Izaiya 3
3
Tongiwa wa akuda Juda na akuda Jeruzalemu
1Tchoira tchineneva Nabwiya Yehova wa Makuru Matene unoawaka akuda Jeruzalemu na akuda Juda yosamela na yokamiheda ili yatene. Unoza akumihevo jodja jiwa jatene vamohi na mahindje matene. 2Unoakumihavo eto atu a kopolo na anyakondo, anamatonga na anamafiyiheda, aliba makanga na andimuwa andimuwa atene, 3asogolrelri a anyakondo 50 na aliba izo, anamawelruza, aliba zelru na aliba sakanya vindjilrisi. Atene anno Yehova unoakumihavo.
4Yehova unawonga ira: <<Nnoza daatukule azombwe, kakale asogolrelri. Eto ahima banafuna za tongaga. 5Atu anerege onihana goyi, kada mutu amuonihaga goyi nfwaye, kada mutu na mwandamanaye, azombwe anerege alramwisa andimuwa. Atu ohokanene mabasa anerege alramwisa atu orihediwa. 6Mutu unerege muhinda mbalaye, wenno uli vande va babaye, awongege ira: <Weyo ukana kapa. Ukale namasogolrelra wehu. Nyumba dogwa di, unafuna tongaga gu weyo.> 7Mbwenye siku neno mbalaye ule unerege wakula ira: <Miyo kondi! Miyo kadinna mirombwe domaliha goyi dedi. Nne mmba mwaga kadinna jodja nne kapa kadinna. Kamudihele miyo ira dikale namasogolrelra wa atu.>
8<<Na ibaribari Jeruzalemu umala gwagwaduwa eto Juda umala gwa. Mwasiwa jowonga jiwa na joira jiwa ti jengo jomulramwisa Yehova. Anapokiha undimuwa waye komove. 9Kavwa zela Yehova, anonyambwaliha milomo diwa muwari moruniha. Aliwa analaleya jotega jiwa vatando vene nnga jairetcha atu a Sodoma. Kinakoya jotega jiwa. Udilu wa aliwa! Tchoira aliwa kavizelihile ubure okave. 10Mwaawandele atu apama ira jengo jiwa jinerege awendela pama. Anoza kakayena hagalala zela mabasa kalaba atu. 11Udilu wa atu abure! Jengo jiwa kajiza jaawendelaga pama, tchoira jabure jejo jinera atu ti jejo jinafuna za awelela.
12<<Nyo atwaga, nyo munaonihiwa goyi na ahima. Munatongiwa na ahiyana. Aa, atwaga nyo! Anamasogolrelra enyu anouholotchani. Kohomala timiha ndila denyu dapama. 13Peno Yehova uvikunga ira atonge milandu. Umala kozeya ira aatonge malogo a atu. 14Yehova unoza ira atonge, aagwihena mulandu andimuwa na asogolrelri a atwaye. Unaagwihana mulandu ira nyo gu nyenne mumanle nonga mmundani mwaga mwa uva. Mmba mwenyu muhuzala jengo jaabenle nyo atu osimela. 15Nyo munaaonihela nni goyi atwaga? Mwasiwa gwa nni nyo adjelraga atu osimela? Unawonga gu miyo Nabwiya Yehova wa Makuru Matene.>>
16Yehova gunawonga ira: <<Anamwali a Siyawu ba aliba jurungula. Anawenda kawuzuzaga miru diwa, kaing'anaga na meso ogaya, wendaga momburula mendo kwe kwe, kanlihaga ja gwindji gwindji jili mmendoni muwa. 17Nona Nabwiya unoza aavahe urenda wa remoza mmuruni mwa anamwali a Siyawu, eto Yehova unoza aawunyungule mmwinini muwa ira kakale mandave.>>
18Siku neno Nabwiya unokumihamo jatene joriyiha mmendoni, jopotana mmuruni eto joriyiha nkohi, 19mikufu diwa, mapurusera, nguwo da nkohi, 20matchapowa, joriyiha mmuwononi, masintu, magarafwa a jonukela, jindjilrisi, 21aneli, ipini, 22bata da pwandoni, makapa, makazako, pasta diwa, 23maxupelyu, jowara japama, jopotana muru na nguwo dokunelana wintoni. Jatene ejo Nabwiya unokumihavo. 24Malro onukela pama, anerege nuka nnga yengo yovunda. Malro owara sintu, anomangiwa na mingohi. Mmalroni mwa nsisi novesuliwa pama, anokana mpalra. Malro mwa nguwo ya peresu yokwima, anowara masakwi. Malro okala atu oriya, anokana manyazo. 25Atwawo a alombwana anafuna kapiwe na supada. Alombwana awo a kopolo anakwege kondoni. 26Eto milango da sidadi yawo nnerege nla no tomola kuto. Evale weyo Siyawu unogarati vati, upingiriyaga weka.
S'ha seleccionat:
Izaiya 3: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral