1 Thessalonikikko 4
4
Isor kusi ocoye reaṅ
1Ado E boehako arhoń mena, Isor kusi ocoye lạgitʼ cetʼleka colon lek kan ona sikhạuna do ale ṭhen khonpe ńamakatʼgea, ar sạrige ape do onkagepe colonetʼ kana. Enhõ Probhu Jisu secʼte solha arle nehõrape kana jemon arhõ bạ̃ṛti onka lekape colon. 2Probhu Jisu ṭhen khon ạidạri ńamkate okakole hukum akawatʼpe ona dope baḍaegea.
3Isorakʼ monejoṅakʼ do noage, jemon sonotkope hoyokʼ, metakʼme sanam lekan loṭghuṭi khon sahaṛ akae tahenpe, 4-5ar okoe Isor bako baḍae akade onko boṅgan hoṛ jạtrenkoakʼ jel reakʼ sana leka do alope colona, bickom mimitʼko apnarakʼ hoṛmo sonot ar manot salakʼ sambṛao doho reakʼ cetʼ joṅpe. 6Noa babotre okoe hõ jemon jãhãe boeha behok lekate aloe ṭhokaye. Ale do laharegele lại akatʼpea arle sontorakatʼpea, noako behokakʼ iạtege Probhu Isor doe sạjạipea, 7ente Isor do be sapha lekate calakʼ lạgitʼ do baṅ, menkhan sonot lekate calakʼ lạgitʼgeye hohoakatʼ bona. 8Onate okoe noa cecetʼakʼ bae hetawakʼ uni do manwa do baṅ, bickom okoe acʼren sonot Jiue dan akawatʼpe uni Isorge bae hetawae kana.
9Boeha dulạṛ reaṅ olape do jãhãn jạruṛ bạnukʼtińạ, ente Isorge ape mimitʼko dupulạṛokʼe cetʼ akawatʼpea. 10Ape do sạrige Makedoniạ disạmren sanam boehakope dulạṛetʼkoa. Menkhan E boehako, ape ṭhen aleakʼ nehõr do noage, apeakʼ dulạṛ do arhõ sareṛokʼtape ma. 11Okaṭakʼle hukum akawatʼpe onka leka nindhạn jion khemaope, ar apnarakʼ kạmire jamaṛ akae tahente apnar tite mehnot reakʼ ahkaokʼpe, 12jemon apeakʼ noa bhage cạl-colon iạte bahreren hoṛko ṭhen manotpe ńam ar eṭakʼkore ṭehãḍokʼ reakʼ jạruṛ alo hoyokʼtape.
Probhu Isorakʼ ruạṛ hijukʼ
13E boehako, gocʼ akankoakʼ cetʼ hoyokʼ takoa ona reaṅ bin baḍaepe tahen do bale menjoṅ kana, jemon as bạnukʼtako hoṛko leka dukte alope hadosokʼ. 14Jisui gocʼlena are jiwetʼ beretʼena mente bon pạtiạukʼkanre abo do noa hõ bon pạtiạukʼ kana, okoe Jisu tulucʼ kolom mitʼkateko gocʼ akan Isor do onko hõ Jisu sãoteye idikoa. 15#1 Kor 15.51,52 Probhu Isorakʼ cecetʼakʼ lekatege apele lạiyape kana, okoe jiwetʼ menakʼ bon ar Probhu Isorakʼ ruạṛ hijukʼ hạbicʼ jiwetʼ bon tahen, abo do oka lekate hõ onko gocʼ akanko lahare oho bon calaolena. 16Ar ãṭ aṛaṅte hukum são sãote maraṅ utạricʼ goḍetakʼ hoho ar Isorakʼ siṅgạ reakʼ saḍe soṅgete Probhu Isor do serma khone pheḍ hijukʼa. Ar okoe Mạsi tulucʼ mitʼkateko gocʼ akan onkoge pạhilreko jiwetʼ beredokʼa. 17Ona tayom do okoeko jiwetʼ ar sarecʼ menakʼ bon, abo hõ sermare Probhu Isor sãote ńapamokʼ lạgitʼ onko tulucʼ rimilre bon rakapʼ ocokʼa. Ar nonkate abo do jaejug hạbicʼ Probhu Isor sãote bon tahena. 18Ona iạte noako kathate ape apere jiwi raṛejtape.
Santali Bible © Bangladesh Bible Society, 2021.