Habakkuk 2
2
1Iń do ińakʼ pahra ṭhạ̃ireń teṅgona, ar pạcri cetanreń dejokʼa; ar uni cetʼe mitạńa ar ińakʼ lạlis reakʼ cetʼe roṛ ruạṛạńa ona lạgitʼ iń koyokʼ hora.
Probhu Isorakʼ roṛ ruạṛ
2Unre Probhu Isor do roṛ ruạṛạdińteye metadińạ, “Noa dorson reakʼ katha olme ar dhiri paṭa cetanre pusṭạute rokʼ caṛhaome jemon ona paṛhaoetʼkanicʼ doe algateye paṛhao daṛeakʼ. 3#Ibr 10.37 Ente noa dorson reakʼ katha hoyokʼ lạgitʼ ńithõe tạṅgiyeda, menkhan usạratege hijukʼkana ar ona dorson do eṛe mente baṅ sạbudokʼa. Bilom lenrehõ ona lạgitʼ koyokʼ hor akae tahenme; ona do niṭ akatʼ okterege purạukʼa. Ar noa katha do ol dohokakʼme:
4 #
Rom 1.17; Gal 3.11; Ibr 10.38 “Bạḍạite perecʼ Babel do dhoromicʼ doe baṅkana, menkhan okoe miridos menteye ataṅ ocokʼkan uni do acʼakʼ biswạs khạtirtege jiwetʼe tahena. 5Bạḍạite perecʼ Babel sãote darkha rasa doe bepạtiạr akada, uni doe andesale ocoyedekana. Uni do Seoulre leka lalocicʼ ar gujukʼicʼ leka tishõ bae tirpitokʼa; uni do sanam jạtrenko acʼ ṭhene jarwayetʼkoa ar bondikateye idiyetʼkoa.
6“Onko sanamkoge uniko landa-dhutʼaea arko mena, ‘hae uni do, one okoe eṭakʼkoakʼ jinis acʼ lạgitʼe jarwajoṅ kan ar jạmin reakʼ jiniskoteye kisạ̃ṛokʼkan. Nonka do ar tinạkʼ din calakʼa? 7Amren paonadarko do cetʼ ackage bako teṅgona? Arko cetaolen khan onko do cetʼ bako thar tharao ocomea? Unre onko ṭhen am do luṭren jinis lekagem hoyokʼa. 8Aema jạtren hoṛkoakʼ dhonem luṭ akatʼte onko jạtren sarecʼ hoṛ do amakʼ dhonko luṭtama. Ente am do manwakoakʼ mãyãmem joro ocoakada; ar disạm, nagraha ar onako talaren sanam hoṛkom santao akatʼkoa.
9“Jạt jạtrenkoko mena, ‘Hae, uni do, okoe do behok reakʼ labte acʼakʼ tahen oṛakʼe benaoetʼkan jemon khạtirjomae tahẽdaṛeakʼte muhin reakʼ ti khon rukhiyại ńam.’ 10Am do ḍher jạtrenkom marao akatʼkote amakʼ gharońj cetanre lajaoem ạgu akada ar bańcaokʼ reakʼ ạidạri dom caba akada. 11Amakʼ oṛakʼ-bhit reakʼ dhiri do am upạrteye lạlisa ar oṛakʼ reakʼ saṅga kaṭ do ona kathageye sãhạ̃kʼakʼa.
12“Jạt jạtrenko doko mena, ‘hae uni do, one okoe do mãyãm hotete nagrahae benaoetʼ kan ar behokakʼ hotete atokoe teṅgoyetʼkan.’ 13Phạdkoren Probhu Isor doe niṭ dohoakada, jạt jạtrenkoakʼ khaṭaoakʼ reakʼ kuṛại do seṅgelre atar giḍikʼa ar onko do ạuṛiyakʼge apnartetʼko laṅga ocokʼa. 14#Jes 11.9 Jalapuri cetʼleka dakʼte perecʼ tahen onkage dhạrti hõ Probhu Isorakʼ ṭhonok reakʼ ạkilte perecʼge tahena.
15“Jạt jạtrenkoko mena, ‘Hae uni do, okoe do edrete acʼ aḍepaseren hoṛko bubulakʼteye ńũ bul ocoyetʼko jemon onkoakʼ lajaoakʼtetʼe ńel daṛeatako.’ 16Am do manot bodolte lajaotem perejokʼa. Ar ńitokʼ do amakʼ pạlikana. Am do bubulakʼ ńũkatem konḍa manḍekʼ kana. Probhu Isorakʼ jojomti reakʼ edrete perecʼ bạṭi do am secʼge hijukʼkana; ar bemanotakʼte amakʼ manot do dapal esedokʼa. 17Lebanon cetanre oka santaoem calao akatʼ ona do purạtege amre hijukʼa ar onḍenko janwarem gocʼ akatʼkote ńitokʼ do janwarge amko botor ocomea. Am do manwakoakʼ mãyãmem joro ocoakada ar disạm, nagraha ar onḍenko sanam hoṛkom santao akatʼkoa.
18“Boṅgawakʼ do jãhãn damge bạnukʼtaea, ente manwage coṅ uni mae rokʼ benao akade. Ar dulicʼ muṭhạn hõ jãhãn damge bạnukʼtaea, ente manwa do ona khon eṛe cecetʼakʼgeko ńama. Ar okoe acʼakʼ tite onakoe benao akatʼ uni do cedakʼ onareye ṭehãḍokʼkana? Uni boṅga ma kathage coṅ bae roṛ daṛeakʼ. 19Jạt jạtrenko doko mena, ‘Hae uni hoṛ do, one okoe kaṭ do jiwetʼakʼe metakʼkan se jiwi bạnukʼ dhiri do beredokʼe metaekan.’ Onako do cetʼ uni sikhnạte em daṛeaea? Onako ma eken sona ar rupạte muṛạu esetʼ akan; onakore do cetʼ sahẽtʼge bạnukʼa. 20Menkhan Probhu Isor do acʼakʼ sonot oṛakʼre menaea; sanam dhạrti do uni samaṅre hapeakan tahenma.”
Santali Bible © Bangladesh Bible Society, 2021.