2 Samuel 24
24
Dạudren hoṛkoakʼ lekha
(1 Bõsbudạ 21.1-27)
1Probhu Isor do arhõ Israelko cetanre pit caṛhaoentaea. Uni do onko upạrte Dạude uskurkedeteye metadea, “Am do senkate Israel ar Jihudạren hoṛkom lekhakoa.”
2Unre raj do acʼ sãoten subedar Joabe metadea, “Ape do Dan khon Ber-seba hạbicʼ Israel gusṭiko talare senkate hoṛ lekhakope jemon iń do onkoakʼ lekhań baḍae daṛeakʼ.”
3Joab do raje metadea, “Amren Probhu Isor do hoṛkoakʼ lekha mitʼsae doboṛ ḍher baṛeye hoyocoema, ar ińren mạlik maharaj do acʼakʼ mẽtʼtege ona baṛeye ńel ma. Menkhan ińren mạlik maharaj do cedakʼ nonka kạmi doe khojkana?” 4Menkhan Joab ar subedarko ṭhen rajakʼ hukum do tahẽyena; ar onate onko do Israelren hoṛ lekhako lạgitʼ raj samaṅ khonko oḍok calaoena.
5Onko do Jordan paromkate Gat ṭoṭha buru lodam tala nagraha reakʼ dạkhinre Aroerre senkateko ḍerayena, ar ona tayom do Jaserteko calaoena. 6Ona tayom onko do Gilead ar Tahtim-Hadasi ṭoṭhateko calaoena. Ar ona tayom do Danre senkate Sidon secʼko ạcurena. 7Ona tayom onko do Tur reakʼ gaṛ nagraha ar Hiwiko ar Kananikoakʼ goṭa nagrahako calaoena. Ar sesre onko do Jihudạ reakʼ dạkhin secʼ Ber-sebateko calaoena. 8Nonkate onko do goṭa disạm ạcur ạcrute are cando bargel din tayom Jerusalemteko ruạṛ hecʼena. 9Joab do raj ṭhen hoṛkoakʼ lekhae emkeda. Onate ńelena, tarwaṛeko calao daṛeakʼ nonkan hoṛ Israelren irạl lakh ar Jihudạren do mõṛẽ lakh hoṛko tahẽkana.
10Disạm hoṛe lekha ocoketʼko tayom Dạudakʼ mon do sobokʼentaea. Uni do Probhu Isor ṭhen koekateye menkeda, “Noa kạmikate iń doń ghạṭ akada. E Probhu Isor, ńitokʼ do am ṭheniń nehõrokʼ kana, amren gutiyakʼ ghạṭ baṛe ocokʼkakʼme. Iń do lelha hoṛ lekań kạmi akada.”
11Dosar hilokʼ setakʼre Dạud do jạpitʼ khone beretʼen khan uniren ńeńelicʼ, metakʼme Gad nạbi ṭhen Probhu Isorakʼ katha do sodorena, 12“Am do senkate Dạud niạ katha lạiyaeme, ‘am lạgitʼ iń do pea sạjạiyiń dohoakada. Onako khon okaṭakʼem bachao joṅ ona lekage amreń paṛao ocoya.’ ”
13Unre Gad do Dạud ṭhen senkateye menkeda, “Amakʼ disạmre cetʼ eae bochor akal hoyokʼem khojkana? Se bạiriko khudạu baṛamete pe cando hạbicʼ ńir oko baṛayem khojkana? Se pe mãhã hạbicʼ amakʼ disạmre mahamạrim khojkana? Okoeye kol akadiń uni do cetʼ iń roṛ ruạṛaea ona reakʼ ńitokʼ hudiskate lạiyạńme.”
14Unre Dạud do Gade metadea, “Iń do ạḍi muhinreń paṛao akana. Manwa tire jemon aloń paṛaokʼ; ona khon boroṅ, Probhu Isorakʼ tire bon paṛaokʼma, ente uniyakʼ daya do asambheṛgetaea.”
15Ar Probhu Isor do unre setakʼ khon ehopʼkate niṭ akatʼ okte hạbicʼ Israel cetanre mitʼṭecʼ mahamạriye kolkeda. Onate Dan khon Ber-seba hạbicʼ goṭa disạmren hoṛko tala khon eaegel hajar hoṛko gocʼena. 16Jerusalem marao lạgitʼ serma goḍet do tinre tiye tulketʼtaea unre Probhu Isor do ona bạṛicʼ sạjại khon mone ạcurketʼtaea. Ar okoe serma goḍet do hoṛkoe maraoetʼko tahẽkan uniye metadea, “Inạkʼkakʼme, ḍher hoyakana. Amakʼ ti do or ruạṛtam.” Un jokhecʼ Probhu Isorren goḍet do Jebusiạ Arownakʼ khạrại ṭhene teṅgo akan tahẽkana.
17Okoe serma goḍet do hoṛkoe ńẽtʼetʼko tahẽkan Dạud do uniye ńelkede khan Probhu Isore metadea, “Ińgeń ghạṭ akada ar ińgeń behok akada. Menkhan noko bhiḍiko do cetʼko ceka akada? Onate eken iń ar iń ạpuńren bõskoge baṛe sạjạilem.”
18Enhilokʼ Gad do Dạud ṭhen senkateye metadea, “Am do Jebusiạren Arownakʼ khạrạite senkate Probhu Isor ńutumte onḍe mitʼṭecʼ pinḍ benaome.” 19Unre Dạud do Probhu Isorakʼ hukumte Gadakʼ katha leka onḍeye calaoena. 20Arowna do tinre raj ar uniren hoṛko acʼ secʼ hijukʼkane ńelketʼkoa unre uni do senkate otreye ombakʼente raje ḍobokʼadea.
21Arownae menkeda, “Ińren mạlik maharaj do acʼren guti ṭhen cetʼ lạgitʼe hecʼakana?”
Dạude roṛ ruạṛkeda, “Probhu Isor ńutumte mitʼṭecʼ pinḍ benao lạgitʼte iń do amakʼ khạrại kirińiń menjoṅkana, jemon hoṛko cetanre hecʼakan mahamạri thirokʼ.”
22Arowna do Dạude metadea, “Ińren mạlik maharaj oka bhagem hudisetʼ onage ińakʼ nonḍe khon samaṅme. Jeredokʼ samaṅokʼakʼ lạgitʼ ḍaṅgra do nonḍege menakʼkoa ar sahan lạgitʼ hõ enokʼ paṭako ar ḍaṅgrakoakʼ arãṛ menakʼa. 23E maharaj, Arowna do noako raje emaekana.” Arowna do arhõe meneda, “Amren Probhu Isor do amakʼ samaṅokʼakʼe ataṅtam ma.”
24Raj do Arownae metadea, “Baṅa, ona do baṅ hoyokʼa. Iń do khạṭige damte onań kirińa. Begor damte ńamokʼ nonkan jãhãnakʼge Probhu Isor ńutumte jeredokʼ samaṅokʼakʼ do bạń samaṅa.”
Niạ menkate Dạud do mõṛẽ Sekel rupạte ona khạrại ar ḍaṅgraye kirińketʼkoa. 25Ona tayom do Probhu Isor ńutumte onḍe mitʼṭecʼ pinḍe benaokeda ar jeredokʼ samaṅokʼakʼ ar sulukren dãṛẽkoe samaṅketʼkoa. Nonkate disạm lạgitʼ koejoṅ hoyen khan Probhu Isor doe ańjomketʼtakoa ar Israel disạmre mahamạri hõ thirena.
Santali Bible © Bangladesh Bible Society, 2021.