Hebreodyes 10
10
Jiꞌcoꞌshayacdyeꞌ Jenꞌdyes jiquej in jam tupuj vayacjibusinꞌ juchaj tsun
1Yụꞌtacdyeꞌ Jenꞌsiꞌ muꞌ, onomꞌ buꞌyiꞌ muꞌ, jam jeñej mọꞌ mụiꞌsis p̂eyacdyeꞌ Jenꞌsiꞌ muꞌ, mọꞌ chap jorojĉanjisinꞌ mọꞌ ñịbeꞌyedyeꞌ soꞌmisinꞌsiꞌ raꞌ muꞌ Jenꞌ. Mọꞌ yụꞌtacdyeꞌ jam tupuj jämꞌ yụꞌtacsiꞌ muꞌin cäc̣häꞌchuiꞌtyiꞌ in. Räjĉan yómodyeꞌ jịjcaiꞌ jemoñeꞌ meꞌ yejĉoij jiꞌcoꞌshayeꞌ cuꞌdyeꞌ Jenꞌdyes in, mọꞌ jam tupuj jämꞌ yụꞌtacsiꞌ. 2Tupuj c̣hiconꞌjetacsiꞌ juchaj jụijyaꞌ muꞌin, a vuty jam quivij jiꞌyoquiti juchajyaꞌ u in, judyeyaꞌ chimeꞌ a vuty jam quivij jiꞌcoꞌshayebanꞌ juchadyes u muꞌin. 3Mọꞌ yómodyeꞌ jịjcaiꞌsiꞌ jiꞌcoꞌshayac, mọꞌ jiꞌdyijtuyacsebanꞌ cuvij mọꞌyaꞌ juchaj muꞌin, 4ĉaĉaij na cuꞌdyes chäsh mọꞌ, vacas judyeyaꞌ chivos mọꞌ jam tupuj jätäjyiꞌ vayacjeyacsebi juchaj muntyis muꞌin.
5Cristo úcheꞌ jijtuijyaꞌ jiquej yi jéte Jenꞌ muꞌ:
"Mi aty jam jemoñeꞌ tuyac cuꞌdyeꞌ in,
mijam jemonac jiꞌcoꞌshayeyac mọꞌin in,
ĉaĉaij na mi jämꞌtyiyitim aꞌdyesiꞌ yụ.
6Aty jam maꞌjotyeꞌ cuꞌdyeꞌ mi, jiꞌcoꞌshayacdyedyes,
mijam maꞌjotyeꞌ mi tucdyeꞌ in juchadyes."
7Chat qui yụ jéte Jenꞌ:
"Yụ́tyiꞌ Jenꞌ, utsdye u yụ,
atsij yụ paj qui cạpye dyijyedyeꞌ mi",
ĉaĉaij na meꞌ yiꞌ sánacdyeꞌ yụꞌtacdyeꞌ jiꞌjäquin yụ.
8Ọij sánacdyeꞌ yiꞌ muꞌ Jenꞌ aty jam mạꞌjeꞌ tuyacdyeꞌ, mijam maꞌjotyeꞌ cuꞌdyeꞌ jiꞌcoꞌshayacdyedyes juchadyes muntyis muꞌin. Meꞌ tsanꞌ meꞌ mọꞌ yụꞌtacdyeꞌ cọdyetacsiꞌ cuꞌdyeꞌ, aty jam mọꞌ muꞌ maꞌjotyebanꞌ Jenꞌ. 9Chiyidye muꞌ Cristo: "Yụ́tyiꞌ Jenꞌ, utsdye u yụ, atsij yụ paj qui cạpye dyijyedyeꞌ mi." Ọij jiꞌchäquiyisinꞌ aty jịꞌmotsac mọꞌ tashches jiꞌcoꞌshayacdyeꞌ in, Cristo qui jayuꞌti muꞌ Jenꞌ tsundyes. 10Q̂uinꞌ aty Jenꞌdyety tsun ĉaĉaij na muꞌ Jesucristo chiquete Jenꞌ, yiriꞌ quimꞌ yụꞌtaqui aꞌ muꞌ ujac tsundyes, aty jam jemoñeꞌ quivij ujac juban muꞌ.
11Muꞌin judío cudyitity Jenꞌcheꞌ in, räj muꞌin mạyedyeꞌ jịjcaiꞌ in meꞌ carijtaqui Jenꞌdyes in, cuꞌdyemꞌ yejĉoiꞌ meꞌtyeꞌ in jiꞌcoꞌshayevaꞌqueꞌ Jenꞌdyes in, mọꞌ qui namꞌ jam junꞌjeyacsebiꞌ vayacjeyacsebi juchaj muntyis muꞌin. 12Muꞌ qui namꞌ Jesucristo yiriꞌ quimꞌ yuꞌti ĉụiꞌ, aty jam jemonac quivij ujac muꞌ, räjĉan raꞌ yaꞌiꞌ sänꞌdyeꞌ muꞌ. 13Chat qui muꞌ tacve buꞌban Jenꞌyaꞌ, muꞌcheꞌ q̂uinꞌ bäꞌvaꞌjoij muꞌ, bisacvaꞌjoij junꞌ quiꞌ chuc muꞌ Jenꞌ jiꞌpenbite fạ́quetety in. 14Muꞌ Jesucristo yiriꞌ quimꞌ yuꞌti muntyidyes tsun, sänꞌdyeꞌyaꞌ muꞌ rụij yụꞌtacsi Jenꞌsiꞌyaꞌ vej muꞌ muꞌin c̣hiconꞌtactyiꞌ in, räjĉan raꞌ meꞌ in muꞌsiꞌyaꞌ vej muꞌ. 15Jenꞌsiꞌ Ạꞌedyemꞌ chịmoꞌdye p̂eyeꞌ jísinꞌ sánacdyeꞌcheꞌ, yiꞌ:
16"Yi muꞌ Ayoꞌ:
Jadyiquis raꞌ tupudyeꞌ yocsiꞌ raꞌ p̂eyacdyeꞌ mụiꞌsis soꞌmacsi yụ,
yiꞌ mọꞌ p̂eyacdyeꞌ:
Yụ́siꞌ yụꞌtacdyeꞌ yụ raꞌ jiꞌsiteyacsi dyijyedyeꞌĉan muꞌin,
judyeyaꞌ yụ raꞌ sáñeꞌ ĉojtyiꞌĉan chimeꞌ muꞌin.
17Chimeꞌdye aty raꞌ jam dyijtucsebi yụ aꞌc̣his dyijyedyeꞌ muꞌin judyeyaꞌ juchaj muꞌin",
chimeꞌ yiꞌ sánacdyeꞌ.
18Aty vayac juchaj jụijyaꞌ, aty jam jemonac jedyeꞌ tuyeyac muꞌ Jenꞌ juchadyes.
Jemoñeꞌ c̣hẹiꞌyaꞌjeja Jenꞌ
19Mọꞌdyes vojity yụ, q̂uinꞌ aty jam noiꞌyedyeꞌtum c̣hẹiꞌyaꞌjeja Jenꞌ Jesucristosyaꞌ chäsh muꞌ, mọꞌ jeñej buꞌyiꞌ sitac Mọjoꞌchaꞌ Tsäquiꞌsis Vavdyeꞌ, meꞌ buꞌyiꞌ mọꞌ sisdyeꞌ tsun. 20Jesucristos aꞌ muꞌ mọꞌ jeñej buꞌyiꞌ juñumchuquity jiquej mọꞌ Mọjoꞌchaꞌ Tsäquiꞌsis Vavdyeꞌ Jenꞌsiꞌĉantyiꞌ acaꞌ jiquej. Ĉụiꞌsiꞌyaꞌ sänꞌdyeꞌ muꞌ vanacjiyisinꞌ mọꞌ juñumchuquity paj qui tupuj c̣hẹiꞌyaꞌjeja Jenꞌ, aty q̂uinꞌ Jesucristoyaꞌ c̣hẹiꞌyaꞌjeja Jenꞌ, muꞌ Jesucristo tsạꞌchusinꞌtyiꞌ. 21Jesús nash anictyity tashcheꞌ cudyitity Jenꞌcheꞌ tsundyesiꞌ, muꞌ ayoꞌbuꞌyi räj tsun anicjejaty Jenꞌ. 22Mọꞌdyes tupuj c̣hẹiꞌyaꞌjeja Jenꞌ jämꞌtyiꞌtum ĉojtyiꞌ tsun, fercheꞌ anicjeja muꞌ, muꞌ c̣hiconꞌjityisinꞌtyiꞌ räj aꞌc̣his dyijyedyeꞌ jiquej tsun, aty jam jiꞌyoquitiĉaꞌ juchajyaꞌ tsun, q̂uinꞌ aty jeñej buꞌjaꞌ favacsiꞌ aꞌ tsun jämꞌsiꞌyaꞌ ojñiꞌ. 23Jemoñeꞌ yejĉojaꞌ ferdyeꞌyaꞌ cäc̣häꞌchujaꞌ mọꞌ p̂eyacdyeꞌ anicjejaꞌsiꞌ tsun, mọꞌ bisacdyeꞌ tsun. Jam raꞌ yocve dyijyejaꞌ, ĉaĉaij na jämꞌ chị́yeja tsun muꞌ Jenꞌ räjĉan jịꞌcätsaqui p̂eyacdyeꞌ muꞌ yụꞌtaquis jiquej muꞌ. 24Jemoñeꞌ q̂uinꞌ tsun meꞌ bäꞌjaꞌ vaj meij dyijtutiĉaꞌ tsun judyeyaꞌ ñútyitiĉaꞌ paj qui mạꞌjeyacsejaty judyeyaꞌ nọ́tyetacsejaꞌ chimeꞌ. 25Jam raꞌ farajjejaꞌ vajmuꞌyadyeꞌ tsun, jam raꞌ jeñej muꞌin yoctyiꞌ in, aty jam mạꞌjeꞌ tänꞌyeban vajmuꞌyadyeꞌĉan in. Jemoñeꞌ dadamꞌ mujuꞌchaꞌ vaj meij jiꞌmaꞌyitiĉaꞌ Jenꞌdyes, dadamꞌ mọjoꞌchaꞌ jemonac mọꞌ q̂uinꞌ ĉaĉaij na aty c̣hẹiꞌyaꞌyejaꞌ jadyiquis raꞌ tupudyeꞌ.
26Tsun aty chị́yejaty mọꞌ rụijsis p̂eyacdyeꞌ, ĉụiꞌ vaꞌquecjaꞌ jụijyaꞌ mọꞌ judyeyaꞌ yejĉojaꞌ juchajĉan bäꞌjaꞌ jụijyaꞌ tsun, mọꞌyaꞌ qui raꞌ jadyic tuyacdyeꞌ juchadyes tsun, aty itŝiꞌ raꞌ damꞌdye tyi jiyaꞌdyiyibusinꞌ juchaj tsun. 27Vaꞌtacdyeꞌ qui ramꞌ dadamꞌ jiꞌtŝuyisinꞌ Jenꞌ, mọꞌ fersiꞌ tŝij, yódyesdyemꞌ raꞌ tasjeyacsis o muꞌin damꞌjebanꞌ in muꞌin fạ́quetety in. 28Tyi chuc jam chiquepte Jenꞌsiꞌ yụꞌtacdyeꞌ jụijyaꞌ muꞌ, mọꞌ jasoꞌmitis Moisés jiquej, muꞌyaꞌ jụijyaꞌ päräꞌ judyeyaꞌ chibin cạveptety juchaj in yirity muntyis, muꞌ raꞌ jam junꞌ c̣honchuc, ijac raꞌ muꞌ. 29Dadamꞌ raꞌ mọjoꞌchas juchaj shupquiꞌ muꞌin, tyi chuc vaꞌquecbitety Jenꞌtyiꞌ Ạvaꞌ muꞌ, judyeyaꞌ ñiñepte in Jenꞌsiꞌ Ạꞌedyeꞌ muꞌ, mọꞌ ñịbeꞌjeyacsis, judyeyaꞌ fibis ĉọptety chäsh in, mọꞌ chäsh ferdyeꞌ jasoꞌmibutis mọꞌ p̂eyacdyeꞌ Jenꞌsiꞌ muꞌ, mọꞌ soꞌmisinꞌsiꞌ tsun, mọꞌ c̣hiconꞌjeyacsis jiquej. 30Tsun chị́yepja p̂eyacdyeꞌ Jenꞌsiꞌ, muꞌdye yi: "Yụ́dye raꞌ vaꞌtacdyeꞌ soꞌmacsi, chịyudye raꞌ jịꞌchiyacsi", yi Ayoꞌ tsun. Yi chimeꞌ: "Muꞌ Ayoꞌ tsun jịꞌcäts yụꞌtacsi raꞌ juchadyeꞌyaꞌ ĉụiꞌtyiꞌ muntyiꞌ muꞌ", yiꞌ sánacdyeꞌ. 31Anic där tsäquiꞌ mọꞌ vaꞌtacdyeꞌ soꞌmacsis raꞌ muꞌ tsạꞌtyiꞌ Jenꞌ.
Jemoñeꞌ tyumꞌchutidyeꞌtum cäc̣häꞌchuja Jenꞌ
32Dyijyebadac junꞌ chuc ñịbeꞌ cạvetiñeꞌ jiquej miꞌin, yoquiꞌdyemꞌ tiyacchutiyaꞌ anicjetiñeꞌ jiquej u mọꞌ mạijchucsis p̂eyacdyeꞌ. Meꞌ tsanꞌ fer jịꞌñibeꞌcac jiquej miꞌin, miꞌin qui namꞌ därsiꞌtum tyumꞌchutidyeꞌ jiꞌcajñetiñeꞌ miꞌin. 33Pạrej fạraꞌnacdyeꞌ damꞌjetiñeꞌ miꞌin, judyeyaꞌ jịꞌñibeꞌcanac in muntyisyaꞌ vej muꞌin, pạrej chimeꞌ penꞌdyetucsi miꞌin muꞌin jịꞌñibeꞌcactyiꞌ in. 34Miꞌin ñịbeꞌ ĉọcseban muꞌin ĉärꞌtactyiꞌ in, nọ́tyetacseban miꞌin. Meꞌ tsanꞌ chutyinac jiquej in, maꞌjodyeꞌtum qui namꞌ dyichchuti miꞌin, ĉaĉaij na mọmꞌ dyijtutiñeꞌ miꞌin mạyedyeꞌches mọjoꞌchaꞌ jämꞌsiꞌ mọꞌ jam junꞌ mọtsis. 35Mọꞌdyes jam raꞌ farajjetiñeꞌ sóñiꞌyedyeꞌ miꞌin, mọꞌ raꞌ chäcdyis bijodyeꞌ soꞌminac miꞌin. 36Meꞌ tsanꞌ ñịbedyes jịꞌĉojtiñeꞌ miꞌin, jemoñeꞌ tyumꞌchutidyeꞌtum bäꞌyi miꞌin paj qui chiqueptinte Jenꞌsiꞌ dyijyedyeꞌ muꞌ judyeyaꞌ paj qui soꞌminac ñịbeꞌyedyes, yoj yiꞌdyemꞌ p̂eyacdyeꞌ umꞌ mọꞌ soꞌmisinꞌsiꞌ tsun. 37Yiꞌ sánacdyeꞌ:
"Damꞌdyety toꞌ o jayej atsijban raꞌ muꞌ atsijbantyiꞌ raꞌ muntyiꞌ,
aty jam raꞌ men atsvun.
38Muꞌin rụij yụꞌtactyiꞌ yụ in,
anicyedyeꞌ muꞌin mọꞌ raꞌ jạtsaꞌchuti in.
Muꞌin na camanꞌyebantyiꞌ in,
muꞌin raꞌ jam junꞌ maꞌjotac yụ́yaꞌ in", yiꞌ sánacdyeꞌ.
39Tsun raꞌ jam meꞌ q̂uinꞌ bäꞌjaꞌ, jam raꞌ camanꞌyebajshaꞌ tsun, jam jeñej muꞌin vaꞌtacdyedyety in. Tsun anicjejaty aty c̣honjaty tsun.
S'ha seleccionat:
Hebreodyes 10: CAS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'