Izaiya 11
11
Zela umwene wa murendele wa Namatikeliwa
1Inoza ipwete yopwetela ya nigodo na Jese,#11:1 yopwetela ya nigodo na Jese: Jese gu Davi babaye. Yopwetela inawongiwa gu Yesu Kiristu. (Matewuji 1:1) ikala tambi inafuna pweta mmutchitchini mwaye. 2Munemba wa Yehova unoza akale na liye, agali Munemba ovaha zelru no onelramo, Munemba ovaha jowelruza na kopolo, Munemba ovaha iziwa jengo no muova Yehova. 3Muova Yehova tchi yengo inafuna kala yomuhagalaliha. Liye kanatonga mohara riya wa mutu. Eto liye kanatonga milandu muwari mohara jengo jovwa. 4Mbwenye liye unoza atongege mwapama ira osimela kakayena ili yewa. Unoza atongege milandu da atu osimela mohoing'ana kove. Mazu okumela wanoni waye anoza kakale nnga golromondo yoabubudana atu a mwilamboni ya vati. Liye aroma tonga, atu otakala anoza kapiwe mowonga mwaye. 5Upama unoza ukale sintu nili mmwinini mwaye, eto roromeleya unoza ukale sintu nnafuna liye wara.
6Mwanambwa wa mukokolani unoza akalege vamohi na mwana nibila. Nyarugwe unoza agonege vati vamohi na mwana mbuzi. Mwana ng'ombe na podogoma na mwana ng'ombe yoruva anoza kawendege vamohive. Eto mwana mung'onong'ono gunafunege akumbuza. 7Ng'ombe na urusu anadjege mpinda vamohive eto ahimiwa anagonege vamohive. Podogoma unadjege malatchi nnga ng'ombe. 8Mwana owamwa unawalredege vamulihani va namarawe. Mwana uhiyile wamwa tchineneva unerege volotchiha ndanda naye pawoni wa ivili eto kaza alumiwa. 9Kaviza vikala yengo yoporotcha owu yengo yomunonga mutu va mwango otchena watene wa Mulugu, mwasiwa atu atene a mwilamboni ya vati makalelo anafuna atu muiziwa Yehova anokala nnga makalelo mahindje anazala atu bara.
10Siku neno mwene muxa okumela mutchitchi wa Jese unoza akayena ionihedo para atu a malogo matene, atu atene anoza kanfukedege eto nimburo naye novuma nnoza nikale nokana undimuwa.
Mulugu unoza aagumanihe atwaye
11Siku neno Nabwiya unoza atapule ndanda naye fendo yanembinli ira aawombole atwaye ohala anakala Asiriya eto anno anakala Ijipitu, na ilambo ya Pataroji, Etiyopiya, Elamu, Sinari, Hamate, na vasuwa vili vatene va bara Mediteraniyo. 12Unoza atomeye bandera para malogo a atu a unde, eto unoza aagumanihe atu otamangihiwa a aIzarayeli, vamohi na odimela a Juda anno kabalaleyele pandi dannayi dene da ilambo ya vati. Liye unoaweliheda akoka mwilamboni mwewa.
13Sandje ya akuda Efarayimi inoza imale. Eto ale kaaonihetcha goyi akuda Juda anoza kagwadiwe. Akuda Efarayimi kiza kakana sandje na akuda Juda. Akuda Juda eto kiza kakana sandje na akuda Efarayimi.#11:13 sandje na akuda Juda… sandje na akuda Efarayimi: Efarayimi ali nlogo nlukulu na umwene wa Izarayeli. Idana wewo waromile wanle. Tchoira vakwile Sawuli mwene oroma wa aIzarayeli atene, aIzarayeli kohogaweya, aliwa kala maumwene menli, umwene umohi wa Davi, umohiwa kala wa mwana Sawuli. (2 Samuweli 2:4-10) AIzarayeli kohofiyeda muhambiha Davi ira akale mwene wa aIzarayeli atene. (2 Samuweli 5:1-5) Mbwenye Davi na mwanaye Salomawu kagakwile, vohoza gaweya muwari mwa aIzarayeli akoka, aliwa kala maumwene menli. (1 Amwene 12:15-20) 14Mbwenye Juda na Efarayimi anoza kawane kondo na aFilistewu mavirelo wa nzuwa, eto anoza kaawake atu a makumelo wa nzuwa jorayela jiwa. Anoza kaagondjihe akuda Edomu na akuda Mowabe. Eto akuda Amoni anoza kaavwelele aliwa.
15Evale Yehova unoza aummihe muhindje mulukulu ukumile bara ya Ijipitu, eto unoza aombihe nipevo nokaha, na ndanda naye na kopolo unoza aummihe muhindje Eufarati. Evale muhindje ule unoza agaweye mihindje ding'onong'ono mitanu na minli, ira atu kawandege lambuwa kagawarile xineli. 16Unoza ukale rampa nlukulu nokumela Asiriya ira ohala a atwaye kaviremo. Inoza iireye nnga yaireyile na aIzarayeli kakumaga ilambo ya Ijipitu.
S'ha seleccionat:
Izaiya 11: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral