2 Samuel 6
6
Goha sinduk Jerusalemte ạguyen
(1 Bõsbudạ 13.1-14; 15.25—16.6,43)
1Dạud do arhõ Israelko mod khon pegel hajar bachao akan hoṛko mitʼ ṭhene jarwaketʼkoa. 2#Exo 25.22 Dạud ar uniren sanam hoṛko Isorakʼ Sinduk do Bakʼale Jihudạ khon Jerusalemte idi lạgitʼ Bakʼal Jihudạ khonko mohnḍayena. Niạ sinduk do sanam daṛeanicʼ Probhu Isor ńutumte oprom tahẽkana, ente Probhu Isor do sindukren Kerub kin talareye tahẽnkana. 3#1 Sam 7.1,2 Isorakʼ ona sinduk onko do buru cetan reakʼ Abinadabakʼ oṛakʼ khonko oḍok ạguketʼte mitʼṭecʼ nãwã sagaṛreko dohokeda. Us ar Ahio ńutuman Abinadabren hoponkin do taṛam taṛamte ona nãwã sagaṛkin laga idiyetʼ tahẽkana. 4Ar Isorakʼ ona sinduk do sagaṛ cetanre tahẽkana ar Ahio do ona laha lahateye calakʼkan tahẽkana. 5Dạud ar Israel jạtren sanam hoṛ Probhu Isor samaṅre debdạru kaṭte benaoakʼ sanam lekan bajnako ar binạ banam, peṛesaṅ, tabla, kortal ar ghạnṭikoante sereń sereńteko calakʼkan tahẽkana.
6Ado Nakhonakʼ khạrại ṭhenko seṭeren khan ḍaṅgra dokin tohotʼena; ar Us do tiye lahaketʼte Isorakʼ sinduke sapʼkeda. 7Usakʼ niạ bebhukti kạmi ńelte Probhu Isorakʼ edre do uni cetanre paṛaoena. Ona iạte Probhu Isor do uniye ńẽtʼkedea, ar onate uni do Probhu Isorakʼ sinduk pheḍreye gocʼena.
8Us cetanre Probhu Isorakʼ noa edre ńelte Dạud do bae kusilena. Ar teheń hạbicʼ hõ ona jaega reakʼ ńutum do Peres Usko#6.8: Peres Us: Noa reakʼ Hebrew mane do “Usakʼ sạjại.” metakʼkana. 9Enhilokʼ Dạud do Probhu Isor ạḍiye botoradea. Uniye menkeda, “Probhu Isorakʼ sinduk do enḍekhan cekate iń ṭhen ạgukʼa?” 10Unre Dạud do Probhu Isorakʼ sinduk acʼakʼ nagrahate ạgu bae rebenlena. Uni do ona Gatren Obed-Idomakʼ oṛakʼreye doho oṭokada. 11#1 Bõs 26.4,5 Gatren Obed-Idomakʼ oṛakʼre Probhu Isorakʼ sinduk do pe cando tahẽyena. Onate Probhu Isor do uni ar uniyakʼ gharońjren sanamkoe bhoratʼkoa.
12Dạud raj doe ańjom ńamkeda je Isorakʼ sinduk Obed-Idomakʼ oṛakʼre tahẽkan iạte Probhu do uniyakʼ oṛakʼren sanamko ar uniyakʼ sanamakʼkoe bhorada. 13Ar okoe do Probhu Isorakʼ sindukko ạguyetʼ tahẽkan onko do turui taṛamko taṛamketʼ tahẽkanre Dạud do mitʼṭen ḍaṅgra ar mitʼṭen phẽṭãṛe samaṅede tahẽkana. 14Dạud do Musnạ reakʼ ephod horokʼkate Probhu Isor samaṅre uniyakʼ sanam daṛete enejokʼe ehopʼena. 15Unre Dạud ar Israelren sanamko rạskạte hoho hohowate ar sakwa oroṅ oroṅte Probhu Isorakʼ sindukko ạgukeda.
16Probhu Isorakʼ sinduk do Dạudakʼ nagrahate seṭerena khan Sạulren hoponera Mikal do jalna khon oyoṅkate onakoe ńelkeda. Ar Probhu Isor samaṅre Dạud do donate enecʼkane ńelkedete uniye nihạ̃tkedea.
17Probhu Isorakʼ sinduk ạgukate onko do Dạude beretʼakatʼ tạmbureko dohokeda. Ar Dạud do unre Probhu Isor ńutumte jeredokʼ samaṅokʼakʼ ar sulukren samaṅokʼakʼe samaṅkeda. 18Jeredokʼ ar sulukren samaṅokʼakʼe samaṅketʼ khan Dạud do sanam daṛeanicʼ Probhu Isor ńutumte hoṛkoe bhoratʼkoa. 19#1 Bõs 16.43 Ona tayom uni do sanam hoṛko, metatʼme jarwa akan Israelren sanam herelhoṛ ar maejiuko mimitʼ goṭecʼ piṭhạ, ar mimitʼ dholma jel ar mimitʼ goṭecʼ kismis piṭhại ematʼkoa. Ar ona tayom onko do apan ạpin oṛakʼteko ruạṛ calaoena.
20Inạ tayom Dạud do acʼakʼ gharońjren hoṛko ạsirbad ako lạgitʼ tinreye ruạṛ hecʼena unre Sạulren hoponera Mikal do uni daram ạguye lạgitʼe oḍok hecʼena are menkeda, “Israelkoren raj teheń do cetʼlekae manotena! Uni do kharap hoṛko leka acʼren kạ̃ṛmĩko samaṅre hoṛmo reakʼ kicricʼkoe totʼ giḍiketʼtaea.”
21Dạud do Mikale metadea, “Iń do Probhu Isor samaṅrege onań onka akada. Uni do acʼren hoṛko samaṅre, metatʼme Israelko cetanre cakʼlaoicʼ menteye ojokʼ bahalko lạgitʼ amren ạpum se uniyakʼ gharońjren okoege bae bachaoletʼkoa menkhan ińgeye bachao akadińạ. Ona iạte iń do Probhu Isor samaṅreń rạskạkʼ kana. 22Iń do noa khon arhoń copodokʼa ar iń ṭhen arhoń huḍińokʼa. Menkhan am okoe kạ̃ṛmĩkoakʼ katham roṛetʼkan onko do ińko manotińạ.”
23Ar Sạulren hoponera Mikal do ạuriye gujukʼ hạbicʼ bạńjhigeye tahẽyena.
Santali Bible © Bangladesh Bible Society, 2021.