2 Amwene 24
24
1Malambo atonga mwene Jeyowaki, mulombwana Nabukodonozore, mwene wa Babiloniya ohovenya, liye za ira awane na mwene Jeyowaki. Mbwenye mwene Jeyowaki ohonvepa ira ahamuirele yabure, liye roma mulabaga. Mbwenye vagamanle yaka taru, mwene Jeyowaki ule ohokonda tongiwa na mwene Nabukodonozore ule. 2Evale Yehova oharuma anyakondo a aBabiloniya na anyakondo a Siriya na anyakondo a Mowabe vamohi na anyakondo a aAmoni ira kadowe kaatolotche akuda Juda mokwakwanela na mazu a Yehova awongile liye muwari mwa anamalaba aye anno anafwanyeya kagali anamafiyiheda. 3Na ibaribari jatene ejo johoireya nnga mwawongele Yehova. Yehova ohofiyeda anyanyala akuda Juda na mwasa wa jotega jatene jairile Manasesi, 4eto na mwasa wa sangiri neno navuvihile liye vahali mwasa, azalihaga sangiri muJeruzalemu. Na mwasa wenne, Yehova kafunne akurumuwela.
5Joira jimohi jiwa ja mwene Jeyowaki, vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Juda. 6Jeyowaki ohokwa, liye dowa vuma na makolo aye. Noira eno, mwanaye Jowaki gwahambile umwene vamalroni vaye. 7Eto mwene wa Ijipitu mwilamboni mwaye kakumilemo akoka, mwasiwa mwene wa Babiloniya ohomala mugondjiha, liye tukula vilambo datene datonga liye, romela mwana muhindje wa Ijipitu fiyeda muhindje Eufarati.
Maromelo otukuliwa wa nlogo na Juda
8Jowaki aromaga tonga anna yaka 18. Liye atongile medi miraru muJeruzalemu. Mmaye nzina naye aitaniwa Neusta, mwana Elinata, wa Jeruzalemu. 9Mwene Jowaki ohosakanya jabure vamentoni va Yehova, molingana na makalelo matene nnga airile babaye.
10Mwa tempu yenne anyakondo a Nabukodonozore mwene wa Babiloniya kohovenya, aliwa dowa Jeruzalemu, aliwa irindja sidadi yatene. 11Evale anyakondo aye kagamanle irindja sidadi yatene, Nabukodonozore mwene wa Babiloniya na liyene ohozaga ira awane na sidadile. 12Mwa enne Jowaki mwene wa Juda, vamohi na mmayene, na anamalaba aye na asogolrelri aye, anamalaba aye a palasiyo atene, kohodowaga vivelela wa Nabukodonozore mwene wa Babiloniya. Evale mwene Nabukodonozore ohatukulaga aliwa atene, liye ahela mukadeya. Yaka yenno yahela liye kadeya ali yaka yanetanu na taru kuma varomile liye tonga. 13Mwa enne mwene Nabukodonozore ohokumihagamo jengo jatene jakoyiwe munyumbani mwa Yehova, vamohi na jatene jakoyiwe munyumbani mwa mwene eto ohomalaga twa jolabana jatene ja oru jejo jasakanyile Salomawu mwene wa Izarayeli ahela munyumbani mwa Yehova. Jatene ejile johoireya nnga mwemo mwawongele Yehova.#2 Amwene 20:17 14Eto mwene Nabukodonozore ohakumihagamo atu atene muJeruzalemu romela asogolrelri atene na alombwana atene a kopolo owanda wana kondo. Atu katukuliwe kokwakwana atu 10.000. Liye ohatukula eto aliba sema atene na alombwana atene olabana momba, nne kalivo amuhiyile liye. So kahanle ali atu osimeletchetcha a mwilamboni mule. 15Mwa enne mwene Nabukodonozore ohomuhinda muJeruzalemu mule mwene Jowaki vamohi na mmayene, na ahiyanaye atene, na asogolrelri aye, vamohi na andimuwa andimuwa, liye adowana Babiloniya nnga atu ohindiwa. 16Alombwana atene a kopolo okwakwana 7.000 na aliba sema atene, na alombwana atene olabana momba okwakwana 1.000, atene anna kagali alombwana owanda wana kondo, Nabukodonozore ohatukula atene anna liye adowagana Babiloniya. 17Mbwenye muJeruzalemu mule, vamalroni va mwene Jowaki, mwene wa Babiloniya ule amutukunle mwene Jowaki titiyu waye, babaye mbalaye aitaniwa Mataniya, liye muhambiha umwene. Eto agamuhambihile umwene, ohomutchindjaga nzina naye, liye nvaha nzina nimohi niwa, liye itaniwaga Zedekiya.
Tonga wa Zedekiya mwene wa Juda
2 Koronika 11-12; Jeremiya 52:1-3
18Mwene Zedekiya aromaga tonga anna yaka 21. Liye atongile yaka kumi na imohi muJeruzalemu. Mmaye nzina naye aitaniwa Amutali, mwana Jeremiya, nkuda Libina. 19Mwene Zedekiya ohosakanya jabure vamentoni va Yehova molingana na jatene jairile Jeyowaki.
20Jatene eji jaireyile na mwasa wa uwali wa Yehova zela Jeruzalemu vamohi na Juda, vafiyedile liye atamangiha vamentoni vaye. Noira enne, mwene Zedekiya, ohoroma konda tongiwa na Nabukodonozore mwene wa Babiloniya.
S'ha seleccionat:
2 Amwene 24: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral