Izaiya 2
2
Umwene wa murendele unafuna zana Yehova musogolro
1Ala ba mazu Yehova amuwandenle liye Izaiya mwana Amoji owonga zela ilambo ya Juda vamohi na sidadi ya Jeruzalemu.
2Malambo ogomiheda Mwango wa Nyumba ya Yehova unoza avenyihiwe ira akale otama kwaranya mwango datene eto unoza akale vazulu va mikuma datene. Malogo matene a atu anoza katamangele Mwangoni wa Yehova wewo. 3Atu a maziza madjindji anoza kawongege ira: <<Ndoweni, nigweleni Mwango wa Yehova, vande va Mulugu wa Jako, ira liye anifundjihe ndila daye, ira niwandege wenda na ndila daye dile.>> Mwasiwa malamulo anakumelege Siyawu. Eto mazu a Yehova anakumelege Jeruzalemu. 4Yehova unoza atonge milandu da malogo a atu eto unoza atonge makani a atu oindjiva ohiyana-hiyana. Aliwa anoza katukule masupadiwa owanana kondo, kaahane ira kakale himba dolimana. Aliwa anoza katukule mwanango diwa dowanana kondo, kahane ira dikale vikwakwa dogwadana tambi da uva. Kanilivo nlogo nnafuna venya na masupada, dowa wana na nlogo nimohi. Eto kaviza vikala fundja makalelo owana kondo. 5Nyo muli vande va Jako, ndoweni niwende mmoneyani mwa Yehova.
Siku na Yehova
6Mwa ibaribari nyo Yehova muhumala ahiya atwinyu, atu a nlogo na Jako. Mwasiwa aliwa kohoindjiveliwa visangwisangwi da atu a makumelo wa nzuwa, eto kohoindjiveliwa aliba wonga ja mitalre nnga vini aFilistewu. Atwinyu anavwanana na joira ja atu a unde. 7Mwilamboni mwewa muindjivile parata na oru. Jorayela jiwa kajinawanda kontareya. Mwilamboni mwewa muindjivile kavalo, eto aaterelado ewa a kondoni bohokontareya. 8Mwilamboni mwewa muindjivile vikwamutu josema. Anakokorela jengo jisakannye atu na mandiwa, jengo jisakannye atu na jibuno jiwa. 9Na mwasa wenno mutu unoyevihiwa, mutu uli watene unotitihiwa. Nyo Yehova kamwalevelele. 10Nyo atu abure volowani pawoni eto vitalani mulihani muwari motawa uwali wa Yehova na undimuwa wa umwene waye. 11Aliba jurungula anoza katitihiwe. Atu oziveliwa jovitukulela anoza kayevihiwe. Yehova eka gunafuna za teteliwa siku neno.
12Tchoira Yehova wa Makuru Matene ukana siku naye, ti siku nnafuna liye atitiha atu atene ovitukulela eto ogwela, vamohi na atu ovitetela na atu atene ojingari. 13Unoza agwade mitengo datene da seduru#2:13 mitengo datene da seduru: Muwari mwa maversikulu 13-16, nnovwa ira Mulugu unafuna atolotche mitengo na mwango vamohi na mwadeya. Ejo jinatapulela ira Mulugu unafuna aatolotche atu okana kopolo nnga mitengo eto olimba nnga mwango eto ooneya nnga yengo ya ibaribari nnga mwadeya dilukulu. Nione 2:12,17. nnafwanyeya Libano, eto unoza agwade mitengo datene da karvaliyo nnafwanyeya Bazani, dedo dili dolapa eto da kopolo. 14Unoza atchile mwango datene dotama, eto unoza atchile mikuma datene dolapa, 15na nyumba diwa datene dolapa da agwarda vamohi na muru watene olimba orungunuwa sidadi. 16Unoza abwanyule mwadeya datene da Tarisi na vinyomoro nyomoro datene doriyihana mmba. 17Atu oviulukuliha anoza kayevihiwe, eto atu oziveliwa jovitukulela anoza katitihiwe. Yehova eka gunafuna za teteliwa siku neno.
18Pa evo vanafuna mala vikwamutu josema jatene eji. 19Yehova avenyaga ira atekenye ilambo na kopolo, atu anoza kavolowe mmafukweni anakala mabweni, eto anoza kavolowe miliha dotimbiwa vati, katawaga uwali wa Yehova, katawaga eto undimuwa wa umwene waye. 20Siku neno atu anoza katukulege vikwamutu josema, ja parata na ja oru, ejo jasakannye atu ira kajitamalelege, kaze katatilelege mwemo munakala anafuwo na anantutu. 21Anoza kadowe kavitalege mafukwe anakala mabweni, eto anoza kavolowe miliha da mmwangoni, katawaga uwali wa Yehova na undimuwa wa umwene waye. Jejo jinoireya Yehova avenyaga ira atekenye ilambo na kopolo. 22Kammunyindelege mutu nfwinyu ovuma na puno. Mwasiwa mutu kahi yengo.
S'ha seleccionat:
Izaiya 2: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral