Izaiya 16
16
Jimohi jiwa zela aMowabe
1Nyo akuda Mowabe rumani mwana nibila kumela sidadi ya Sela, kavire ndila ya kokola, ira kadowe kanvahe namatonga wa ilambo, wenno unakala Mwango wa Siyawu. 2Nnga vini mbalrame dabalaletchiwaga muitundjini muwa, sawasawa eto ahiyana a Mowabe anokala balala balala volambuwela muhindje wa Arinoni. 3Anaawandela akuda Juda ira: <<Muniwandele zelru, eto muniwandele inafuna hiyo ira. Nzuwa nili atu midiya, munivahe nfulri mulukulu nnga isi. Munikoye hiyo atu otamangihiwa. Kamuniwelihede hiyo atu otawa kondoni mmandani mwa amwidanihu. 4Munihiye hiyo atu otawa a Mowabe ira nikale vari venyu. Mukale vovulumuwela vehu mwasiwa nnaatawa aliba nioniha goyi.>>
Maliba oniha goyi avenyavo, eto nongiwa wamala eto maliba anyingalela akumamo mwilamboni, 5pa evo vanaza garateya mpando wa umwene moziveliwa ororomeleya. Mutu mmohi muibalini mwa Davi unoza agarativo mororomeleya. Liye jotonga jaye jinokala japama. Eto unoirana japama mobaranya mwene.
6Atu a Jeruzalemu anoza kawongege ira: <<Hiyo nnavwetcha zela vitukulela wa akuda Mowabe ira kovitukulela valukulu. Nnavwetcha eto zela jingari wewa, no vitukulela, na uwali wewa no vitetela wewa. Eto fwanyeya ira jatene ejo kajinna mabasa.>>
7Na mwasa wenno kaahiye akuda Mowabe kavinlele valukulu. Atene kanle. Katomole kuto zela mabolu a uva oumma kadja atu a Kiri-Areseti. 8Tchoira minda da Ejiboni na miratchi da Sibima dihimala zuzuma. Wanle tambi diwa dohofiya Jazeri, ante mukokolani ante kombela ya bara. Mbwenye andimuwa a malogo a atu kohomala gwada tambi do. 9Nnoza dinle no nla wa Jazeri na mwasa wa uva wa Sibima. Nnoza dunyetihe we Ejiboni na weyo Eleyale na misodi daga na mwasa oira jovaha jenyu ja ilimwe, eto johanda jenyu jihimala nongeya na kondo ilukulu. 10Mmindani mwakaletcha jalo pwi, ziveliwa no hagalala umala. Nyumbo daimbiwetcha kadinaimbiwegeve mmindani mwa uva, eto kavali kuwa muwari mwa minda dedo. Kavali finya uva mmamburo mwemo mwafinyiwetcha atu kasakanyaga vinyu. Kuwa wo hagalala tempu yohanda uva, peno dihimaliha. 11Na mwasa wenno ingumi yaga inanlela Mowabe nnga arpa. Eto mmirimani mwaga munanlela Kiri-Areseti.
12Akuda Mowabe kavivelela, kadowa, kamala ora ilukulu nimburo nogwela notamalela amilugu ewa, kadowa nyumba yolobela yewa, kalobela wewo, jejo kajinaapindulrave yengo.
13Ayo ba mazu Yehova awongile liye wanle zela aMowabe. 14Mbwenye peno Yehova unawonga ira: <<Vahanamale yaka taru, mohara mwemo maliba ganyo unakontaretcha liye yaka daye,#16:14 Vahanamale yaka taru, mohara mwemo maliba ganyo unakontaretcha liye yaka daye: Ku wonga kavinakala wendjeda malambo. Tchoira maliba ganyo unoiziwa malambo avwananne liye na patarawaye ira alabe. Malambo anno kamala, kanawendjeda malambo amohiwa ahavwananne na patarawaye. masiki malogo aye kaindjive, undimuwa wa Mowabe unoza usanduwe, ukale petiwa. Eto ale anafuna hala anakala ang'onong'onove eto ovuta.>>
S'ha seleccionat:
Izaiya 16: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral