ar ale somanem hoyena.’
11“Amakʼ sanam ṭhonok do Sheolte giḍi ocoakana; ona sãote amakʼ binạ banamko reakʼ saḍe hõ giḍi akana. Am latarre do tejoko menakʼkoa onko do amko thoprom esetʼ akatʼmea. 12#Sod 8.10; 9.1 E bhurkạkʼ ipil, aṅga marsalokʼren hopon, am do serma khonem ńur akana. Am do jạtrenkom bhagao akatʼkoa, ar ńitokʼ do dhạrtitem giḍi ocoakana. 13#Mat 11.23; Luk 10.15 Am do mone monetem meneda, ‘ińge sermateń rakapʼa, Isorren ipilko cetanre ińakʼ siṅghạson iń rakabtińạ; okare debotako jarwa midokʼ ona utạr senakʼ buru coṭre siṅghạsonreń duṛupʼa. 14Iń do rimil reakʼ muthni cetanreń dejokʼa; ar maraṅ Isor soman iń hoyokʼa.’ 15Menkhan am do patal puritem pheḍ ocoakana, hẽ, ona khạndṛuṅ utạrakʼ jaegatem pheḍ ocoakana. 16Okoe amko beṅgetʼam onko do am secʼ koyokʼ akaeko tahena. Ar amakʼ dosa ńelteko mena, ‘okoe do pirthimiye ḍikạ ḍakeyetʼ tahẽkan ar rajosṭikoe dalmalaoetʼ tahẽkan nui do cetʼ uni hoṛ doe baṅkana? 17Nuige cetʼ, prithimi doe hahaṅkar barag ocoletʼa, ar nagrahakoe dhaṅdhaseletʼ tahẽkana, ar bondiko oṛakʼte bae ruạṛ ocoako kan tahẽkana?’
18“Jạt jạtren sanam rapajko do ṭhonokreko giticʼakana, onkoakʼ apan ạpin topare. 19Menkhan am do giḍi akatʼ dare ḍạr leka topa khon bahretem giḍi ocoakana. Ar tarwaṛeteko gocʼakan okoe do patal puri reakʼ khạndṛuṅ utạrakʼ jaegateko kol ocoakan onkoakʼ mạ̃ṛĩtem ten ocoakana. Am do jaṅgate lebetʼ gańjao akatʼ mạ̃ṛĩ lekam hoyakana. 20Am do eṭakʼ rapajko leka do bam topa ocokʼa, ente amakʼ disạm dom jarkhar akada ar amren hoṛkom khũn akatʼkoa. Bạṛicʼ bõsrenkoakʼ katha do artis hõ baṅ ńumogokʼa. 21Onkoren hapṛamkoakʼ kại iạte onkoren hoponko gocʼko lạgitʼ mitʼṭecʼ jaega ṭhik dohoyme. Onko do disạm ạidạri lạgitʼ bako beretʼa; ar prithimi do akoakʼ nagrahakote bako pereja.”
22Phạdkoren Probhu Isore meneda, “Iń do onko upạrteń teṅgona; Babel reakʼ ńutum ar onare jiwetʼ menakʼko hoṛ ar onko bõsren doń caba utạrkoa. 23Ona do jhĩkko reakʼ ạidạri ar dakʼ ghaḍlakʼkoń hoeocoya. Ar mohor meṭao reakʼ jonokʼte ona doń jokʼ saphaea. Phạdkoren Probhu Isorge niạ katha doń meneda.”
Ạsurrenko upạrte nạbi katha
24 #
Jes 10.5-34; Nạh 1.1—3.19; Sep 2.13-15 Phạdkoren Probhu Isor do kiriạkateye meneda, “Sạrige, iń oka lekań ṭhik dohoakatʼ onkage hoyokʼa, ona do teṅgo tahena. 25Ińakʼ disạm talare Ạsurren raj doń rạputʼ gejerea ar ińakʼ buru cetanreń lebetʼ gasmanḍaoea. Unre ińren hoṛko ṭhen khon uniyakʼ arãṛ do sạṅgińokʼa ar onkoakʼ taren khon bojha hõ ocogokʼa.” 26Goṭa dhạrti lạgitʼ niạ bebosta do ṭhik dohoakana ar sanam jạtrenko cetanre niạ tige tiạr dohoakana. 27Phạdkoren Probhu Isorge noako doe ṭhik dohoakada, onate okoe ona doe mạutạ daṛekea? Uniyakʼ ti do tiạr akan menakʼtaea, ar okoe ona doe lạbṛukʼ daṛeketaea?
Philisṭiko upạrte nạbi katha
28 #
2 Raj 16.20; 2 Bõs 28.27 Oka bochor Ahas raje gocʼen ona bochorge Jesaea do niạ nạbi kathae ńamleda.
29 #
Jir 47.1-7; Jeh 25.15-17; Joe 3.4-8; Amo 1.6-8; Sep 2.4-7; Sak 9.5-7 E Philisṭiko, apeye ńẽtʼetʼpe tahẽkan ṭheṅga do rạputʼ akante alope rạskạkʼa. Ente bińakʼ bõs khonge ayaṅ bińe hijukʼa, ar uni biń khon do uḍạukʼicʼ bińgeye oḍok hijukʼa. 30Joto khon reṅgejokʼko do jomakʼko ńama ar nacarko do nirạiteko giticʼa. Menkhan amakʼ rehetʼ do akalteń marao giḍiya, onate amren sarecʼ jiwetʼ hoṛ doko gujukʼa.
31E phaṭok duạr, homor halaṅ joṅme. E nagraha, rakʼ joṅme. E Philisṭiko, ape do sanamakʼpe juriyeda. Utạr secʼ khon dhũạ reakʼ rimil do hijukʼ kana, ar uniren lạṛhại phạdko khon celehõ bako pạcokʼ kana. 32Boṅgan hoṛ jạtren goḍetko do cetʼ roṛ ruạṛ emakoa? Onko do noage metakoa, “Probhu Isor do Sione bạisạu akada ar onare santaokʼkan uniren hoṛ do asrayko ńama.”
Santali Bible © Bangladesh Bible Society, 2021.