2 Samuel 5
5
Dạud do goṭa Israel cetanre raje hoyena
(1 Bõsbudạ 11.1-9; 14.1-7)
1Israelren sanam gusṭikorenko do Hebronre Dạud ṭhen hecʼkateko menkeda, “Am ar alekoakʼ hoṛmore do inạ mitʼ mãyãmge ạtukʼkana. 2Sạul do aleren raje tahẽkanre Israelkoren lạṛhại phạdko do amgem ạyuretʼko tahẽkana; ar Probhu Isor do amgeye metatʼme tahẽkana acʼren hoṛko, metatʼme Israelko ńel todarotkom ar onkoren mukhiyạ hoyokʼme.”
3Israel disạmren sanam murubbiko do Hebronren raj Dạud ṭhenko jarwayena. Unre raj do Probhu Isorge gohayicʼe dohokedete onko sãote mitʼṭecʼ bondobose bandhaokeda. Ar onko do Israel cetanre Dạudko rajkedea.
4 #
1 Raj 2.11; 1 Bõs 3.4; 29.27 Dạud do tinre raje hoyena unre uniyakʼ umer do pegel bochor tahẽkantaea; ar pongel bochor hạbicʼ raje calaokeda. 5Uni do Hebron khon Jihudạ disạm cetanre eae bochor tala ar Jerusalem khon goṭa Israel ar Jihudạ cetanre pegel bochore rajlena.
Dạud do Jerusaleme hatetʼkan
6 #
Josu 15.63; Bikʼ 1.21 Raj ar uniren lạṛhại phạdko do Jebusiạko akromonko lạgitʼ Jerusalem secʼko laha idiyena. Unre Jebusiạko do Jerusalemreko girobasokʼkan tahẽkana. Onko do Dạudko metadea, “Nonḍe do bam bolo daṛeakʼa; kãṛã ar leḍhakoge amko laga ńirmea.” Onko doko hudisetʼ tahẽkana Dạud do onḍe bae bolo daṛeakʼa. 7Menkhan Dạud do Sion reakʼ gaṛe hatkeda; onate ona do Dạud nagrahako ńutumkeda.
8Enhilokʼ Dạude menletʼ tahẽkana, “Jãhãege, Jebusiạko, metatʼme onko kãṛãko ar leḍhako hạnkoe menetʼ khan uni do dakʼ nalako secʼte calakʼ hoyokʼtaea. Iń do onkoń hirkhạwako kana.” Ona iạte hoṛkoko mena, “Kãṛã ar leḍhako do Probhu Isorakʼ oṛakʼte bako bolo daṛeakʼa.”
9Inạ tayom Dạud do ona gaṛre girobasokʼe ehopʼena ar ona reakʼ ńutum do Dạud nagrahae dohokeda. Millo khon ehopʼkate ona gaṛ reakʼ beṛhaete uni do nagrahae benaokeda. 10Uni do dinke dine daṛe idiyena, ente sanam daṛean Probhu Isor do uni sãoteye tahẽkana.
11Turren raj Hiram do Dạud ṭhen adom hoṛe kolketʼkoa ar onko sãote debdạru kaṭko, chutạr mistriko ar raj mistriko hõe kolketʼkoa. Onko do Dạud lạgitʼ mitʼṭen raj oṛakʼko benaokeda. 12Dạud do unreye bujhạukeda, Probhu Isor do Israelko cetanre acʼakʼ raj hudại ṭarhaoketʼa ar acʼren hoṛko, metatʼme Israelko lạgitʼ acʼakʼ rajosṭiye maraṅketʼtaea.
13Dạud do Hebron bạgikate Jerusalemte senkate arhõ chuṭki erakoe dohoana ar aema gidrạko janamena. 14Jerusalemre uniren okoeko gidrạko janamlen onkoakʼ ńutum do hoyokʼ kana Simiyi, Sobab, Nathon ar Solomon. 15Ibhar, Elisua, Nepheg, Japhia, 16Elisama, Eliayada ar Eliphelot.
Dạud do Philisṭikoe bhagaoketʼko
(1 Bõsbudạ 14.8-17)
17Philisṭiko do tinreko ańjomkeda, Dạud do Israelko cetanre raj hudạreye ojokʼ bahal akana unre onko do sanam lạṛhại phạdkoante uni hạne lạgitʼ sendra baṛayeko ehopʼena. Ar Dạud do ona kathae ańjomketʼ khan gaṛ ńutumanakʼ buruteye rakapʼ calaoena. 18Ar Philisṭiko do hecʼkate Rephayim reakʼ buru otetekoreko pasnao idiyena. 19Unre Dạud do Probhu Isor ṭhene kuliyana, “Iń do cetʼ Philisṭikoń ńẽtʼkoa? Am do cetʼ ińakʼ tire onkom jimạkoa?”
Probhu Isore roṛ ruạṛkeda, “Hẽ, Do calakʼme. Iń do khạṭige amakʼ tire Philisṭikoń soprotkoa.”
20Unre Dạud do Bakʼal Perasimteye#5.20: Bakʼal Perasim: Noa reakʼ Hebrew mane do “Isorge phoṛicʼ.” senena ar onḍe Philisṭikoe bhagaoketʼkoa. Uniye menkeda, “Probhu Isor do ińren bạiriko iń samaṅ khone phoṛ idiketʼkoa ḍubạ dakʼ phoṛokʼ lekage.” Ona iạte ona jaega reakʼ ńutum do Bakʼal Perasimko dohokeda. 21Ar Philisṭiko do akoren murhutʼko onḍeko giḍi oṭokatʼko khan Dạud ar uniren hoṛko do onkoko idiketʼkoa.
22Tayomte Philisṭiko do arhõ hecʼkate Rophayim otetreko pasnaoena. 23Unre Dạud do Probhu Isore kulikede khan uni doe metadea, “Mitʼ mohnḍa onko secʼ do alom calakʼa; menkhan onko tayom secʼ reakʼ konḍea dareko samaṅ secʼte onkom ńẽtʼkoa. 24Ar konḍea darekore tinre lạṛhại phạdkoakʼ saḍem ańjoma unre am dom oḍok hijukʼa. Ona reakʼ mane do hoyokʼ kana, Philisṭikoren lạṛhại phạdko ńẽtʼko lạgitʼ Probhu Isor do am laha lahateye calao akana.” 25Dạud do Probhu Isorakʼ hukum lekageye kạmikeda. Uni do Geba khon Gesor hạbicʼ goṭa hor Philisṭikoe gocʼ idiketʼkoa.
Santali Bible © Bangladesh Bible Society, 2021.