Habakkuk 3
3
Habakukakʼ koejoṅ
1Habakuk nạbiyakʼ koejoṅ
2E Probhu Isor, iń do amakʼ kạmi reakʼ katha ańjomteń botorena.
E Probhu Isor, ale okterege onako do arhõ onkaeme;
aleakʼ okterege am do onako udukʼaleme.
Edrekʼ jokhecʼ mãyãkʼ reakʼ katha do alom hiṛińa.
3Isor do Teman khone hijukʼkana,
uni sonoticʼ do Paran buru khone hijukʼkana. [Sela]
Uniyakʼ ṭhonok do sermae tiyokʼakada;
dhạrti do uniyakʼ sarhaote perecʼ akana.
4Siń cando lekage uni doe jhak jhakaokʼkana;
uniyakʼ ti khon marsal do oḍok hijukʼkana,
onḍe uniyakʼ daṛe do danaṅre menakʼtaea.
5Uni laha lahate do mahamạrige calakʼkana;
ar uni tayom tayomte do ruạ ar hasoge.
6Uni do teṅgokate dhạrtiye daldalaoeda;
ar beṅgetʼte jạt jạtrenkoe thar tharao ocoyetʼkoa.
Sedae reakʼ buru-ḍuṅgriko do rạpudokʼkana
ar sedae jug reakʼ buruko do rạputʼ ńurokʼkana.
Jug hilokʼ khon uniyakʼ hor reakʼ jãhãn bodolge bạnukʼtaea.
7Kusanren hoṛ do nindhạn dosareń ńelketʼkoa,
ar Midiạnren hoṛ doko thar tharaokʼkana.
8E Probhu Isor, gaḍako cetanre amakʼ edre do cetʼ caṛhao akana?
Amakʼ edre do cetʼ gaḍako cetanrege paṛao akana?
Am do cetʼ jalapuri cetanrem ạṛis akana?
Ona iạte cetʼ am do amren sadomko
ar amakʼ jit reakʼ rãt gạḍikorem decʼ baṛaekana?
9Amakʼ akʼ dom halaṅ rakapʼkeda
ar sar do ghũṛạ̃rem lagao akada. (Sela)
Ar gaḍakote dhạrti dom hạṭiń akada.
10Buru-ḍuṅgriko do am ńelteko dal dalaokʼkana.
Ar dakʼ do botorge ạtukʼkana;
athantar dakʼ do acʼakʼ aṛaṅe ańjom ocoyeda,
ar ḍheoko do cetanreye rakapʼ ocoyeda.
11Amakʼ ạphir calakʼkan sar reakʼ jhalkaote
ar bijli leka amakʼ borlom reakʼ jhak jhakte
sermare siń cando ar ńindạ cando dokin teṅgo hapeyena.
12Am do edrete dhạrti talatem laha idiyena
ar jạt jạtrenkom lebetʼ gańjaoketʼkoa.
13Amren hoṛko bańcaoko lạgitʼ
ar amren ojokʼicʼ hoṛ rukhiyạye lạgitʼ
am dom oḍok hecʼena.
Am do dusṭạmi disạmren mukhiyạm ghạlkedea,
ar uniyakʼ disạm do purạtem marao utạrketʼtaea. [Sela]
14Am do amakʼ ṭheṅgate uniren
lạṛhại hoṛkoren matham sobokʼedea.
One onko do chirchạtur cabale lạgitʼ
hoe bharḍo lekako hijukʼkan,
one onko nandanicʼ oko okote jome lekako rạskạkʼkan.
15Amakʼ ạyurte sadom do doreãoko lebḍakeda
ar athantar dakʼ doko haḍak ḍabak ocokeda.
16Ona ańjomkate iń do botorokʼ iń ehopʼena,
ińakʼ luṭikin hõ thar tharaoentinạ;
iń doń nijor idiyena
ar ińakʼ jaṅgakin do lakaṛ lukuṛokʼ ehopʼena.
Enhõ iń do ona din lạgitʼ jiwi hataṛkate koyokʼ hor akaegeń tahena
one oka hilokʼ ale khekhedko do muhinreko paṛaokʼ.
17Loa darere baṅ bahakʼre hõ
ar darkha nạ̃ṛĩre darkha jo baṅ jolenre hõ,
jạitun darere jãhãn jo baṅ saplenre hõ
ar khetre jãhãn phosol baṅ hoylenre hõ,
bhiḍikoakʼ khạṛre bhiḍiko bako tahẽlenre hõ
ar goṛare kaḍa bitkil bako tahẽlenre hõ,
18enhõ iń do Probhu Isor iạteń rạskạkʼa;
ar ińren babańcaoicʼ Isor iạtegeń hulạsokʼa.
19 #
2 Sam 22.34; Ser 18.33 Probhu Isorge ińren daṛe do;
uni do jel eṅgawakʼ jaṅga leka ińakʼ jaṅgae hoyocoketʼtińạ
ar usul usul ṭhạ̃ite calakʼ reakʼ daṛegeye emạńkana.
Sereń cakʼlaoko lạgitʼ tumạlakʼ. Ińakʼ hukum lekate taranakʼ bajnako sãote sereń hoyokʼa.
Santali Bible © Bangladesh Bible Society, 2021.