2 Samuel 22
22
Dạudakʼ sarhao sereń
(Sereńko 18)
1Probhu Isor do Sạul ar eṭakʼ bạirikoakʼ ti khon tinre Dạude rukhiyạkedea unre Probhu Isor ńutumte Dạud do niạ sereńe sereńkeda:
2Probhu Isorge ińren usul buru,
ińakʼ aotan gaṛ ar ińren chakʼḍaoicʼ;
3Isor kangeae ińren usul buru do,
unirege iń doń asray akana.
Uni do ińren ḍhal kanae, rurukhiyạicʼ dereńge,
unige ińakʼ usul gaṛ, ińakʼ asray ṭhạ̃i.
Sasantaokoakʼ ti khon
amge bańcaoińme.
4Probhu Isor do sarhao ńam lek kanae,
iń do uniń hohowae kana;
onate ińren bạirikoakʼ ti khon
iń do rukhiyạń ńameda.
5Moron reakʼ ḍheokoteń esetʼ ạcurlena,
maraokʼ reakʼ banbạsiteń toraslena.
6Patal puri reakʼ barahikoteń tolakana,
ar gujukʼ reakʼ pạsi do iń lạgitʼ oḍao tahẽkana.
7Iń do muhinre ińren Probhu Isoriń hohowadea
ar goṛo ńam lạgitʼ uni ṭheniń rakʼkeda.
Uni do acʼakʼ tahen ṭhạ̃i khon ińakʼ aṛaṅe ańjomketʼtińạ;
ińakʼ rakʼjoṅ do
uniyakʼ luturre seṭerena.
8Unre dhạrti do daldalaoena
ar ḍikạ ḍakekʼ ehopʼena,
buru reakʼ rehetʼko daldalaoena;
uniyakʼ edrete onako do dal dalaoena.
9Uniyakʼ mũ khon dhũạ do coṭte rakapʼena,
ar moca khon ḍahao marao reakʼ seṅgel oḍokena.
Ar uniyakʼ moca reakʼ seṅgelte koelako jolena.
10Uni do sermae liwetʼketʼteye pheḍ hecʼena;
uniyakʼ jaṅga latarre do hende rimil tahẽkana.
11Uni do Kerubre decʼkateye uḍạu hecʼena,
ar hoe reakʼ phạ̃kṛạ̃kʼteye ạphir hecʼena.
12Ńutte uni doe esetʼ ạcurena;
ar beṛhaete dakʼ reakʼ dạriạ hende rimilge tahẽkana.
13Uni samaṅ reakʼ rãt khon
seṅgel aṅgrako jol oḍokena.
14Probhu Isor do serma khone huḍurkeda;
ar maraṅ Isorakʼ aṛaṅ ańjomena.
15Uni do sarkoe aṛakʼketʼte bạirikoe
chirchạturketʼkoa
ar bijlikoteye
andmandaoketʼkoa.
16Probhu Isorakʼ dhomkaote ar sahẽtʼte
jalapuri reakʼ nalako ńelena,
ar dhạrti reakʼ rehetʼko do oṭakʼena.
17Uni do coṭ khon tiye tiyạrketʼteye
sapʼkedińa,
ar khạndri dakʼ khone
owar rakapʼkedińa.
18Ińren daṛean bạirikoakʼ ti khon
uni doe bańcaokedińa;
iń kurudạńko reakʼ ti khon
onkoakʼ daṛe do
iń khon hõ ḍhergetakoa.
19Muhinre onko do ińko esetʼ ạcur ledeńạ,
menkhan Probhu Isorgeye sapʼ sãohakedińa.
20Uni do mitʼṭecʼ phaelao jaegateye
oḍok ạgukedińa;
ar ińre kusiye tahẽkante
uni doe rukhiyạkedińa.
21Ińakʼ dhorom kạmi lekatege
Probhu Isor doe dan akawạdińa,
ińakʼ kạmi reakʼ napaetetʼ iạtege
uni do kuṛạiye emadińạ;
22Ente Probhu Isorakʼ horrege
iń doń dãṛãn kana;
ar bạṛicʼakʼ kạmikate ińren Isor khon
bạń ocokʼ akana.
23Isorakʼ joto ạn-ạriko do
iń samaṅre menakʼa;
ar uniyakʼ ạn ạri khon do bạń ocokʼ akana.
24Uni samaṅre iń do bin dusạngeń tahẽkana,
ar kại khon hõ pharakreń tahẽlena.
25Onate Probhu Isor do kuṛạiye emakawạdińa
uniyakʼ mẽtʼãhã samaṅrege
dhorom kạmi lekate
ińakʼ mońjakʼ kạmikote.
26E Probhu Isor, am do biswạsiko tulucʼ do
biswạstem beohareda
ar dhoromko tulucʼ do dhoromem beohareda,
27Ar khạṭiko tulucʼ do khạṭigem beohareda,
ar phẽpṛakʼko do amakʼ bud reakʼ
phundi udukʼakome.
28Am do nacar jạtrenkom rukhiyạyetʼkoa,
ar bạḍạiko tumbutʼ ocoko lạgitʼ
amakʼ mẽtʼ do onko secʼge menakʼa.
29E Probhu Isor, amge ińakʼ diuhe do;
amge ińakʼ ńut dom
marsal ocoyetʼtińạ.
30Amakʼ goṛote lạṛhại phạdko cetanre
iń do jhãpiń em daṛeakʼa,
ińren Isorakʼ goṛote
pạcrikoń don parom daṛeakʼa.
31Isorakʼ horre jãhãn bin sạbitanakʼ do bạnukʼanaṅ;
ar Probhu Isorakʼ katha do khạṭi mente
sạbud akana.
Uni do acʼre hirlạjoṅ kan
sanam hoṛren ḍhal kanae. 32Probhu eskar chaḍa ar okoe Isor menaea?
Aboren Isor chaḍa cetʼ jãhãn
aotan buru menakʼa?
33Isorge ińren kajak asray
unige ińakʼ horkoe sạbit ocoakada.
34 #
Hab 3.19
Uni do posta-jel leka
jaṅga reakʼ daṛeye emakawạdińa;
ar sanam usul jaegakoreye
teṅgo ocoakadińạ.
35Uni ṭhen khonge ińakʼ ti do
lạṛhạiye cetʼakada,
onate ińakʼ ti do pitạl reakʼ akʼe
gakʼ daṛeakʼ kana.
36E Probhu Isor, amakʼ rurukhiyạ ḍhal do
ińem emakawạdińa;
ar amakʼ goṛo doe
maraṅ akadińạ.
37Am do ińakʼ taṛam horem phaelao akada,
onate jaṅga do baṅ tohotʼlentińa.
38Ińren bạirikoń khudạuketʼkoa
ariń jarkharketʼkoa;
ar onko ạuriko gocʼ cabakʼ hạbicʼ
tayom secʼ do bạń ruạṛlena.
39Onko doń marao giḍi akatʼkoa,
ariń gejer caba akatʼkoa,
ar alo jemonko beretʼ daṛeakʼ;
ente ińakʼ jaṅga latarreko ńurakana.
40Amge ińakʼ ḍanḍare lạṛhại lạgitʼ
daṛeyem emakawạdińạ,
ar iń upạrtenko do ińakʼ jaṅga
ṭhenem tumbutʼ ocoketʼkoa.
41Ińren bạiriko iń khonem
laga ńirketʼkoa;
ar okoe ińko kurudạńkan onko doń
marao giḍi akatʼkoa.
42Onko do goṛo ńam lạgitʼko hohoyetʼkana,
menkhan onko rukhiyạko lạgitʼ do celege bako hecʼlena.
Onko do Probhu Isor secʼko koyokʼ hor akada,
menkhan uni do bae roṛ ruạṛatʼkoa.
43Dhạrti reakʼ dhuṛi leka onko doń
holoṅ ḍigirketʼkoa;
ar ḍahar reakʼ losotʼ leka
jaṅgateń lebetʼ gańjaoketʼkoa.
44E Probhu Isor,
ińren huhulkan hoṛko khon
am dom bańcao akadińạ,
ar eṭakʼ jạtrenko cetanre
iń do matha mentem dohoakadińạ;
okoe bạń orom akatʼko tahẽkan
onko hõ iń gobolrenko hoyena.
45Bidisiạ hoṛ doko
luhum suhumińạ;
ińakʼ katha ańjom torageko
bataotińạ.
46Onko doko tolmojokʼa;
ar thar tharaoakʼte gaṛ khonko oḍok hijukʼa.
47Probhu Isor doe jiwetʼgea.
Ińakʼ asray cạṭạini do sarhao hoyokʼtae ma.
Ińren Isor, okoe doe ińren
rurukhiyạicʼ burukan,
uni doe usulokʼma.
48Uni do eṭakʼ jạtrenko
iń tabereye ạguyetʼkoa
ar iń huyạte unige
sạjạiye emakokana.
49Uni do bạirikoakʼ ti khone
rukhiyạ edeńkana.
E Isor, am do
ińren bạiriko khonem usul akadińạ,
ar jor julumkan hoṛko khon
amgem rukhiyạ edeńkana.
50 #
Rom 15.9
E Probhu Isor,
ona iạtege eṭakʼ jạtrenko talare
amakʼ ṭhonokiń sodortama
ar amakʼ ńutumiń maraṅtama.
51Probhu Isor do acʼren raj ḍher dhaoe
jitạu ocoyea;
hẽ, acʼren ojokʼicʼ lạgitʼ
Dạud ar uniren bõsko lạgitʼ
uni do acʼakʼ jaejug asambheṛ dayae udukʼetʼ kana.
Santali Bible © Bangladesh Bible Society, 2021.