2 Samuel 1
1
Sạul ar Jonathanakʼ gujukʼ
1Sạulakʼ gujukʼ tayom Dạud do Amelekikoe bhagaoketʼkote Siglokteye ruạṛ hecʼena ar onḍe bar dine tahẽyena. 2Ar tesar hilokʼ Sạulren lạṛhại phạdkoakʼ ḍera khon mitʼṭen hoṛ do Dạud ṭhene hecʼena. Uniyakʼ kicricʼ do oṛecʼ oṛecʼ ar bohokʼre do dhuṛi tahẽkantaea. Uni do Dạud ṭhen hecʼkate otre ombakʼkateye ḍobokʼadea.
3Dạud do uniye kulikedea, “Am do oka khonem hecʼakana?”
Uni doe menkeda, “Iń do Israelkoakʼ ḍera khoniń ńir paskao hecʼakana.”
4Dạud do uniye kulikedea, “Cetʼ hoyakana? Ma lạiyạńme.”
Uniye menkeda, “Hoṛko do lạṛhại ṭạnḍi khonko dạṛakada. Ar ḍher hoṛgeko gocʼena ar Sạul ar Jonathan tạkin hõkin gocʼ ocoyena.”
5Okoe koṛa niạ khobore ạguletʼ Dạud do uniye kulikedea, “Cekatem baḍaekeda Sạul ar uniren hopon Jonathan tạkin hõkin gocʼena?”
6 #
1 Sam 31.1-6; 1 Bõs 10.1-6 Uni koṛa doe menkeda, “Iń do unre Gilboa reakʼ burureń tahẽkana ar Sạul do acʼakʼ borlomre ṭenḍarkateye teṅgo akan tahẽkana. Ar un jokhecʼ rãt gạḍi ar aswariko doko khudạu tiyokʼ idiyedekan tahẽkana. 7Uni do tayom secʼe ạcuren khan ińe ńel ńamkedeńteye hohowạdińa. Ar iń doń metadea, ‘hẽ minạńgea.’ 8Uni doe kulikedińa, ‘am dom okoe kana?’ Unreń metadea iń do mitʼṭen, ‘Amaleki hoṛ kạnạń.’ 9Uni doe metadińạ, ‘dayakate dela nonḍe hecʼkate, gojeń me, ente ạḍi bạṛicʼ iń sasetokʼ kana ar ńitokʼ hõ jiwetʼge minạńa.’ 10Onate iń do senkate uniń gocʼkedea. Enteń bujhạu daṛeada, uni do bae bańcaokʼa. Iń do uniyakʼ bohokʼ khon mukuṭ ar uniyakʼ ti reakʼ ṭoḍoriń bocʼketʼtaea ar ińren mạlik am ṭheniń ạgu akada.”
11Niạ katha ańjomkate Dạud ar uni sãoten hoṛko do akoakʼ kicricʼko oṛecʼketʼtakoa. 12Sạul ar uniren hopon Jonathan ar Probhu Isorren lạṛhại phạdkoren okoe Israelko lạṛhạireko gocʼen onko lạgitʼ onko do ạyupʼ hạbicʼko rakʼ homorkeda arko upạskeda.
13Ar okoeṭakʼ koṛa ona khobore ạguletʼ Dạud do uniye kulikedea, “Am do okaren hoṛ kanam?”
Uniye roṛ ruạṛkeda, “Niạ disạmre girobasokʼkan mitʼṭen porjạtren hopon, mitʼṭen Amaleki hoṛ kạnạń.”
14Dạud do uniye metadea, “Probhu Isore ojokʼ bahal akade hoṛ goje lạgitʼ ti tultam do cetʼ thoṛa hõ bam botorlena?”
15Dạud do acʼren mitʼṭen hoṛ hohoadeteye metadea, “Uni do gocʼ giḍikaeme.” Ar onate uni doe gocʼkedea. 16Dạud do unre uni koṛae metadea, “Amakʼ gujukʼ lạgitʼ dạyi dom amkangea, ente amakʼ moca kathage am upạrte gohae emeda, Probhu Isorren ojokʼ akade hoṛem gocʼ akadea mente.”
Dạud do Sạul ar Jonathanakʼ gujukʼ iạteye homor halaṅetʼkan
17Sạul ar uniren hopon Jonathan lạgitʼ Dạud do unre niạ homor halaṅ sereńe sereńkeda. 18#Josu 10.13Uni doe hukumkeda niạ sereń do jemon Jihudạ gusṭirenkoko cetʼ ocokʼ. Niạ sereń do Jasar ńutumanakʼ puthire ol akana.
19“E Israel,
Amren ṭhonokan hoṛ do
amakʼ ona usul jaegare
gocʼgeko giticʼakana.
Hae, birbanṭako doko marao utạrena!
20Gatre niạ khobor do alope lạiya,
ar Askelon reakʼ hor horte hõ
alope lại sodora;
arpe onkae khan Philisṭikoren hoponera doko
rạskạ joṅa,
onko bin khatna hoṛkoren hoponera doko
hulạs joṅa.
21E Gilboa reakʼ buruko,
apere sisir ar jạṛi dakʼ do alo baṛe ńurokʼma,
ape talare abal ot reakʼ anaj baṛgeko hõ
alo baṛe tahenma;
ente onḍege birbanṭa hoṛkoakʼ ḍhal
do bemanotakʼ hoyakana,
Sạulakʼ ḍhalre sunum ojokʼakʼ do
ar baṅ hoyokʼa.
22Gocʼ hoṛkoakʼ mãyãm
ar birbanṭakoakʼ jel baṅ ńamlen khan
Jonathanakʼ sar do baṅ ruạṛ hijukʼkan tahẽkana;
ar Sạulakʼ tarwaṛe hõ begor tirpitte
baṅ ruạṛ hijukʼkan tahẽkana.
23Jiwetʼ tahenre Sạul ar Jonathan do
dulạṛiạ ar bhage hoṛkin tahẽkana;
unkin do gujukʼre hõ bạkin begarlena.
Unkinakʼ tạpis do
pajhaṛ cẽṛẽ khon hõ tạpisge,
ar daṛe do dhạcri kul khon hõ bạ̃ṛtige tahẽkana.
24E Israelkoren hoponerako,
Sạul lạgitʼ rakʼjoṅpe.
Uni do damanakʼ
arakʼ kicricʼe horokʼ akawatʼpea,
apeakʼ kicricʼkore
abhrankoteye sajakatʼtapea.
25Hae, onko birbanṭa do lạṛhại talare
cetʼlekako marao cabayena!
Ona usul jaegare Jonathan doe gocʼ
bhindạṛ akana.
26Hae, Jonathan, ińren boeha!
Am lạgitʼ ińakʼ do maraṅ duktiń.
Ińren do tinạkʼ dulạṛiạ;
iń lạgitʼ amakʼ dulạṛ do
kuṛikoakʼ dulạṛ
khon hõ ḍherge tahẽkana.
27Hae, birbanṭako do cetʼlekako marao gotʼena,
ar onkoakʼ khanḍa bhanḍa hõ nosṭoyentakoa!”
Santali Bible © Bangladesh Bible Society, 2021.