2 Samuel 2
2
Dạud do Jihudạ-gusṭiren raje hoyen
1Dạud do Probhu Isor ṭhene kuliyana, “Iń do cetʼ Jihudạ ṭoṭha reakʼ jãhãn mitʼṭecʼ nagrahateń calakʼa?”
Probhu Isore menkeda, “Hẽ, calakʼme.”
Dạude kulikedea, “Iń do okateń calakʼa?”
Probhu Isore roṛ ruạṛkeda, “Hebronte rakapʼ calakʼme.”
2 #
1 Sam 25.42,43 Unre Dạud do acʼren banar bạhu, metakʼme Jisreyelren Ahinoam ar Karmel Nabalren rạnḍiyicʼ Abigaelante Hebronteye rakapʼ calaoena. 3Ar okoeko hoṛ uni são sãoteko tahẽkan onko hõ onkoakʼ gharońj sudhại idiketʼkoa. Onko do Hebron reakʼ atokore girobasokʼko ehopʼena. 4#1 Sam 31.11-13Unre Jihudạren hoṛko do Hebronteko hecʼena ar Dạud do Jihudạ gusṭiren raj menteko ojokʼ bahalkedea.
Hoṛko do Dạud niạ sombatko lạiyadea, Jabes-Gileadren hoṛge Sạul doko topa akadea. 5Unre uni do hoṛ kolkate Jabes-Gileadren hoṛko niạ kathae metatʼkoa, “Aleren mạlik Sạulpe topakede iạte unire okaṭakʼ pạtiạrpe udukʼ akatʼ onate Probhu Isore bhorape ma. 6Uni do ńitokʼ acʼakʼ dulạṛ ar pạtiạrtetʼ apeye udukʼape ma, ar apeakʼ ona kạmi iạte ińhõ ape tulucʼ mońjiń beohara. 7Onate ape do keṭejokʼpe ar dilanko hoyokʼpe. Aperen mạlik Sạul doe gocʼena ar Jihudạ gusṭiren hoṛko do raj lekate ińko ojokʼ bahal akadińạ.”
Sạul ar Dạudren hoṛko talare lạṛhại
8Onako dinre Sạulakʼ lạṛhại phạdren senaputi Ner hopon Abner do Sạulren hopon Isaboth jordan gaḍa hanasa Mahaniạmteye idiakade tahẽkana. 9Ar Isbot do Gilead, Asuri, Jisreyel, Ephrayim, Benjamin, metakʼme sanam Israel disạm cetanreye raj akade tahẽkana. 10Sạulren hopon Isaboth do pongel bochor umerre Israel disạmren raje hoylena ar bar bochor raje calaoleda. Menkhan Jihudạ gusṭiren hoṛko do Dạud tabereko tahẽkana. 11Dạud do Hebron khon Jihudạ gusṭiko cetanre eae bochor hạbicʼ raje calaokeda.
12Mitʼdin Nerren hopon Abner do Sạulren hopon Isbotren hoṛkoante Mahaniạm khon Gibeonteye senena. 13Unre Serua hopon Joab ar Dạudren hoṛko oḍok hecʼena. Ar Gibeon reakʼ pukhri ṭhenko samna sạmniyena. Mitʼ dol do pukhri niạsa aṛere ar eṭakʼ dol do pukhri hanasa aṛereko duṛupʼena.
14Unre Abner do Joabe metadea, “Banar dolren thoṛa juạnko rakapʼ hecʼkate iń samaṅreko lạṛhạima.”
Joabe menkeda, “Bhagege, onkage hoyokʼma.”
15Unre Benjamin-gusṭi ar Sạulren hopon Isaboth secʼ khon gelbar hoṛ ar Dạud secʼ khon gelbar hoṛ do lạṛhại lạgitʼko bachao ocoyena. 16Ar banar dolren hoṛge mitʼ hoṛ armitʼ hoṛakʼ bohokʼ jhuṭiạukate tarwaṛete kokhareko sobokʼ bitʼena ar mitʼ dhaote otre bhindạṛenteko gocʼena. Ona iạte Gibeon reakʼ ona jaega do Hilkath Hasurimko dohokeda (metakʼme, “Tarwaṛe ṭạnḍi”).
17Enhilokʼ do ạḍitetʼ lạṛhại hoyena ar onate Abner ar Israelren hoṛko do Dạudren hoṛ ṭhenko bhagao ocoyena. 18Joab, Abisae ar Asahel ńutuman Seruaren pea hopon onḍeko tahẽkana. Asahel do birren jel leka murukteye dạṛ daṛeakʼkan tahẽkana. 19Uni do Abnere khudạu idikedea ar etom końe sen baṅkate uni tayom tegeye ńir calaoena. 20Unre Abner do tayom secʼ ạcurkateye kulikedea, “Am dom Asahel kana?”
Asahele menkeda, “Hẽ, ṭhikgem menakada.”
21Unre Abner do uniye metadea, “Am do etom ar baṅkhan końe secʼ ạcurokʼte jãhãege bhagaokate uniyakʼ lạṛhại reakʼ khanḍa bhanḍa hataome.” Menkhan Asahel do uniye khudạu idikedea.
22Abner do Asahel arhõe metadea, “Teṅgokʼme, ar alom khudạuińạ. Am gocʼme do bạń menjoṅ kana. Ariń onkae khan cekate amren boeha Joab ṭhen doń ńel ocokʼa?”
23Asahel do enhõ ruạṛokʼ bae rạjilena. Unre Abner do acʼakʼ borlomte Asahelakʼ lacʼe sobokʼketʼtaea, ar borlom do uniyakʼ dea secʼte oḍok hecʼena. Ar Asahel do onḍege bhindạṛenteye gocʼena. Asahel oka jaegare bhindạṛenteye gocʼen onḍe tinạkʼ hoṛko hecʼen onko do sanamge onḍeko teṅgo tahẽyena, 24menkhan Joab ar Abisae do Abnerkin khudạu idikedea. Nonkate unkin do Gibeon reakʼ hahaṅkar talate calakʼ hor reakʼ Giah samaṅre Amah buru ṭhenkin seṭerena. Unre siń cando doe hạsurokʼ kan tahẽkana. 25Ar unre Abner tayomre do Benjạmin-gusṭiren hoṛko jarwa akan tahẽkana. Arko mitʼ dolente mitʼṭecʼ buru cetanre rakapʼkateko teṅgoyena.
26Unre Abner do Joab hohoadeteye metadea, “Tarwaṛe do cetʼ jaejug hạbicʼ jojomtegeye tahena? Bam bujhạueda mucạtʼtetʼ do haṛhatʼgea mente? Amren hoṛko onkoren boeha khudạuko khon do tinrem manakoa?”
27Joabe roṛ ruạṛkeda, “Jiwetʼ Isorre kiriạkateń meneda, am bam roṛlere hõ setakʼrege hoṛko do amren boeha khudạuko thirkokʼa.” 28Ar noa menkate uni do sakwae oroṅkeda. Unre sanam hoṛko thir hapeyena. Onko do ar Israelko bako khudạuletʼkoa ar lạṛhại hõ bako lạṛhạilena.
29Abner ar uniren hoṛko do goṭa ńindạ Araba otet talate taṛam idikate jordan gaḍako paromena. Ona tayom Bithron talate taṛam idikate onko do Mahanayimteko seṭerena.
30Joab do Abner ar bae khudạuledea uni doe ruạṛ hecʼena. Ar acʼren hoṛkoe jarwa mitʼketʼko khan Asahel ar Dạudren gelare hoṛ do onḍe bạnukʼkoa mente ńelena. 31Menkhan Benjạminren okoeko do Abner sãoteko tahẽkan Dạudren hoṛko do onkoren pesae turuigel hoṛko gocʼketʼkoa. 32Onko do Asahelko kuṭuṅ idikedete Bethlehemteko senena ar uniren apatakʼ topareko topakedea. Ona tayom Joab ar uniren hoṛko do goṭa ńindạko taṛam idiketʼte setakʼ jokhecʼ Hebronteko seṭerena.
Santali Bible © Bangladesh Bible Society, 2021.