Rom‑dãmbã 15
15
1Tõnd dãmb sẽn tar pãngã, tõnd tog n tebenda neb nins sẽn ka pãngã b pãn-komsmã pʋgẽ, la d da bao sẽn noom tõnd ye. 2Bɩ tõnd ned kam fãa maan sẽn noom a to, sẽn ya sõmb wɛɛngẽ, t'a tõe n bɩ. 3#Yɩɩn 69.10Bala, Kiris ka bao sẽn noom b meng ye, la a wa b sẽn gʋlsã:
Tʋy nins nebã sẽn tʋʋd yãmbã lʋɩɩ mam zugu.
4Mik bũmb nins b sẽn pĩnd n gʋlsã gʋlsa tõnd zãmsg yĩnga, tɩ tõnd tõe n paam saag-sõngo, sũ-mare la belsg ning Wẽnnaam gʋls-sõamyã sẽn kõtã yĩnga.
5Bɩ Wẽnnaam sẽn pid ne sũ-mar la belsgã sõng yãmb tɩ y paam tagsg a yembr taab yĩnga, wa a Zeezi Kiris sẽn datã, 6tɩ yãmb na kõ Wẽnnaam sẽn yaa tõnd Zu-soab a Zeezi Kiris ba wã waoogre, ne yam a yembre la koɛɛg a yembre. 7Reeg-y taab neer wa Kiris sẽn deeg yãmbã, Wẽnnaam waoogr yĩnga.
Kirisi, nebã fãa tʋmtʋmda
8Sɩda, mam yetame tɩ Kiris lebga zũnsã tʋmtʋmda, sẽn na yɩlg n wilg tɩ Wẽnnaam yaa sɩda, la b wilg tɩ bũmb nins Wẽnnaam sẽn dag n kãab b ba-rãmbã yaa sɩda. 9#2Sãm 22.50, Yɩɩn 18.50La buud a taabã neb waoogda Wẽnnaam, b nimbãan-zoeerã yĩnga, wa b sẽn da gʋls n yeelã:
Rẽnda n kɩt tɩ mam na n gom soolem-dãmb sʋk n wilg
tɩ m mii yãmba, la m na n yɩɩlame n waoog y yʋʋrã.
10 #
Tõ 32.43
B leb n yeelame yaa:
Soolem-dãmbã, lagm-y Wẽnnaam nebã n maan sũ-noogo.
11 #
Yɩɩn 117.1
N leb n paase,
soolem-dãmbã fãa nebã, pẽg-y Zu-soabã,
la tɩ tẽms toay-toay nebã pẽg bãmba.
12 #
Eza 11.10
A Ezayi me yeelame yaa:
A Izayi yagengã na n pukame.
B na n yikame n soog soolem-dãmbã.
Soolem-dãmbã neb tẽeb na n bee ne bãmba.
13Bɩ Wẽnnaam, saag-sõng sẽn yit a soab nengẽ wã pid yãmb ne sũ-noog fãa la bãan fãa tẽeb pʋgẽ, tɩ saag-sõng na pid yãmba, Sɩɩg-sõng pãng yĩnga.
A Poll tʋʋmde la a saagre
14Sã n yaa ne yãmb yelle, m ba-biisi, mam sũur kɛɛm tɩ yãmb pida ne sõmblem, la y pid ne bãngr fãa, la y yaa neb sẽn tõe n keoog taaba. 15Baoosgo, bũmb kẽer pʋgẽ, mam gʋlsa yãmb ne gãndalsem, wa m dat n kɩtame tɩ yãmb tẽeg bũmb nins y sẽn mi, la yaa Wẽnnaam sẽn maan maam neere, 16n kɩt tɩ mam ya Kiris tʋmtʋmd buud a taabã sʋkã yĩnga. Mam maanda Wẽnnaam koe-noogã tʋʋmd sẽn ya tẽeb bũmbã, tɩ buud a taabã nebã na yɩ wa kũun sẽn noom Wẽnnaam, neb Wẽnnaam Sɩɩg-sõng sẽn welg toor Wẽnnaam yĩnga.
17Dẽ, mam tara bʋʋm tɩ waoog m meng Kiris pʋgẽ, Wẽnnaam taoore. 18-19Bala, mam ka na n saag n pʋd bũmb yelle, tɩ ka Kiris sẽn tũnug maam n maane, sã n yaa m goamẽ, wall m tʋʋmẽ, tɩ ne Sɩɩg-sõng pãnga, la m maan bãn sẽn tar pãnga, la ne bõn-yɛɛsdse, tɩ m tõe n sõng buud a taabã neb tɩ b sak Wẽnnaam. Yaa woto yĩnga, sẽn sɩng ne Zeruzalɛm, n gilg hal tɩ ta Iliri, mam moona Kiris koe-noogã wʋsgo. 20La mam yãka yam tɩ moon koe-noog zĩis nins b sẽn zɩ n pʋd Kiris yʋʋrã ye, tɩ m da wa n me ned a to yẽbgr zug ye. La a wa b sẽn gʋls n yeelã:
21 #
Eza 52.15
Neb nins sẽn ka gom bãmb yell b sʋkã na n yãame,
la neb nins sẽn dag n ka wʋm b kibarã,
na n wʋma a võore.
22 #
Rom 1.13
Rẽnda n gɩdg maam naoor wʋsg tɩ mam ka wa yãmb nengẽ ye. 23Moasã, mam ka leb n tar tʋʋm zĩig soolem-kãens ye. La hal yʋʋm wʋsgo, mam da ratame tɩ m sã n wa n dabd Ɛspayẽ, bɩ m tũ yãmb nengẽ. 24Mam maanda tẽeb tɩ m sã n wa n loogdẽ, m na yãnd-yã, la m yamleoog tɩ zĩnd ne yãmbã sã n doke, y na yãag-m n kẽng Ɛspayẽ.
25 #
1Kor 16.1-4
Moas-moasã wã mam dabda Zeruzalɛm, nin-sõamyã sõngr yĩnga. 26Bala, Masedoan ne Akayi nebã yãka yam n lob taab ligdi n na n sõng naong rãmbã sẽn be ba-biisã sʋk Zeruzalɛmã. 27#1Kor 9.11Yɩɩ bãmb yam-yãkre, la yaa bũmb b sẽn da segd n maane. Bala, buud a taabã neb sã n paama pʋɩɩr ne bõn-sõamy nins sẽn be Zʋɩf-rãmbã nengẽ tẽebã wɛɛngẽ wã, bãmb me tog n sõnga Zʋɩf-rãmbã ne b yĩngã yelle. 28B sẽn maan a woto wã, mam sã n tɩ kɩs ligdã n sa, mam na n yii be n tũ yãmb nengẽ n kẽng Ɛspayẽ 29Mam miime tɩ m sã n wa wat yãmb nengẽ, yaa ne Kiris barkã la m na n wa. 30M ba-biisi, mam sagenda yãmb ne tõnd Zu-soab a Zeezi yʋʋre, la ne nonglem Sɩɩg-sõng sẽn kõtã, tɩ y naag ne maam n zabe, y sẽn na n pʋʋs mam yĩnga, 31tɩ mam tõe n paam yolsg ne ka-tẽeb rãmb sẽn be Zʋʋde wã, la tɩ nin-sõamyã na reeg kũunã mam sẽn tar n kẽnd Zeruzalɛmã sõama. 32Woto, sã n ta Wẽnnaam yam, mam na n taa yãmb nengẽ ne sũ-noogo, la mam na n paama vʋʋsem bilf yãmb sʋka. 33Bɩ Wẽnnaam sẽn so laafɩ wã zĩnd ne yãmb fãa. Ãmina!
S'ha seleccionat:
Rom‑dãmbã 15: MPBU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Moore Bible © Bible Society of Burkina Faso, 2014.