যাত্রা 38
38
পুজ্যে-উৎসর্বর পূজো আর গাবালা
1বৎসলেলে পুজ্যে-উৎসর্বত্তেই বাব্লা তক্তালোই পাচ্ আত্ লাম্বা, পাচ্ আত্ পাদাজ্জ্যে আর তিন আত্ উজু গুরিনে এক্কো চের্কুন্যে পূজো বানেল। 2পূজোবো বানেবার্ অক্তত্ সিবের্ চের্কোণার তক্তানি এমন্গুরি চাজি ফেলা অলঅ যিয়েনত্যে চের্বো শিং বানা অলঅ। সেক্কে শিংসহ পূজোবো এক্কো গোট্টাল্ জিনিস অলঅ। 3সে পরেদি পিদোল্লোই পুরো পূজোবো বেড়েই দিয়্যে অলঅ। পূজোবোর্ ছেই ফেলেবার্ জাগা, বড়্ চামেচ্, উৎসর্বর লো রাগেবার্ কদরা, য়েরা তুলিবার্ কাদা চামেচ্ আর আগুন্ রাগেবার্ জাগা-বেক্কানি পিদোল্লোই বানা অলঅ। 4পূজোবোত্তেই পিদোল্লোই এক্কো কানা কানা পিলে, অত্তাৎ এক্কো জাল ধোক্ক্যেন বানা অলঅ। পূজোবোর্ চেরোকিত্তেত্তুন্ নিগিলি এচ্চ্যে তাগ তলে এই কানা কানা পিলেবো রাগা অলঅ। সেক্কে সিবে পূজোবোর্ তলেত্তুন্ ধুরি উগুরেন্দি মোধ্যে জাগানত্ রলঅ। 5লুদিক্কুন্ ভোরেবাত্তে পিদোলর্ সেই কানা কানা পিলেবোর্ চের্ কোণাত্ পিদোলর্ চের্বো হেবা বানা অলঅ। 6বাব্লা তক্তালোই দ্বিবে লুদিক্ বানা অলঅ আর সেই লুদিক্ দ্বিবে পিদোল্লোই বেড়েই দিয়্যে অলঅ। 7এই লুদিক্কুন্ হেবা ভিদিরেন্দি ভোরেই দিয়্যে অলঅ যেনে পূজোবো বুয়োই নেযেবার্ অক্তত্ লুদিক্কুন্ পূজোবোর্ দ্বিডাগেন্দি থান্। পূজোবো তক্তালোই বানা অলঅ আর সিবের্ ভিদিরেন্দিগান্ ফারক্ থেলঅ।
8পিদোল্লোই এক্কো গাবালা বানা অলঅ। যিদুক্কুন্ মিলে সেবা-কামত্তেই মিলন-তাম্বুলর্ দোরান ইদু এদাক্ তারার্ পিদোলর্ আনালোই সেই গাবালাবো আর তার্ আসনান্ বানা অলঅ।
থেবার্-তাম্বুলোর্ উদোনান্
9ইয়েনর্ পরেদি বৎসলেলে থেবার্-তাম্বুলোর চেরোকিত্তে উদোনর্ বেবস্থা গুরিলো। উদোনর্ দোগিণেদি একশত আত্ জাগাত্তে পাগেয়্যে মসীনা সুদোলোই কয়েক্কান পর্দা বানা অলঅ। 10সেই পর্দাগানি ঠাঙেবাত্তেই কুড়িবো খুদো বানা অলঅ। খুদোগুন্ বোজেবাত্তে পিদোলর্ কুড়িবো টেঙ বদঙ্ আর খুদোগুনোর্ লগে লাগেবাত্তে রূবোর্ হুক্ আর বানেদে-পাত বানা অলঅ। 11উদোনর্ উত্তোরেদি একশত আত্ জাগাত্তেয়ো কুড়িবো খুদো, খুদোগুন্ বোজেবাত্তেই পিদোলর্ কুড়িবো টেঙ-বদঙ্ আর খুদোগুনোর লগে লাগেবাত্তে রূবোর্ হুক্ আর বানেদে-পাত বানা অলঅ। 12উদোনর্ পোজিমেন্দি পঞ্চাশ্ আত্ জাগাত্তে কয়েক্কান্ পর্দা, দোশ্ছুয়ো খুদো, দশ্ছান্ টেঙ-বদঙ্ আর খুদোগুনোর্ লগে রূবোর্ হুক্ আর বানেদে-পাত বানা অলঅ। 13উদোনর্ পূগেন্দিয়ো অলঅ পঞ্চাশ্ আত্। 14-15সিদুগোর্ দোরানর্ দ্বিকিত্তেন্দি পনর আত্ গুরিনে লাম্বা পর্দা, তিন্নো গুরিনে খুদো আর তিন্নো গুরিনে টেং-বদঙ্ বানা অলঅ। 16উদোনর্ চেরোকিত্তে বেক্ পর্দানি পাগেয়্যে মসীনা সুদোলোই বানা অলঅ। 17খুদোগুন বোজেবার্ টেং-বদঙুন্ পিদোল্লোই বানা অলঅ। খুদোগুনোর লগে লাগেবার্ হুক্ আর বাঁনেদে-পাত্ রূবোলোই বানা অলঅ। খুঁদোগুনোর্ মাদাগুনো রূবোলোই বেড়েই দিয়্যে অলঅ। উদোনর্ বেক্ খুদোগুনত্ রূবোর্ বানেদে-পাত লাগা অলঅ।
18উদোনর্ দোরানত্তেয়ো এক্কান্ পর্দা বানা অলঅ। ইয়েন্ য়েল্, বিগুনি আর রাঙা রঙয়র্ সুদো আর পাগেয়্যে মসীনা সুদোর্ এক্কান্ নক্শা গোজ্যে জিনিস। এই পর্দাগান্ কুড়ি আত্ লাম্বা আর উদোনর্ অন্য পর্দা ধোক্ক্যেন পাঁচ আত্ উজু গুরি বানা অলঅ। 19এই পর্দাগানত্তে চের্বো খুদো আর চের্বো পিদোলর্ টেং-বদঙ্ বানা অলঅ। খুদোবোর্ হুক্ আর বানেদে-পাত্তানি রূবোলোই বানেই দিয়্যে অলঅ। খুদোবোর্ মাদাবোয়ো রূবোলোই বেড়েই দিয়্যে অলঅ। 20থেবার্-তাম্বুলর আর উদোন পর্দার্ খুদোগুন্ পিদোল্ দিইনে বানা অলঅ।
থেবার্-তাম্বুল বানেবার্ পযাপিরানির্ ইজেব
21থেবার্-তাম্বুল, অত্তাৎ সাক্ষ্য-তাম্বুলান বানাদে যেদক্কানি পযাপিরা লাক্ক্যে মোশির্ উগুম মজিম্ পোইল্যেত্তুন্ ধুরি ধর্মগুরু হারোণর্ পূঅ ঈথামরর্ পরিচালনায়্ লেবীয়োগুনে সিয়েনর্ ইজেপ্পান্ রাগেয়োন্। 22লগেপ্রভু মোশিরে যিয়েন্ বানেবাত্তে উগুম্ দিয়্যে সে উগুম মজিম্ যিহূদা-গুট্টির ঊরির পূঅ বৎসলেলে বেক্কানি বানেই দিলো। তে অলদে হূরোর্ নাদিন্। 23বৎসলেলরে এজাল্ দিয়্যেদে দান-গুট্টির্ অহীষামকর পূঅ অহলীয়াবে। তে অলদে আঢর্ কাম্ আর আড়ুক্ বানেবার্ কামত্ কাবিল্। ইয়েনবাদে তে য়েল্, বিগুনি আর রাঙা রংয়র্ সুদো আর মসীনা সুদোলোই নক্শা তুলিবার্ কামদ্অ কাবিল্ এলঅ।
24দোলন-উৎসর্বর বেক্কানিয়ে আস্তোশ সাদাত্তুর্ কেজি তিনশত গ্রাম সনা এই পবিত্র তাম্বুল-ঘরর্ কামত্যে বেবহার্ গরা ওইয়্যে। এই মাপ্পান্ এলঅ ধর্মীয় মাপ।
25-26মানেই গুণিবার্ অক্তত্ যিদক্কুন্ ইস্রায়েলীয়রে গোণা ওইয়্যে তারাত্তুন্ ধর্মীয় মাপ অনুসারে তিন আজার্ সতর কেজি সাড়ে সাতশত গ্রাম রূবো পাহ্ যেইয়্যে। বেক্কুনে মিলিনে ছয় লক্ষ তিন আজার্ পাচশঅ পঞ্চাশ্ জন মানেই গোণা ওইয়্যে। তারার্ পত্তিজনর্ বয়স এলদে কুড়ি বজর্ বা তাত্তুন্অ বেশ্। তারা পত্তিজনে ভাগত্ ধর্মীয় মাপ অনুসারে পাচ্ গ্রাম্ গুরি রূবো দুয়োন্। 27সিয়েনি ভিদিরে তিন আজার্ কেজি রূবো দিইনে থেবার-তাম্বুলান আর পর্দাত্তেই টেং-বদঙ্ বানেই দিয়্যে ওইয়্যে। এক এক্কান টেং-বদঙত্তেই ত্রিশ কেজি গুরি রূবো দিইনে বেক্কানিয়ে একশত্তুয়ো টেং-বদঙ বানেই দিয়্যে ওইয়্যে। 28আর বাগী সতর কেজি সাড়ে সাতশত গ্রাম রূবোলোই খুদোর্ হুক্, খুদোগুনোর্ মাদাগুন বেড়েয়্যে আর খুদোগুনোত্ বানেদে-পাত্তানিত্তে বেবহার্ গরা ওইয়্যে।
29দোলন-উৎসর্বত্তুন্ দ্বিআজার্ একশ চোব্বিশ কেজি পিদোল্ পাহ্ যেইয়্যে। 30সিয়েনিলোই তারা মিলন-তাম্বুলর্ দোরানত্তে টেং-বদঙ্, পিদোলর্ ডালিপূজো, পিদলোর্ কানা কানা পিলে আর বেক্ থাল্-বাজোনুন্ , 31চেরোকিত্তে উদোনর্ আর সিদুগোর্ দোরানিত্যে টেং-বদঙ্ আর থেবার-তাম্বুল আর চেরোকিত্তে উদোনর্ বেক্ খুঁদোগুন বানা ওইয়্যে।
S'ha seleccionat:
যাত্রা 38: CBT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright © 2021 Bangladesh Bible Society