Santiagos 1
1
Tashches voryedyeꞌ Santiagos muꞌ
1Yụ nash Santiago, úñity Jenꞌtyiꞌ muꞌ judyeyaꞌ Jesucristoty muꞌ, Ayoꞌ tsun. Yụ nash vorjeyac miꞌin yiriꞌtac päräꞌ jiyity ñuruꞌtyity miꞌin Israeltyiꞌ vóshiꞌ miꞌin, räj meꞌsiꞌdye miꞌin anicjetintety Jenꞌ miꞌin, räj buꞌyity ọij jac, yụ vorjeyac miꞌin.
Dyijyedyeꞌ soꞌmisinꞌsiꞌ Jenꞌ
2Vojity, yụ jéyac miꞌin, meꞌ tsanꞌ jụꞌñis ĉụiꞌ yịjyi ñịbedyes jịꞌĉojtiñeꞌyaꞌ miꞌin, maꞌjodyeꞌtum ramꞌ jiꞌcajñetiñeꞌ. 3Miꞌin aty chịj muꞌ Jenꞌ ñịbedyesyaꞌ chäyibunac anicyedyeꞌ miꞌin. Jam farajjecajcatiñeꞌ mọꞌ anicyedyeꞌ miꞌin, jịꞌĉojtiñeꞌyaꞌ miꞌin mọꞌ ñịbedyes, mọꞌyaꞌ raꞌ chịj miꞌin tyumꞌchutidyeꞌtum bäꞌyi miꞌin. 4Jam raꞌ damꞌ farajjetiñeꞌ tyumꞌchutidyeꞌ miꞌin, meꞌ bäꞌyi jụijyaꞌ miꞌin, chat qui raꞌ jam jụꞌñiij Jenꞌsiꞌyaꞌ vej miꞌin, mijam qui raꞌ jayej ferdyeꞌ miꞌin chimeꞌ paj qui rụij bäꞌyi Jenꞌdyes miꞌin.
5Pạrej mọꞌyaꞌ tacaꞌ jayej dyijyedyeꞌ miꞌin, jemoñeꞌ cọdyetinte Jenꞌ, chat qui raꞌ muꞌ soꞌminac dyijyedyeꞌ rụijsis. Muꞌ soꞌmacsi räj muntyiꞌ in, mijam damꞌ quijatutacsi dyijyedyeꞌ soꞌmacsi, mijam chimeꞌ fạraꞌjeĉunacsi muꞌin cọdyetety in. 6Jemoñeꞌ qui namꞌ anicyedyeꞌtum cọdyetinteyaꞌ muꞌ Jenꞌ, mijam raꞌ yoc dyijyi miꞌin, ĉaĉaij na jam anicyedyeꞌtum cọdacdyeꞌ jụijyaꞌ tsun, jeñej raꞌ vacamꞌquis pufej, junaꞌ ĉụiꞌ jịjcaiꞌ cạiꞌ tyiꞌmu, meꞌ raꞌ shupquejaꞌ tsun, yoc yoc dyijyejaꞌ jụijyaꞌ tsun. 7Tyi chuc meꞌ dyijyity, muꞌ raꞌ jam junꞌ jụjtac Ayoꞌyaꞌ, 8ĉaĉaij na jam yiris mọmoꞌ dyijyedyemꞌ, cäts mạyedyeꞌ jịjcaiꞌ yocsiꞌ yocsiꞌ dyijyedyeꞌ cạiꞌ muꞌ.
9Muꞌin ñịbety anicjetety Jenꞌ in, tupuj qui namꞌ maꞌjodyeꞌtum bäꞌyi in, ĉaĉaij na muꞌ Jenꞌ mujuꞌchaꞌ yụꞌtacsi. 10Muꞌin na jedyeꞌtumtyiꞌ anicjetety Jenꞌ in, meꞌ tsanꞌ uyaꞌyaꞌ yụꞌtacseban Jenꞌ, tupuj qui namꞌ maꞌjodyeꞌtum bäꞌyi in. Jeshaꞌ, muꞌin jedyeꞌtumtyiꞌ muntyiꞌ in, räj meꞌchuiꞌsiꞌ jedyeꞌ in, mọꞌ jeñej buꞌyiꞌ däräs jáme mọꞌin, meꞌtuquimꞌ jiꞌcavitimꞌ judyeyaꞌ qui räj viritimꞌ. 11Aty areꞌyechuij jụijyaꞌ muꞌ tsun, q̂uinꞌdyemꞌ subinꞌyejoiꞌ däräꞌsiꞌ jáme mọꞌ, chat qui jọꞌchaiꞌ mọꞌ, meꞌquiꞌdye veꞌej mọꞌ. Meꞌ raꞌ chimeꞌ muꞌ jedyeꞌtumtyiꞌ muntyiꞌ, meꞌ tsanꞌ fer carijtaqui, vatyquej raꞌ mọmoꞌ mọtsi muꞌ mọꞌtumdye jedyeꞌ muꞌ.
Jịꞌĉojtacdyeꞌ tsun judyeyaꞌ jiꞌpenacdyeꞌ tsun
12Anic maꞌjoij muꞌin jam peñity in jịꞌĉojtyeꞌyaꞌ in ñịbedyes. Aty meꞌsiꞌ jiꞌcajñeꞌyaꞌ in mọꞌ, Jenꞌ qui raꞌ yụꞌtacsi paj qui muꞌyaꞌ bäꞌyi in, mọꞌ raꞌ bijodyeꞌ muꞌin soꞌmacsis raꞌ Jenꞌ yódyetydyemꞌ mạꞌjetety u in. 13Junꞌsiꞌ chuc ayijyaꞌ jiꞌpenacdyes dyijyedyeꞌ, jam raꞌ yi miꞌin: "Jenꞌdye meꞌ soꞌmin yụ meꞌdyes mọꞌ jịꞌĉojtyeꞌ yụ", jam raꞌ meꞌ yi miꞌin. Muꞌ Jenꞌ jam tupuj joꞌmesyaꞌ jiꞌmaꞌyac aꞌc̣hisyaꞌ dyijyedyeꞌ, mijam muꞌ chimeꞌ joꞌmesyaꞌ jiꞌmaꞌyeyacsi aꞌc̣hisyaꞌ dyijyedyeꞌ. 14Jiꞌmaꞌyisinꞌ aꞌc̣hisyaꞌ dyijyedyeꞌ jụijyaꞌ tsun, mọꞌ jam yocves jijtuiꞌ dyijyedyeꞌ, ĉụiꞌtyiꞌĉan ĉojtyiꞌ tsun mọꞌĉan naꞌiꞌ. 15Jämꞌtujcacajaꞌ jụijyaꞌ tsun mọꞌ aꞌc̣his dyijyedyeꞌ tsun, chat qui raꞌ meꞌĉandye juchayejaꞌ, a na jiijjaꞌ juchayejaꞌyaꞌ, chat qui raꞌ ayij mọꞌ sänꞌdyeꞌ.
16Vojity mạꞌjeyacdyety yụ, jam raꞌ yirity ĉụiꞌ väñätuti miꞌin. 17Räj mọꞌ ñịbeꞌyedyes jämꞌsiꞌ meꞌchujaꞌsiꞌ tsun, räj mọꞌ mạyedyeꞌches jijtuiꞌ, Jenꞌ nash ñịbeꞌjisinꞌ tsun, muꞌ jämꞌtyety mạyedyeꞌches mạijyis. Muꞌ nash räjĉan buꞌyi, mijam damꞌ yocve dyijyi muꞌ, muꞌ Jenꞌ jam jeñej mạyedyeꞌches mạijyis in, pạrej jam mạijchusinꞌ in, muꞌ na Jenꞌ räjĉan muꞌ mạijchusinꞌ. 18Muꞌ Jenꞌ ĉụiꞌsiꞌyaꞌ dyijyedyeꞌ muꞌ tsạꞌchusinꞌ judyeyaꞌ chimeꞌ ạvatusinꞌ tsun anicyedyeꞌyaꞌ rụijsis p̂eyacdyeꞌ muꞌ, judyeyaꞌ chimeꞌ tsimꞌsinꞌ paj qui tsun tashcheꞌ buꞌjaꞌ yuꞌsinꞌ muꞌ, jam jeñej yoctyiꞌ in.
Rụijsis cäc̣häꞌchucdyeꞌ muꞌ Jenꞌ
19Mạꞌjeyacdyety vojity yụty miꞌin cavintum seꞌvaĉamꞌ miꞌin, jam qui na ramꞌ tashcheꞌ tashcheꞌyi p̂eyaqui miꞌin, mijam raꞌ cavintum fạ́coij tyeij miꞌin. 20Tyi chuc fạ́coij tyeijtyiꞌ jụijyaꞌ in, muꞌin meꞌtyity in mijam méquiꞌ jịꞌcätsepte in rụijsis dyijyedyeꞌ Jenꞌsiꞌ muꞌ. 21Farajjevac yiristum mọꞌ aꞌc̣his dyijyedyeꞌ miꞌin, jam raꞌ ac̣hiꞌ bäꞌyi miꞌin. Jämꞌtyiꞌtum ĉojtyiꞌ jụjjebimac Jenꞌsiꞌ p̂eyacdyeꞌ muꞌ, mọꞌ yuꞌtyiyinacsiꞌ ĉojtyiꞌĉan miꞌin, mọꞌ ferdyeꞌtumsiꞌ mọꞌ tupuj jiꞌc̣honnac miꞌin.
22Jam seꞌvac mọmoꞌ mọꞌ p̂eyacdyeꞌ, jemoñeꞌ chicac, seꞌvetiñeꞌ jụijyaꞌ mọmoꞌ miꞌin, ĉụiꞌsiꞌ väñädyeꞌ shupqui miꞌin. 23Tyi chuc seꞌvaquity mọmoꞌ tsanꞌ mọꞌ p̂eyacdyeꞌ Jenꞌsiꞌ muꞌ, jam qui namꞌ chiquepteyaꞌ, muꞌ meꞌtyity jeñej yirity muntyiꞌ ĉụiꞌ cavitity espejoĉan. 24Ĉụiꞌ caviti vejyaꞌ, aty meꞌsiꞌ camanꞌjebanꞌ, mijam damꞌ dyijyeban jụꞌñiij chuc vejyaꞌ jiquej, meꞌ buꞌyi muꞌ muntyiꞌ jam chiqueꞌtyiꞌ p̂eyacdyeꞌ Jenꞌsiꞌ. 25Muꞌ na jämꞌ chiqueꞌtyiꞌ jụijyaꞌ mọꞌ rụijsis p̂eyacdyeꞌ Jenꞌsiꞌ muꞌ, mọꞌ jiꞌfarajjiyisinꞌsiꞌ, muꞌ jämꞌ chiquety jätäjyiꞌ chuc mọꞌ, judyeyaꞌ jam farajjeꞌ, muꞌ raꞌ Jenꞌ jañutyiti räj jedyeꞌ chuc junꞌtaquiyaꞌ.
26Tyi chuc anic jämꞌ cạptety jiꞌchäyitidyeꞌ Jenꞌsiꞌ muꞌ, meꞌ ĉúti jụijyaꞌ muꞌ, jam qui namꞌ ĉọjcaqui nem jụijyaꞌ ĉụiꞌsimꞌ, fibis raꞌ shupquiꞌ jiꞌchäyitidyeꞌ cạiꞌsiꞌ muꞌ. 27Muꞌ Jenꞌ Ạvatusinꞌtyiꞌ tsun, muꞌ mạꞌjeꞌ paj qui tsun rụij cạpja jiꞌchäyitidyeꞌ muꞌ mijam cäj, meꞌ mạꞌjeꞌ muꞌ paj qui tsun nọ́tacsejaꞌ muꞌin säntaquity jenꞌ in judyeyaꞌ tseꞌ muꞌin judyeyaꞌ mọꞌin p̂en in säntaquis vämtyis in, mọꞌin ñịbeꞌ cạves in. Chimeꞌdye muꞌ Jenꞌ mạꞌjeꞌ paj qui jam ĉụiꞌ ac̣hiꞌtiĉaꞌ tsun aꞌc̣hisyaꞌ dyijyedyeꞌ jacches.
S'ha seleccionat:
Santiagos 1: CAS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'