Hebreodyes 11
11
Anicyedyeꞌ
1Meꞌ shupquiꞌ mọꞌ anicyedyeꞌ tsun. Anicyejaꞌyaꞌ Jenꞌcheꞌ tsun aty chị́jaꞌ anic raꞌ soꞌmac tsun mọꞌ bisjaꞌsiꞌ tsun, chimeꞌdye anicyedyeꞌ jiꞌchäquiyisinꞌ meꞌ tsanꞌ jam cạvepja Jenꞌsiꞌ jedyeꞌ muꞌ, mọꞌyaꞌ qui namꞌ muꞌ. 2Chimeꞌdye muꞌin urucyaꞌmuntyiꞌ jiquej in maꞌjotac Jenꞌyaꞌ in anicyedyeꞌyaꞌ muꞌin.
3Anicyedyeꞌyaꞌ tsun chị́jaꞌ junꞌ buty muꞌ Jenꞌ p̂eyacdyeꞌyaꞌ muꞌ jämꞌtyeꞌ ọij jac judyeyaꞌ mạyedyeꞌ jiquej. Räj jämꞌtacdyeꞌ muꞌ cạvejas q̂uinꞌ, jam jorojĉansiꞌ jedyeꞌ jämꞌtacsaque jiquej muꞌ.
4Anicyedyeꞌyaꞌ muꞌ Abelsiꞌ, mọjoꞌchas mus jämꞌsiꞌ tucdyeꞌ muꞌ soꞌmete Jenꞌ, jam jeñej Caínsiꞌ tucdyeꞌ muꞌ, ọyaꞌyaꞌ. Anicyedyeꞌyaꞌ muꞌ Abel, Jenꞌ rụij jayuꞌti judyeyaꞌ jamaꞌjotyibuti tucdyeꞌ muꞌ. Meꞌ tsanꞌ itŝij q̂uinꞌ muꞌ Abel, p̂eyacdyeꞌdyety mọꞌyamꞌ, mọꞌ tucdyeꞌ muꞌ mọꞌ jorojĉanjisinꞌ anicjete Jenꞌ muꞌ.
5Meꞌdye muꞌ chimeꞌ Enoc anicyedyeꞌyaꞌ muꞌ rụiꞌcuꞌ cạc mạyedyeꞌcheꞌ, jácabun Jenꞌ. Mijam muꞌ säñi mijam tyi dạĉajte úcheꞌ jaccheꞌ in, ĉaĉaij na memꞌ rụiꞌquenꞌ moñi, Jenꞌ jácabun. Yiꞌ sánacdyeꞌ jambiꞌdyemꞌ jácabunyaꞌ muꞌ, tashcheꞌ jamaꞌjotyiti Jenꞌ. 6Jam anicyejaꞌ Jenꞌcheꞌ jụijyaꞌ tsun, jam raꞌ junꞌ maꞌjotac Jenꞌyaꞌ tsun. Mạꞌjeꞌ c̣hẹiꞌyaꞌjeja Jenꞌ jụijyaꞌ, jemoñeꞌ tashcheꞌ chum anicjeja junꞌ chuc muꞌ muꞌyaꞌ, junꞌ chuc soꞌmacsi bijodyeꞌ muꞌin fer dyijtutety in.
7Meꞌdye muꞌ Noé chimeꞌ anicyedyeꞌyamꞌ chiquepte Jenꞌsiꞌ p̂eyacdyeꞌ muꞌ, mọꞌ jasoꞌmitis jiquej, yiꞌ junꞌ chuc raꞌ ayij mọꞌ bänedyeꞌ. Meꞌ tsanꞌ jambiꞌ mọꞌ jorojĉan cạveꞌ jiquej, jäꞌmiij muꞌ tashcheꞌ jämꞌte covamba, muꞌcheꞌ c̣hoñi muꞌ räjtumdye chätidyeꞌ muꞌ. Anicyedyeꞌyaꞌ muꞌ Noés, Jenꞌ rụij jayuꞌti judyeyaꞌ chimeꞌ soꞌmacsi vaꞌtacdyeꞌ jacchety muntyiꞌ in, räj p̂uti in ojñiꞌĉan in.
8Chimeꞌdye muꞌ Abraham anicyedyeꞌyaꞌ muꞌ chiquete Jenꞌ, yoquiꞌdyemꞌ jafaijtiyaꞌ jiquej u, yocsiꞌve qui jac jịjcaij, mọꞌ jasoꞌmitis raꞌ Jenꞌ. Anicjete muꞌ, farajjeyactaqui ĉụiꞌsiꞌ jac muꞌ, sacjeꞌ muꞌ, mijam chịj junꞌve chuc raꞌ jịjcaij muꞌ. 9Anicyedyeꞌyaꞌ muꞌ, bäꞌyi yoctyisĉan jac in, jam ĉụiꞌsimꞌ, mọꞌ Jenꞌ jasoꞌmitis yódyes jajitidyemꞌ tashcheꞌ jiquej u, yi: "Yụ raꞌ soꞌmeye." Yóĉandyemꞌ bäꞌyi u quịꞌsiꞌ acaꞌ muꞌ, mọꞌ tinates muꞌin, vaj meꞌdye jeñej muꞌ Isaac judyeyaꞌ muꞌ Jacob, muꞌ Jenꞌ soꞌmacsi p̂eyacdyeꞌ muꞌ. Meꞌ tsanꞌ jambiꞌ cạ̈tsiꞌ Jenꞌsiꞌ p̂eyacdyeꞌ, mijambiꞌ soꞌmac jac in, yejĉoij qui namꞌ anicyi in. 10Meꞌ tsanꞌ muꞌĉan bäꞌyi in, muꞌ qui namꞌ Abraham dyijtuiꞌ biseꞌ mọꞌ anicsis bäꞌyedyeꞌ, mọꞌ dyijtuiꞌsiꞌ Jenꞌ judyeyaꞌ jämꞌtyes chimeꞌ, mọꞌ jam p̂ucushyiꞌsiꞌ mijam raꞌ mọtsis chimeꞌ.
11Abraham chimeꞌ, meꞌ tsanꞌ säräꞌ buꞌyis p̂en muꞌ Sara, meꞌ tsanꞌ muꞌ ishoꞌ, anicyedyeꞌyaꞌ qui namꞌ muꞌ soꞌmac aꞌsiꞌ ferdyeꞌ muꞌ paj qui ạvaꞌyi, ĉaĉaij na muꞌ chị́yete Jenꞌ anic jịꞌcätseꞌ p̂eyacdyeꞌ jasoꞌmitis jiquej. 12Meꞌ tsanꞌ aty jiijtaquity tupudyeꞌ ạvaꞌyedyes muꞌ, ạvaꞌyi qui namꞌ judyeyaꞌ dayetaqui vóshimꞌ, jeñejti ọ́rotaꞌ in mạyedyeꞌchety judyeyaꞌ jeñejti jáman in marvety, meꞌti in, mijam tupuj tsic vóshiꞌ muꞌ.
13Räj muꞌin p̂eyactyiꞌ q̂uinꞌ yụ in, yejĉoij anicjete Jenꞌ in meꞌdye säñi in. Meꞌ tsanꞌ jambiꞌ soꞌmac in yoj jeyacsidyemꞌ Jenꞌ jiquej u, yejĉoij qui namꞌ anicjete Jenꞌ in, jeñej aty taquem cạvepte in mọꞌ soꞌmacsis raꞌ Jenꞌ, aty soꞌmac ĉúti in, meꞌ buꞌyiꞌ mọꞌ. Yi dyijyi in: "Jam nash úchedyety tsun, yocchedyety tsun", yi in. 14Tyi chuc meꞌ yity in jorojĉan muꞌin queveꞌ in ĉụiꞌsidyes bäꞌyedyeꞌ muꞌin paj qui muꞌĉan bäꞌyi in. 15Yejĉoij dyijtuĉan jụijyaꞌ in ĉụiꞌsiꞌ jac muꞌin, a vuty tupuj caꞌñibun u in. 16Jam qui namꞌ meꞌ muꞌin in, jämꞌsimꞌ bäꞌyedyeꞌ dyijtuiꞌ in, mạyedyeꞌches. Mọꞌdyes muꞌ Jenꞌ maꞌjotacsi jam junꞌ tsị́catacsi yi muꞌ: "Yụ nash Jenꞌ muꞌintyiꞌ in", yi ĉaĉaij na muꞌdye jämꞌtyeyeyacsi bäꞌyedyedyes muꞌin.
17-18Abraham anicyedyeꞌyaꞌ muꞌ ĉụiꞌtyiꞌ ạvaꞌ muꞌ Isaac soꞌmete Jenꞌ, jajiꞌĉujtiyaꞌ muꞌ Jenꞌ jiquej. Tashcheꞌ jiquej jasoꞌmiti p̂eyacdyeꞌ Abraham junꞌ chuc raꞌ dayi vóshiꞌ muꞌ. Muꞌ yi: "Isaacyaꞌ raꞌ cạ̈tsiꞌ mọꞌ p̂eyacdyeꞌ yụꞌtyes yụ jiquej, muꞌtyiꞌĉan raꞌ vóshiꞌ muꞌ, yụ raꞌ jịꞌcätseꞌ mọꞌ p̂eyacdyeꞌ soꞌmeyes yụ", yi. Meꞌ tsanꞌ meꞌ, Abraham qui namꞌ jam quijatutyete ạvaꞌ muꞌ Isaac, ĉaĉaij na muꞌ 19chị́yete Jenꞌ jam jayej ferdyeꞌ muꞌ, tupuj vañinjeyacseban säñity in. Anicdye meꞌ, muꞌ Abraham dyijyi tsanꞌ ujate raꞌ muꞌ Isaac, jeñej buꞌyi ujactyiꞌ tsanꞌ atsvun, sacyeban qui namꞌ, meꞌ buꞌyi mọꞌ shupquiꞌ.
20Isaac jiquej jäꞌmiij p̂eyeꞌ junꞌ chuc raꞌ muꞌ Jenꞌ soꞌmacsi ñịbeꞌjitidyes muꞌin Jacob judyeyaꞌ muꞌ Esaú, ĉaĉaij na muꞌ anicjete Jenꞌ junꞌ chuc raꞌ muꞌ.
21Aty säñiyaꞌ raꞌ muꞌ Jacob jiquej, anicyedyeꞌyaꞌ muꞌ cọdyete Jenꞌ muꞌindyes in Josétyidyes ạvaꞌ muꞌ, pärenꞌdyes cọdaqui muꞌ paj qui muꞌ ñịbeꞌjitidyesyaꞌ nọ́tacsi muꞌ Jenꞌ. Mutyudyeꞌdyety jañutyiti, uts na timaꞌquete Jenꞌ.
22Aty säñiyaꞌ raꞌ muꞌ José jiquej, anicyedyeꞌyaꞌ muꞌ yi p̂eyaqui jéyaqui chätidyeꞌ muꞌ junꞌ chuc raꞌ jábiyaꞌ in muꞌin Israeltyiꞌ vóshiꞌ in yacchuiꞌ raꞌ in Egipto. Jäꞌmiij muꞌ jéyacsetaqui meꞌ ca raꞌ tsanꞌ jindyety muꞌ, cạc ca raꞌ mọmomꞌ.
23Chimeꞌdye jiquej Moiséstyiꞌ jenꞌ muꞌ judyeyaꞌ tseꞌ muꞌ, anicyedyeꞌyaꞌ muꞌin mijam quijñete Egiptoĉantyiꞌ ayoꞌ in, mijam chiquepte p̂eyacdyeꞌ chimeꞌ in. Naꞌiyaꞌ Moisés jịjmuꞌsete in, chibin ịvaj jumjete in, ĉaĉaij na jämꞌtyiꞌ ĉọ́te cạvete in.
24Aty rijtiyaꞌ muꞌ Moisés, tupuj tsanꞌ ayoꞌtyiꞌ vịyaꞌ muꞌ yụꞌtac, tupuj tsanꞌ ayoꞌbuꞌyi muꞌ. Anicyedyeꞌyaꞌ qui na muꞌ jam jụjyi. 25Dadamꞌ dyijtuiꞌ muꞌ paj qui muꞌmun jịꞌñibeꞌcac chimeꞌ Jenꞌtyiꞌtum muntyiꞌ muꞌ. Mijam mọꞌ dyijtuiꞌ maꞌjotyeꞌ juchaj ĉaĉaij na chịj muꞌ, mọꞌsiꞌ maꞌjodyeꞌ mijam raꞌ yejĉoiꞌ mọꞌ, cavin raꞌ jiyimꞌ. 26Muꞌ jụjyi paj qui Jenꞌdyes bäꞌyi, meꞌ raꞌ tsanꞌ Cristodyes ñiñete in, ọyaꞌyaꞌ dyijtuiꞌ jacches jedyeꞌ Egiptoĉansiꞌ, yaꞌiꞌsiꞌ, mọꞌ mọmoꞌ dyijtuiꞌ bijodyeꞌ jasoꞌmitis raꞌ Jenꞌ.
27Moisés anicyedyeꞌyaꞌ muꞌ yacchuiꞌ jiquej Egipto, meꞌ tsanꞌ ayoꞌ jafaquiti, muꞌ qui namꞌ jam quijñete. Moisés dyichyedyeꞌtum dyich buꞌyi, jeñej buꞌyi cạvete Jenꞌ, muꞌ jam jorojĉantyiꞌ. 28Chimeꞌdye anicyedyeꞌyaꞌ muꞌ Moisés räj chiquepte Jenꞌsiꞌ p̂eyacdyeꞌ muꞌ cäc̣häꞌchuiꞌ mọꞌ Jiꞌc̣honacdyedyes feshta, judyeyaꞌ jutacsi paj qui räj taiꞌtyeꞌ chäsh chụiꞌdyeꞌyaꞌ muꞌin, paj qui muꞌ ijacsity anjer jam qui junꞌtacsebi tashchety ạvaꞌ muꞌin.
29Anicyedyeꞌyaꞌ muꞌin sapaꞌjeꞌ in mọꞌ Mar Jäijnäs, chañejcheꞌ tyeij miꞌi in. Jäquiꞌve muꞌin Egiptoĉantyiꞌ in cäc̣henꞌ tsanꞌ muꞌĉan tyeij in, tas qui namꞌ p̂uti muꞌin in, judyeꞌdye chaꞌshacsi in.
30Anicyedyeꞌyaꞌ muꞌin Israeltyiꞌ vóshiꞌ in, muꞌ Jenꞌ jivaꞌchabiꞌ räj Jericós naꞌrumꞌ, aty yävätidyeꞌ mạyedyeꞌ cọijtiyaꞌ in mọꞌ bäꞌyedyeꞌ jiquej. 31Mọꞌ Rahab, meꞌtaquis p̂en, anicyedyeꞌyaꞌ mọꞌ c̣hoñiꞌ. Jam mọꞌmun säñiꞌ jam jeñej muꞌĉantyiꞌ in, muꞌin jam chiquetety Jenꞌ in, ĉaĉaij na mọꞌ tiĉunacsiꞌ cạvequety jac jiquej in.
32¿Jedyeꞌ bu raꞌ damꞌdye jéyac? Aty jam tupuj jéyac miꞌin junꞌ chuc muꞌ anicyi Gedeón jiquej, judyeyaꞌ muꞌ Barac, judyeyaꞌ muꞌ Sansón, judyeyaꞌ muꞌ Jefté, judyeyaꞌ muꞌ David, judyeyaꞌ muꞌ Samuel judyeyaꞌ muꞌin jasoꞌmitity p̂eyacdyeꞌ Jenꞌ chimeꞌ in. 33Räj uts in anicyedyeꞌyaꞌ muꞌin pạrej muꞌyaꞌ jiꞌpenacsi bäꞌyedyeꞌ mọjoꞌchas yocves in, judyeyaꞌ pạrej muꞌyaꞌ rụij ayoꞌbuꞌyi chimeꞌ in. Anicyedyeꞌyaꞌ muꞌin pạrej muꞌyaꞌ soꞌmac Jenꞌyaꞌ in yoj yiꞌdyemꞌ p̂eyacdyeꞌ o. Anicyedyeꞌyaꞌ muꞌin pạrej ñutsjeyacsi in vajedyedyeꞌyaꞌ, 34judyeyaꞌ pạrej yenamquevaꞌjoiꞌsiꞌyaꞌ tŝij chimeꞌ. Pạrej muꞌyaꞌ in ñutsjetyetac Jenꞌyaꞌ in paj qui jam damꞌjeꞌ coc̣hino in. Pạrej muꞌyaꞌ itŝiꞌ ferdyeꞌ muꞌin, muꞌin soꞌmactyiꞌ ferdyeꞌ Jenꞌyaꞌ in, paj qui ferdyeꞌtum chuti in, jiꞌpenacsi yocvety väc̣häꞌtyity daiꞌtyiꞌ in. 35Chimeꞌdye mọꞌyaꞌ pạrej p̂en in anicyedyeꞌyaꞌ mọꞌin, muꞌ Jenꞌ vañinjeyacsebiban chätidyeꞌ mọꞌin.
Yoctyiꞌ qui namꞌ jam meꞌ in, pạrej jiꞌsäsdyi in paj qui jịꞌñibeꞌcac in judyeyaꞌ ijac in. Muꞌin jam jụjyi in paj qui jiꞌc̣honacsi in muꞌinyaꞌ ijacsityyaꞌ in, mọꞌ dyijtuiꞌ in mọꞌ dadamꞌ mọjoꞌchas jämꞌsiꞌ bäꞌyedyeꞌ, mọꞌ raꞌ cạves in vañinyeban jụijyaꞌ in. 36Chimeꞌdye pạrej muꞌyaꞌ fer ñinac in judyeyaꞌ siꞌbac in, pạrej saptac cadenayaꞌ in judyeyaꞌ ĉärꞌtac in. 37Chimeꞌdye pạrej farajnacsi mijyaꞌ in jiꞌsänacsi in, judyeyaꞌ pạrej muꞌyaꞌ chocjeyac seruchoyaꞌ in, pạrej coc̣hino damꞌjeꞌ in. Pạrej junaꞌ ĉụiꞌ vaꞌcac in, ñịbeꞌ cạveꞌ in, cuꞌdyes shoꞌpaꞌ quịꞌsitubiꞌ in, meꞌ muꞌin in, joꞌmes jayejjoiꞌ muꞌin. 38Cäjyasĉan jac vaꞌcac in judyeyaꞌ mụcuꞌyaꞌ chimeꞌ in, jojdojdosĉan toꞌ bäꞌyi in. Meꞌ tsanꞌ meꞌ vaꞌcacsequi muntyiꞌ in, muꞌin qui namꞌ mujuꞌchaꞌ yaꞌij in Jenꞌsiꞌyaꞌ vej muꞌ, uyaꞌyaꞌ muꞌin meꞌtaquity in.
39Räj uts in p̂eyactyiꞌ q̂uinꞌ yụ, räj muꞌin maꞌjotac Jenꞌyaꞌ in anicyedyeꞌyaꞌ muꞌin, meꞌ tsanꞌ meꞌ, jambiꞌ qui namꞌ muꞌ Jenꞌ jịꞌcätseyacsi p̂eyacdyeꞌ muꞌ soꞌmacsis jiquej muꞌ. 40Ĉaĉaij na muꞌ Jenꞌ mọjoꞌchaꞌ jämꞌsiꞌ meꞌchuiꞌ dyijyedyeꞌ muꞌ, mọꞌ muꞌ mạꞌjeꞌ paj qui tsunmun q̂uinꞌ muꞌintum c̣honjaꞌ tsun chimeꞌ, chat q̂uinꞌdyemꞌ raꞌ jịꞌcätseꞌ c̣honꞌdyedyes p̂eyacdyeꞌ muꞌ.
S'ha seleccionat:
Hebreodyes 11: CAS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'