Hebreodyes 13
13
Meꞌ raꞌ maꞌjotac tsun Jenꞌyaꞌ
1Yejĉovac vaj meij mạꞌjitiĉam, ĉaĉaij na vaj vojity atsvun miꞌin. 2Jiꞌdyäcacsejamꞌ acaꞌĉan miꞌin muꞌin yocve atsijtyiꞌ in ĉucnactyiꞌ in, tiĉunacsejamꞌ. Muꞌyaꞌ pạrej meꞌ jiꞌdyäcacsi anjer jiquej in, jeñej muntyiꞌ ĉọcsi in.
3Chimeꞌdye dyijtucsejamꞌ muꞌin ĉärꞌtactyiꞌ in, jeñej qui miꞌinmun jụijyaꞌ ĉäꞌräij, meꞌ dyijtucsejamꞌ. Dyijtucsejamꞌ chimeꞌ muꞌin jịꞌñibeꞌcactyiꞌ in, jeñej qui miꞌinmun jụijyaꞌ jịꞌñibeꞌcac, meꞌ buꞌyi raꞌ dyijtucsi miꞌin chimeꞌ muꞌin in.
4Ạ̈räjjevac vämedyeꞌ räj miꞌin, jam raꞌ majmadyes yụꞌtiñeꞌ, mijam raꞌ méquiꞌ voꞌvoij miꞌin, ĉụiꞌsiꞌtum ramꞌ p̂en bäꞌyi miꞌin. Jenꞌ nash raꞌ soꞌmacsi vaꞌtacdyeꞌ tyi chuc meꞌ jämꞌtaquity voꞌvodyeꞌ in.
5Jam raꞌ fer dyijtutinte querec̣ha, jedyeꞌ chuc damꞌ meꞌchutiñeꞌ jụijyaꞌ miꞌin, säcsedyeꞌ judyeyaꞌ quịꞌsiꞌ mọꞌ ramꞌ maꞌjotyetiñeꞌ, ĉaĉaij na Jenꞌ yi meꞌ: "Yụ raꞌ jam junꞌ farajjeye mijam raꞌ fitupjeye." 6Mọꞌdyes sóñiꞌyedyeꞌtum, yéjaꞌ:
"Muꞌ Ayoꞌ yụ muꞌ ñutsjityintyiꞌ yụ,
mọꞌdyes aty raꞌ jam noiꞌyedyeꞌtum bäꞌyi yụ,
mijam raꞌ quijnacsi muntyiꞌ yụ."
7Chimeꞌdye dyijtucsejamꞌ muꞌin ĉujcanactyiꞌ jiquej in, muꞌin jínactyiꞌ in Jenꞌsiꞌ p̂eyacdyeꞌ muꞌ. Dyijtucsebijamꞌ dyijyedyeꞌ muꞌin, junꞌ chuc Jenꞌdyes bäꞌyi jiquej in, meꞌdye jadyic jiquej in. Jịjcatacsebijamꞌ anicyedyeꞌvun muꞌin, junꞌ chuc fer anicjise Jenꞌ jiquej.
8Muꞌ Jesucristo muꞌdye nash muꞌ jiquej, muꞌdye q̂uinꞌ judyeyaꞌ muꞌdye raꞌ yejĉoij, jam raꞌ yoc dyijyi. 9Jam raꞌ seꞌvetiñeꞌ miꞌin yịjyi cäjmunsiꞌ jiꞌchäyitidyeꞌ in yocsiꞌ in. Pạrej muꞌyaꞌ cäj jịꞌchiyacsi in, mọmꞌ p̂eyeꞌ in jibitidyes muntyis tsun, yi in jam raꞌ tupuj pạrej jibitidyes jebejaꞌ tsun. Ọij jiꞌchäyitidyeꞌ muꞌin jam méquiꞌ ñútyisinꞌ paj qui rụij bäꞌjaꞌ Jenꞌdyes tsun. Damꞌdye jämꞌ paj qui muꞌ Jenꞌ fer buꞌyi yuꞌbusinꞌ ĉojtyiꞌ tsun ñịbeꞌjitidyesyaꞌ muꞌ.
10Tsunsiꞌ na q̂uinꞌ mọꞌyaꞌ tucdyeꞌ juchadyes tsun jam jibitidyes, tucdyeꞌ buꞌyi muꞌ Jesucristo, jam muꞌindyes in cudyititydyes Jenꞌcheꞌ in, muꞌin tacaꞌ yejĉoij cạiꞌtyiꞌ in tashches jiꞌchäyitidyeꞌ. 11Jeshaꞌ muꞌ tashcheꞌ cudyitity Jenꞌcheꞌ jiquej muꞌĉan siti Jenꞌsiꞌĉan acaꞌ muꞌ, cuꞌdyes chäsh cạbiꞌ juchadyes muntyidyes in, mọꞌ qui namꞌ aꞌ mọꞌ jorojyaꞌ mọꞌ bäꞌyedyeꞌ jiꞌcoꞌshayac. 12Meꞌ buꞌyidye muꞌ chimeꞌ Jesús ijac jiquej jorojyaꞌ mọꞌ bäꞌyedyeꞌ, ĉụiꞌsiꞌyaꞌ chäsh muꞌ c̣hiconꞌjibusinꞌ juchaj muntyis tsun. 13Jemoñeꞌ tsun chimeꞌ q̂uinꞌ jorojyaꞌ bäꞌyedyeꞌ jịjcajaꞌ ĉọcja Jesús,#13:13 Ọij yiꞌ p̂eyacdyeꞌ: "jorojyaꞌ mọꞌ bäꞌyedyeꞌ jịjcajaꞌ", mọꞌ cạiꞌ junꞌ chuc raꞌ tsun farajjeyacsebijaꞌ muntyis dyijyedyeꞌ muꞌin judyeyaꞌ urucyas jiꞌchäyitidyeꞌ muꞌin paj qui Cristo cäc̣häꞌchuja. meꞌ tsanꞌ ñinacdyeꞌ jịꞌcayisinꞌ in yojdyemꞌ muꞌ jiquej u, cäc̣häꞌchuja qui na ramꞌ tsun. 14Ọ́cheꞌ jacches itŝiꞌ méquis jam mọtsis bäꞌyedyeꞌ tsundyes. Jemoñeꞌ bisjaꞌ chum yocsiꞌ bäꞌyedyeꞌ, yócheꞌdyemꞌ raꞌ bäꞌjaꞌ u tsun. 15Jemoñeꞌ räjĉan timaꞌqueja Jenꞌ, Jesucristoyaꞌ timaꞌqueja. Mọꞌ timaꞌcacdyeꞌ chụꞌĉansiꞌ shupquiꞌ tsun, mọꞌ jeñej buꞌyiꞌ tucdyeꞌ muꞌdyes jiꞌcoꞌshayacdyeꞌ, meꞌ buꞌyiꞌ shupquiꞌ mọꞌ timaꞌcacdyeꞌ tsun. 16Yejĉoij raꞌ jämꞌyedyeꞌtum nọ́tacsi miꞌin, soꞌmacsejamꞌ jedyeꞌ chuc jayej muꞌin. Mọꞌ nọ́tacdyeꞌ jeñej buꞌyiꞌ tucdyeꞌ jiꞌcoꞌshayacdyeꞌ Jenꞌdyes, meꞌ buꞌyis muꞌ maꞌjotyeꞌ.
17Seꞌvacsebijamꞌ p̂eyacdyeꞌ muꞌin, muꞌin ĉujcanactyis in, chicacsejamꞌ chimeꞌ, ĉaĉaij na muꞌin ĉujcabunactyiꞌ ĉojtyiꞌ miꞌin, jam jịꞌjutyiti in. Jenꞌdye raꞌ cọdyetacsi p̂eyacdyeꞌ muꞌin junꞌ chuc ĉọjcacdyeꞌ muꞌinsiꞌ in. Seꞌvacsebi p̂eyacdyeꞌ jụijyaꞌ miꞌin, muꞌin raꞌ maꞌjodyeꞌtum ĉujcanac in, jam qui namꞌ seꞌvacsebi p̂eyacdyeꞌ jụijyaꞌ miꞌin, táredyeꞌtum raꞌ ĉujcanac in, vatyquej raꞌ vaꞌtacdyeꞌ cạtiñeꞌ miꞌin chimeꞌ.
18Jẹjcavac cọdyemac Jenꞌ tsundyes miꞌin. Ĉụiꞌ tsun chäyiti ĉojtyiꞌĉan tsun, anic rụij cạiꞌ tsun, mọꞌdyes mạꞌjeꞌ räjĉan rụij bäꞌyi tsun. 19Yụ nash ferdyeꞌyaꞌ jéyac miꞌin, cọdyemac Jenꞌ yụ́dyes paj qui cavin jutin yụ muꞌ Jenꞌ miꞌinyaꞌ.
Pablos cọdacdyeꞌ Jenꞌcheꞌ judyeyaꞌ voryetacdyeꞌ muꞌ
20Yụ cọdyete Jenꞌ, muꞌ soꞌmisinꞌtyiꞌ maꞌjodyeꞌ ĉojtyiꞌĉandyesiꞌ tsun, muꞌ vañinjebajtety Ayoꞌ tsun Jesús. Muꞌ Jesús Ayoꞌ tsun tashcheꞌ buꞌyi Ĉujcasinꞌtyiꞌ tsun jeñej buꞌjaꞌ oveca muꞌ, ĉụiꞌsiꞌyaꞌ chäsh muꞌ ferdyeꞌ soꞌmepte p̂eyacdyeꞌ Jenꞌsiꞌ muꞌ, mọꞌ tsundyes, mọꞌ raꞌ jam jụꞌñisĉan mạyedyeꞌ mọtsis muꞌ. 21Muꞌdye Jenꞌ cọdyete yụ paj qui muꞌ soꞌminac jedyeꞌ chuc tacaꞌ jayej dyijyedyeꞌ ĉojtyiꞌĉan miꞌin, tupuj qui cạptinte Jenꞌsiꞌ dyijyedyeꞌ muꞌ. Meꞌ cọdyete yụ paj qui muꞌ Jesucristo soꞌmisinꞌ ferdyeꞌ paj qui rụij bäꞌjaꞌ tsun, judyeyaꞌ qui raꞌ maꞌjotac Jenꞌyaꞌ tsun. ¡Räjĉan raꞌ timaꞌqueja muꞌ Cristo, paj jam jụꞌñisĉan mạyedyeꞌ mọtsiꞌ timaꞌcacdyemꞌ! ¡Paj meꞌ!
22Vojity, yụ ferdyeꞌyaꞌ jéyac miꞌin paj qui tyumꞌchutidyeꞌtum seꞌvibutiĉaꞌ miꞌin ọij miquiꞌyas sánacdyeꞌ sáñeꞌ yụ miꞌindyes q̂uinꞌ. 23Yụ mạꞌjeꞌ jéyac miꞌin aty jiꞌshupcac ĉärꞌtaquisĉantyiꞌ muꞌ vojity tsun Timoteo. Atsijban cavin jụijyaꞌ muꞌ, muꞌtum raꞌ yụ ĉọcyac miꞌin.
24Vorjeyacsejamꞌ muꞌin ĉujcanactyiꞌ in, judyeyaꞌ räjtumdye muꞌin anicjetety Jenꞌ in. Muꞌin Italiaĉantyiꞌ in vorjinac chimeꞌ in.
25Yụ cọdyete Jenꞌ paj qui muꞌ soꞌminac ñịbeꞌjitidyes räj miꞌin.
S'ha seleccionat:
Hebreodyes 13: CAS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'