2 Amwene 25
25
Goma wa umwene wa Juda
1Fwanyeya ira mwene Zedekiya atongaga, vagamanle yaka tanu na nnayi, malambo kumi a mwedi wanekumi, mulombwana Nabukodonozore mwene wa Babiloniya, ohovenyaga akoka na nikuru naye na anyakondo, aliwa za Jeruzalemu. Kagazile kohokungaga misasa unde wa sidadile, aliwa irindja sidadile kasakanyaga makalelo oira kavolowe. 2Evale sidadile yohokala yorindjiwene fiyeda yaka yanekumi na imohi ya umwene wa Zedekiya. 3Mwa enne kakwakwanaga malambo matanu na mannayi a mwedi wanennayi, musidadi mule mohokala ndala yohokala ya masika, tchaoneya yengo yodja ili yatene ira atu kafwanyeya emule kadje. 4Evale anyakondo ale kohogudjulaga fulrango muwari mwa muru wa sidadile. Evale alombwana atene owana kondo a Zedekiya kohotawaga na mahiyu kaharaga ndila ya mulango afwanyeya vari va miru minli, wandamelana mmundani mwa mwene. Tchoira tempu yenne aBabiloniya#25:3-4 aBabiloniya: Owu hehi: aKalidewu. Babiloniya ti nzina na ilambo. AKalidewu ti nzina na atu kakala muwari mwa ilambo ya Babiloniya. Ku wonga Nabukodonozore ali mwene oatonga aKalidewu anno kafwanyeya kagali anamurala a ilambo ya Babiloniya. kafwanyeya kagamanle rindja unde wa sidadile. Eto mwene Zedekiya na liyene ohotawaga, liye haraga ndila yodowa ndabo na Jordawu. 5Mbwenye anyakondo a Babiloniya ale kohomuharaga mwene Zedekiya ule ante aliwa dowa nfwanya ilambo yotandeleya ya Jeriko. Kaganfwanyile, nikuru naye na anyakondo nohobalaleyaga, aliwa muhiya ekave. 6Evale anyakondo a aBabiloniya ale, kohomutukula mwene Zedekiya, aliwa mudowana wa mwene wa Babiloniya. Tempu yenne mwene wa Babiloniya afwanyeya Ribila. Kaganfiyilena wewule, mwene Zedekiya ohotongiwa. 7Ahima a Zedekiya, kohatukula, aliwa apa vamentoni vaye, babiwa aing'anaga. Noira eno, kohotwaga meso a Zedekiya, aliwa mmanga na makurenti menli a mukuwa, aliwa mudowagana Babiloniya.
8Nabukodonozore mwene wa Babiloniya agamanle yaka 19 atongaga, siku nanetanu na mbinli na mwedi wanetanu, mulombwana Nebuzarada, mundimuwa wa agwarda, namalaba wa mwene wa Babiloniya ohoza Jeruzalemu. 9Mulombwana Nebuzarada agazile Jeruzalemu ohotumeyaga Nyumba ya Yehova, na nyumba ya mwene, nyumba da andimuwa atene vamohi na nyumba datene dofuneya da Jeruzalemu. 10Eto nikuru natene na anyakondo a aBabiloniya kafwanyeya vamohi na mundimuwa wa agwarda ule, kohobwanyulaga muru wa Jeruzalemu. 11Eto atu amohiwa anno mwene Nabukodonozore aahiyile liye musidadi mule vamohi na atu atene anne karumenle tongiwa na mwene wa Babiloniya vamohi na atu amohiwa, mulombwana Nebuzarada mundimuwa wa agwarda ule ohatukulaga atene anne, liye adowagana Babiloniya nnga atu ohindiwa. 12Mbwenye atu amohiwa osimeletchetcha a mwilamboni mule, ohahiya ira kakale aliba sakanyeda minda da uva vamohi na jolima jimohi jiwa.
13Eto aBabiloniya ale kohotwaga mambozo a mukuwa anno kafwanyeya muNyumbani mwa Yehova, vamohi na matiwa vamohi na tanki ya mukuwa jejo jafwanyeya muNyumbani mwa Yehova.#1 Amwene 7:15-22 Eto kohotukulaga mukuwa watene wenne, aliwa dowagana Babiloniya. 14Eto kohotukulaga mapanela, na paya, na jotimihana panti vamohi na parato dahelamo atu jonukela vamohi na jolabana jatene ja mukuwa jejo jalabetchana atu. 15Eto mundimuwa wa agwarda ule ohotukulaga matijela otukulana makalra ohinda vamohi na mabasiya eto malringana yengo ili yatene yafwanyeya yagali ya oru nari ya parata liye ohotukula. 16Eto fwanyeya ira mambozo amenlene ale, na tanki ile, vamohi na matiwa anno asakanyile Salomawu para Nyumba ya Yehova, indjiva wa mukuwa para sakanyana mabasa matene anne, ali mukuwa oindjivetchetcha, ohowanda pimeya. 17Kada nimbozo lapa uwa ali tamangelaga mameturu matanu na mararu. Kada nimbozo nokana ntimwati na mukuwa. Kada ntimwati lapa uwa ali wandamelana meturu imohi na meya. Eto maredi na jovaha ja romaya jejo jawerewerihedile atu matimwati ale, jatene jene jali ja mukuwa. Eto kada nimbozo makaleluwa ali olingana na nimbozo nfwaye.
18Eto mundimuwa wa agwarda ule ohomutukulaga namakuta mundimuwa aitaniwa Seraya vamohi na namakuta omuharela aitaniwa Sofoniya vamohi na agwarda araru a va mulango. 19Eto ohomutukulaga musidadi mule musogolrelri mmohi wa anyakondo, vamohi na atu atanu anno kali anamawelruza a mwene, vamohi na namalrembelra wa nikuru na anyakondo, wenno aalrembetcha atu ira kadowege kondoni, vamohi na alombwana 60 kafwanyeya muwari mwa sidadi ya Jeruzalemu. 20Mulombwana Nebuzarada, mundimuwa wa agwarda ule, agaatukunle atu atene anne, ohadowagana wa mwene wa Babiloniya, sidadi ya Ribila wewo wafwanyeya liye. 21Evale mwene wa Babiloniya ohabubudihaga na makalelo ohokala a masika, nomala eno ohapaga sidadi ya Ribila ule, mwilamboni mwa Hamate.
Ala ali makalelo nlogo na Juda katukuliwe atu nnga atu ohindiwa kadowiwagana mwilamboni mwa annya.
Tawa wa ale kahanle muwari mwa ilambo ya Juda
22Zela atu anne kahanle mwilamboni mwa Juda mule, anno Nabukodonozore mwene wa Babiloniya aahiyile liye, ohavaha mulombwana Gedaliya ira atongege. Gedaliya ali mwana Aikawu, muzula wa Safani. 23Fwanyeya ira asogolrelri a anyakondo a Juda kahanle mwilamboni vamohi na anyakondo ewa kagavwile ira mwene wa Babiloniya anvahile undimuwa mulombwana Gedaliya, kohomaruwa, aliwa za nfwanya mulombwana Gedaliya Mizipa. Asogolrelri kazilege ba ala: Jomayili mwana Netaniya, Jowanani mwana Kareya, Seraya mwana Tanumeti nkuda Netofa, Jazaniya mwana Makate. Asogolrelri atene anna kada mutu ozaga na anyakondo aye. 24Kagazile wa Gedaliya, mulombwana Gedaliya oholumbelaga wa aliwa vamohi na anyakondo ewa aawandelaga eraga: <<Kamuove na mwasa okala azari a aBabiloniya. Mukale mwilamboni munafwanyeya nyo mwemo, mmulabege mwene wa Babiloniya. Mwaira eno jenyu jinerege uwendelani pama.>> Nomala eno, kohodowa garati mmavande mwiwa.
25Mbwenye mwedi wanetanu na mbinli,#25:25 mwedi wanetanu na mbinli akala nnga kalendariyo wa aJudewu unakala mwedi wa Setemburu owu Outuburu. Tchoira kalendariyo wehu unohiyana na kalendariyo wa aJudewu. mulombwana Jomayili mwana Netaniya, muzula wa Elizama, wenno ali wa muibalini mwa mwene, ohovenyaga na alombwana kumi, aliwa dowa mpa mulombwana Gedaliya vamohi na alombwana a Juda na aBabiloniya amohiwa kafwanyeya vamohi na liye Mizipa ule. 26Noira enne, atu atene romela ahima ante dowa andimuwa atene vamohi na asogolrelri atene a makuru a anyakondo, kohoroma aova aBabiloniya. Na mwasa wenne, kohotawela Ijipitu.
Kutchiwa wa mwene Jowaki mukadeya
27Vagamanle yaka 37 romela tempu yatukuleliwe Jowaki mwene wa Juda Babiloniya, mulombwana Evili-Merodaki, ohoroma tonga umwene wa Babiloniya. Yaka yoroma yatonga liye, kakwakwanaga malambo 27 a mwedi wanekumi na mbinli, Evili-Merodaki ule na tangaranga daye ohomukutcha Jowaki mukadeya. 28Mwene ule ohomuirela mulombwana Jowaki upama, liye nvaha undimuwa akwaranya amwene amohiwa kafwanyeya na liye Babiloniya. 29Eto ohomutchindjaga jowara ja mukadeya jejo jawara liye, liye nvaha jowara japama. Eto kuma evale dowa sogolro, Jowaki adjetcha vamohi na mwene wa Babiloniya ule malambo matene okalawo waye. 30Eto roma siku nenne dowa sogolro, malambo matene mulombwana Jowaki ovahiwa jengo jomukamiheda kalawo waye watene.
Kukala mazu a livuru na 2 Amwene.
S'ha seleccionat:
2 Amwene 25: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral