1 Thessalonikikko 3
3
1-2 #
Apos 17.15
Ale do tinre ar bale sahao daṛeada unre Athens nagrahare eskarge tahenle goṭaketʼte aleren boeha Timothile kolledea. Uni do Mạsi reaṅ bhage sombat lại jạhir kạmire Isorren sapʼdapʼicʼ kanae. Ale dole kolledea jemon apeakʼ biswạse kajak ocoytape are udgạu daṛeape, 3jemon noako duk ar sasetrepe paṛaolenre okoe hõ alope pạc ruạrokʼ. Ar ape hõpe baḍaegea, duk ar saset do abon lạgitʼ dohoakana. 4Duk saset do abore hijukʼgea ona katha do ape tulucʼ tahẽkan jokhecʼre bar barteń lạiyatʼpe tahẽkana, arpe baḍaegea, onkage hoyakana. 5Onate iń do tinre bạń sahao daṛeada unre pạtiạu secʼte oka dosare menakʼpe ona baḍae lạgitʼge Timothiń kolledea. Iń doń botorokʼkan tahẽkana, hoedaṛeakʼa Soetan do laloce udukʼakatʼpea ar aleakʼ sanam mehnot do ạuṛiyakʼ akantalea.
6 #
Apos 18.5
Ńitokʼ Timothi ape ṭhen khone ruạr hecʼen khan apeakʼ dulạṛ ar biswạs reaṅ bhage khoborgeye ematʼlea. Uni doe lạiyatʼlea jaoge ape do dulạṛ montepe disạyetʼlea, ar cetʼ lekale uihạretʼpe onkage ape hõpe uihạretʼlea. 7Onate E boehako, Timothiyakʼ moca khon apeakʼ pạtiạu reaṅ katha ańjomkate joto lekan haron ar kosṭorehõ ale do jiwi raṛecʼle ńam akada. 8Probhu Isorre apeakʼ pạtiạu kajak akae tahen khan ale do bhạgankole hoyokʼa. 9Ape khạtirte Isor samaṅre aleakʼ oka rạskạ, ona bodolte okalekate ape iạte unile sarhaoea ona do bale baḍaea. 10Ale do siń ńindạ Isorle nehõrae kana, jemon ape tulucʼle ńepel ńapam daṛeakʼ ar apeakʼ biswạsre oka reṅgecʼ menakʼtape onale purun daṛeakʼ.
11Ado aboren Isor Baba do acʼ ar aboren Probhu Jisu ape ṭhen calakʼ reakʼ hor jemone sạriạu ale. 12Ale cetʼlekale dulạṛetʼpe ṭhik onkage Probhu Isor hõ ape mimitʼkore jemon dulạṛe baḍhao ocoyte sareṛokʼtape. 13Enḍekhan uni do apeakʼ ontore kajak ocoytapea, jemon aboren Probhu Jisu do acʼren sanam hoṛko soṅgekateye hijukʼre ape do Isor Baba samaṅre niphuṭ ar sonotkope hoyokʼ.
Santali Bible © Bangladesh Bible Society, 2021.