मूक चेलाकू 28
28
मालटा डुगूरे पउलूस
1दो अले बनसाव उडुंगनेनखनले सुदीतेरा हना डुगुराः ञाव मलटा हवे माःआन। 2हंडाकुःआ होड़कू अले सुदा अले मेरले ओंगोलगाड हना इया नपायतेकू मयावातेडलेःआ। हनमेला मुरुक ररंग दोहोना अरू दाः उयुःआ। हनालगा हँकू सेंगेलकू जगारतेडखन अले जमाकूकू नेत-नेवारतेरा। 3दो पउलूस सःअन बोझाकेडखन सेंगेलरेय मंडवेःआ। हननमेला सेंगेल एलंगते मीटोंग फनिक बींग उडुंगनेनखन पउलूस तिःईरेय हाब कोंडोड़यान। 4हंडाकुःआ होड़कू बींग पउलूसराः तिःईरे वकातोकू ञेलतिरिया दो अँननकू अँकू कता होड़ेंगा, “नाँयग होड़ दो ञेड एएंडा होड़ हवे। नाँय समुंदर अते बनसाव उडुंगकियान अते हों फड़ियावदार देबी जीयत ओरोय दोहो ओवातिरिया।” 5मनदो पउलूस हाँयग बींग सेंगेलरेय फटकार बोलोगोतेडीग अरू हाँयके तोनोंग इया हनी मेर होयागान। 6हँकुःआ होड़कू ओंगलेःआ, नाँय ओ जुवाःता सहे अनँयग आँयगतेय कसड़ गोएग जुवाःता, माःआन। मनदो हँकू मुरुक घड़ी वरीकू ञेलगोड ञवना अरू हाँयके तोनोंग इयाःआ हनी मेर होयागान। दो हँकू अँकूराः ओंगोल बदलावनेनखनकू कतातेरा, नाँय दो तोनोंगीग देवता हवे, माःआन।
7हना ततेरराः अरी-धरीरे हना डुगुरीग मरंग हातपात होड़ पुबुलियूसराः मुरुक दोहोड़कून दोहोना। दो हाँय अले अनँयग ओड़ाःरे गोःतेडलेखन पेय दिने गुतियातेडलेःआ। 8हाँयरीग अपात जार अरू दोंगे कुकुनटेडते हसूरेय दोहोना। दो पउलूस हाँय एचेरे सेनेकियानखने अरजीवातेरिया अरू हाँय चोटरे तिःई खेपातेड दो हाँय अँड़ेयाने। 9नाःआ इया होयानेन दो हना डुगुरिकुःआ एटाः एटाः हसूत होड़कू होंकू वेजेडा अरू हँकू जमाकू अँड़ेयान। 10हँकुःआ होड़कू अले मुरुककू मान मरजइततेडलेःआ अरू अले पेय महिना तयोमरे सेन लगाले सपड़ावनेन दो अले लगा हुडिंग बगरा दोहोना हना जिनिसकून जहाजरेकू देगगोतेड।
मलटा डुगु अते रूमी अगीराः सेन
11हनते अले सिकंदिरिया सहरराः मीटोंग जहाजरेले सेना अरू हना जहाजराः मड़ंग अगी दियूसकुरीराः#28:11 दियूसकुरीराः मतलोब जियूस देवतारिकिनाः बेटाकिन, हवे माःआन। चिनहा दोहोना। हना जहाज ररंग बेला मलटा डुगूरे रोंकावनेना। 12हंडातेले सेनेडखन सिसिली डुगुराः सुरकूसा सहररे पेय दिन रोंकावतोले दोहोना। 13हना अते अले सेनेन सेन इटली देसराः रेगियूम सहररेले सोदोरनेना अरू एटाः दिन दखिन होरराः होय सलाःआ दो अले हना अते एटाः दिन पुतियूली सहररेले सोदोरयान। 14हंडा अले बिसवासी होड़कू सुदाले जुमावनेना अरू हँकू कतातेड अते अले हँकू एचेरे सात दिनले दोहोना। अरू हनन इया अले रूमी सहर अगी तोराले। 15दो हंडाकुःआ बिसवासी होड़कू अले बदीरेकू अयूमतेरा दो हँकू अपियूसराः बजार अरू पेय धरमसाला ञावराः ततेर वरी अले सुदा जुमाः लगाकू वेजेडा। हँकू ञेलतेडखन पउलूस भगवाने जागतेरा अरू हाँयराः जीव बड़ियाड़यान। 16अले रूमी सहररेले सोदोरनेन दो हातपात होड़कू पउलूस एकला मीटोंग ओड़ाःरे दोहोन लगाकू ओवातिरिया, मनदो हाँय सुदा हाँये अगुराःआ हाँयग मी होड़ सइना होड़ होंय दोहोना।
पउलूस रूमी सहररे
17पेय दिन तयोमरे पउलूस रूमी सहररिकुःआ एहूदाकूरिकुःआ मूक होड़कूय एचे राः जुमावतेडकुःआ। दो हँकू जुमावनेन दो हाँय हँकू एचेरेय कतातेरा, “ने वपक बोपोहकूतिंग, ईंग अबूरिकुःआ होड़कू बदीरे अरू अबूरिकुःआ खुटिपरिया होड़कूराः रिती-बिधी बदीरे तोनोंगाः गारबार मेरिंग एचेगरा। हनारे हों हँकू एरुसलेमरे ईंगकू साबतेडखन रूमी देसरिकुःआ होड़कू एचेरेकू जिमागोतेडिंगा। 18ईंग गुजुः इयाःआ तोनोंगाः कसूर मेरिंग एचेगरा, हनालगा हँकू ईंग जासतेडखन अड़ाःगींग लगाकू चहाःआ। 19मनदो एहूदाकू ईंग अड़ाःगींग लगा मेरकू ओवागडकू। दो कइसर मरंग राजा ईंग फड़ियावगींग लगा ईंगके अअसे परावयान। मनदो ईंगरिकुःआ होड़कू बदीकू लगा तोनोंगाः कता ईंग एचेरे मेर दोहोगान। 20हनालगा ईंग अपे सुदा जुमाः लगा अरू बुतुड़ु लगायिंग राःकेडपेःआ। इसराएल होड़कू मसी लगाकू असरागोड ञवनतना, अरू हाँय एचेरेयिंग बिसवासकेड अते नुँहू ईंग तोलतो इया इदानिंगा।”
21दो हँकू कतातेड, “आम बदीरे एहूदिया छतर अते तोनोंगाः सरवन अले एचेरे मेर सोदोरगना सहे हंडा अतेकू वेजेडा हँकुःआ होड़कू हों आम बदीरे तोनोंगाः बेलूर कता मेरकू कतागाड। 22अले सुदीयतना नाःआ गारबारतेःआ गउदारिकुःआ होड़कू बदीरे जमा ततेररिकुःआ होड़कू मिरिस-मिरिसता। मनदो नँकुःआ होड़कू बदीरे आम एचेरे चिला ओंगोल इदा, हना आम अते अयुमे लगाले चहाःतना।”
23दो हँकू हाँय सुदा बुतुड़ु लगा मीटोंग दिनकू तोल दोहोतेरा। अरू हना दिन पउलूस दोहोना हना ओड़ाःरे, मुरुक होड़कू जुमावनेना। निंदावा अते सिंगाड़ वरी, हाँय भगवानराः बड़रा कता होड़ मोसेसराः नियमकून, अरू भगवानराः बड़रा कता होड़कू ओजाःतेरा एटाः कागदकूनते, ईसू मसीराः बदीरे एचे सुदीकू घड़ीन, भगवानराः राइज बदीरे हिदइते उदुःवातेडकुःआ। 24हाँय कतातेरा हना कता अदोम होड़कू मंजूरवातेरा, मनदो अदोम होड़कू मेरकू बिसवासगाड। 25हँकू अँननकू अँकू अड़ा-चउकीयान अरू अदोमकू सेन लगाकू सपड़ाःआ दो पउलूस नाःआ इयाय कतातेड, “भगवानराः बड़रा कता होड़ एसयाहते सुद बिरुवा अपेरिकुःआ खुटिपरिया होड़कू एचेरे नाःआ कता सनाताए कतातेरा,
26सेनेकियानखन नँकुःआ होड़कूम कता उदुःवाकू,
अपेराः जीव केटेगयना;
अरू अपेराः लुतूर मोटावयना
अरू अपे मेड टिपी रेडकिया;
27हनालगा अपे अनयूमेतापे,
मनदो ओरोपे बुझावनेना;
अपे ञेलगोड ञवनतापे,
मनदो ओरोपे सुदी अवेतेरा।
नाःआ इया मेर होयाःकुः दो
अपे ञेलकेःआ अरूपे अयूमकेःआ,
अरूपे ओंगोल बुझाकुःआ,
जेमहा अपे कसूर अते जीवपे कुदाकेःआ अरू ईंग अपेयिंग नपायकेःआ।
28हनालगा अपे सुदीयापे, भगवान होड़कूय सडावता हना नपाय सरवन नुँहू बेगर एहूदाकू लगा हों इदा अरू हना हँकू बिसवासगेता।” 29[पउलूस नाःआ इयाय कतातेड दो एहूदाकू अँननकू अँकू अड़ा-चउकीयान अरू हना ततेर अते तोराकू।]
30दो पउलूस अनँयग किराया ओड़ाःरे बार बरिस वरीय दोहोना। 31हंडा हाँय एचेरेकू सेना, हँकुःआ होड़कूय नेत-नेवारा। हाँय मुरुक डीड़ अरू बेगर रोंकावते भगवानराः राइज बदीरे परसारगेःआ अरू परबू ईसू मसीराः कताय चेडकुःआ।
S'ha seleccionat:
मूक चेलाकू 28: kfp
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.