MIKAH 7
7
An Hnabeidonghnak Cu Ruahchannak Ah Aa Thleng Ṭhan
1Aize! Theikung cungah thei
zeihmanh a hmu ti lomi le
Mitsur ruang ah a thei zeihmanh
a hmu ti lomi
rawlṭammi bantuk ka si ai cang.
Mitsur thei vialte le theipi a thaw
ngaingaimi cu
an lawh dih ai cang hna.
2Ram chungah lihchim lomi
miding pakhat hmanh an tang ti lo,
Pathian sin i zumhawktlak in
a ummi pakhat hmanh an um ti lo.
An dihlak in an thi dih ai.
Zeitik ah dah lainawnnak
caan ṭha ka hmuh lai ti lawng kha
an bawh cio ko,
Sakaptupa nih a rap chungah foih
awkah sa a hot hna bantukin,
u le nau kha pakhat le pakhat
i foih awkah an i hot.
3Ṭhat lonak tuah kha a thiam
ngaingaimi an si dih.
Bawi nih si hna seh, biaceihtu nih
si hna seh, ziknawh kha an duh dih.
Nawl ngeimipa nih khan a duhnak
kha a chimh hna i hmunkhat ah
khua an khang ṭi.
4An lak i miṭha bik hna le lihchim
lo bik hna hmanh kha hlingbur
bantuk an si.
Pathian nih dan kan tat hna lai tiah
ralrinnak a pek cang hna bangin
Mi cu dan a tat hna lai ni kha
a phan cang.
Annih cu vansang au in an um
dih lai.
5Na innpa kha va zum hlah,
na hawikom zong
vaa bochan hlah.
Na nupi sin i na chimmi hmanh
kha vaa ralring.
6Zeicahtiah hi caan ah hin cun
fapale nih an pale kha
an thangchiat hna i
fanule nih an nule kha
an doh hna;
Fapa hna nupile nih an vale nu kha
an doh hna i cucaah an ral hna cu
anmah innchungkhar mi lila kha
an si. #Mat 10.35-36; Luk 12.53
7Sihmanhsehlaw kei cu Bawipa kha
ka kawl lai,
Ka khamhtu Pathian cu ka hngah lai,
Ka Pathian nih cun a ka theih lai.
8Maw ka ral hna, ka cungah
nan diriam hlah u;
Ka tlu cang, sihmanhsehlaw ka tho
ṭhan lai;
Atu cu muihnak chungah ka um,
sihmanhsehlaw Bawipa nih ceunak
a ka pek lai.
9 Bawipa cungah cun ka sual cang,
cucaah a thinhunnak cu tu
caan tlawmte chung cu ka in lai.
Sihmanhsehlaw a donghnak ah cun
keimah kha a ka ṭanh lai i ka cung i
ṭhat lonak an tuahmi vialte kha
ding tein a tuah ṭhan dih lai.
10Khi tikah, “Bawipa na Pathian cu
khuazei ah dah a um?” tiin
nehsawh zawmhtaih in a ka timi
ka ral hna nih khan an vun hmuh
lai i an ning a zak lai.
Annih cu an sungh i lam i
nawncek lakah lamhchih
an si kha ka hmuh hna lai.
11Jerusalem mi hna, nan khua
ralhau remh ṭhannak caan cu
a phan lio cang.
Khi caan ah nan ram cu kauh a si lai.
12Nan mi hna cu a kenkip in nan sinah
an ra kir lai — nichuahlei ah
Assiria in, thlanglei ah Izipt ram in,
a hlatnak rili in le tlang kip in
an ra kir lai.
13Sihmanhsehlaw vawlei cu a cung i
a ummi minung hna ṭhat lonak
ruangah khan thetse ram ah
a cang lai.
14Bawipa, na mi na thimmi hna hi
nangmah nih khal hna.
Annih cu anmah lawngin ramlak ah
khan an um i ram hninghno nih
khan a kulh hna.
Hlan liopi ah an rak tuah bantuk khan
Bashan le Gilead i a ummi ramhno
lakah cun kalter hna law
tlonter hna.
15Izipt ram in na rak chuah tikah
khuaruahharnak na rak tuah bantuk
khan kan caah khuaruahharnak
kan tuahpiak tuah.
16Miphun dang hna nih khan hmu hna
seh law an thazang an i bochanmi
kha ṭhawng ko hmanh seh law
an thinphang hna seh;
An kaa kha i cip hna seh law
an hna kha i phit hna seh,
17Rul bantukin leidip kha liak hna
seh law
Vawlei i a lawn in a lawnmi thilnung
bantukin vawlei kha ei hna seh.
Annih nih an ralhau chung khan
ther lengmang le phang lengmang
in hung chuak hna seh law
nangmah cu in ṭih hna seh,
Maw Bawipa kan Pathian.
18Bawipa, nangmah bantuk Pathian
ahodah a um?
Nang nih cun kan ṭhat lonak kha
na kan ngaihthiam i na mi a tangmi
hna kan sualnak kha na lanhtak,
Na thinhunnak kha a zungzal in
linhter loin,
Aa thleng lomi na dawtnak tu kha
na kan hmuhsak.
19Kan cungah zaangfahnak kha
na ngei ṭhan ko rih lai i,
Kan ṭhat lonak kha na ṭawl lai i
kan sualnak kha a thukmi
rili tawne ah na hlonh lai.
20Kan pupa hna sinah chiatser in
bia na rak kam cang bantuk khan,
Na mi Israel mi kan cungah hin
zumhawktlak na sinak kha
na langhter lai i
kannih Abraham tefa hna hi
aa thleng lomi na dawtnak kha
na kan hmuhter lai.
S'ha seleccionat:
MIKAH 7: HCL06
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Lai (Hakha) Common Language Bible © Bible Society of Myanmar 2006