USUKUYONY 4
4
Mwiindye iruveu
1Numa ya efyo, shoorwa mwaango wa iruveu wiirwiikaa, na unyanga lulya lwa mbee shelwiita luvakye unyanga lwa iranda lukarera na yeny, lukaamba, “Saama kushe kunu, na yeny nshekoraa findo fishekaa-fo numa ya efyo.” 2Naasa shaipowa Mmumuyo, shalollya kitima kya itumbe kyikee kivike iruveu na umwi akee kitiminy ekyo; 3na yeto akee rembo uwe ya vayo avakkye iwe lyimika mikaa, na ukova lwa mmbwa lukaringyitya kitima kilya kya itumbe, lukava sha sumaradi. 4Na fitima makumi avii na fiina fikaringyitya kitima kilya kya itumbe, na yoo fitiminy efyo shalollya vamiku makumi avii na vaana vefikaye, varee soori shaa; na mirweny vakaraa ngyureto ta saabu. 5Na yoo kitiminy yekyo kya itumbe kukauka-u ukova lwa muro na unyanga lwa iruruma. Na taa mfungare ta muro tikaaka mbee ya kitima kilya kya itumbe, yeyo nnyo Mimuyo mfungare ya Iruva. 6Na mbee ya kitima kilya kya itumbe kweiyo yeeve lya kilola, sha bilauri; na yoo nnang'ani ya kitima kilya kya itumbe na taari ta vayo toose, veiyo fyuumbe vaana vakee na muu, vatiri miso mbee na numa. 7Na yeto atiri muu wa mbee kavaka miiso; na yeto atiri muu wa kavii avakkye ngashe, na yeto atiri muu wa kararu kavaka kisangu kya nndu wa vandu; na yeto atiri muu wa kaana kavaka ngoru irumbukaa. 8Na yeva vatiri muu vaana wo umwi mmbo etiri maaru arindaru, na taari toose kipoo na kimmba vakaringyityo ni miso, nta mmbakeeimuya kio na nsanyiny-fo, veshambaa, “Mweele, Mweele, Mweele ni Nndumi Iruva muni matorito, yeto eiyo, aifo nawe asheshaa.”
9Na yewo vatiri muu vaana vakeeniinga yeto akee rembo yoo kitiminy ekyo kya itumbe nnduma, na wiindi na fyaanu, yeto akee na muu llung'anu na llung'anu. 10Llyo vamiku yewo makumi avii na vaana vakafiirya ndi si yoo mbee ya yeto akee rembo yoo kitiminy yekyo kya itumbe, nawo vakamfiirya ndi yeto akee na muu fika llung'anu na llung'anu, nawo vakeerya ngyureto tawo mbee ya kitima kilya kya itumbe, veshambaa, 11“Yewe Nndumi weeru na Iruva weeru, mmbo kusumani iwarya itumbe na wiindi. Mashika ni yewe kuumbye findo fyoose, na kyeendwa ni ikunda lyafo fikakaa-fo, nafyo fikaumbwa.”
S'ha seleccionat:
USUKUYONY 4: MAS2
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.