USUKUYONY 3
3
Nrumi ya Sardi
1“Na kwa nsu wa siri ya Sardi reiya indi: Yefi mfyo yeto atiri Mimuyo yeyo mfungare ya Iruva akeeamba, na nyinyiri tilya mfungare. Shiishi mashora afo, kya yaamba mmbo kutiri irina lya muu kyaindi lyo mmbo kufiiye. 2Lala shoovi, kuvangyise yefyo fisaaye-fo fikee kufii ifwa. Mashika nshilelollya mashora afo asongovye mbee ya Iruva wakwa-fo. 3Kummbwany shaasa kileva na shaasa kuleita, tira efyo kukurye. Lyo kwanra kulakurya mmbo nkusheyaa sha inyinyi, nta nkumanyaa kyeeri ekyo nsheshaa kwafo-fo. 4Lyo kusaae-fo marina maangu efo Sardi, a vandu valaketefura soori tawo. Nawo mmbo vashendaa veriyani na yeny veree soori shaa, kimmba kivasumannyi. 5Yeto ashevingaa mmbo avikwa indo soori shaa, nta nshisheutaa irina lyakwe efo kyitabuny kya muu-fo na yeny mmbo nshekureekyaa irina lyakwe mbee ya Ndeakwa, na mbee ya vasu vakwe. 6Yeto atiri kuri, navearanya irero elyi Mumuyo avia siri.”
Nrumi ya Filadelfia
7“Na kwa nsu wa siri ikee Filadelfia reiya indi: Efi mfyo yeto akee Mweele akeyaamba, nawe mmbwa dede, arye ufunguo lwa Davidi, yeto mwirua kulaifo ashiidimaa ifinga, nalyo kamfinga kulaifo ashidimaa irua. Shiishi mashora afo. 8Lola, mmbo shakoora mwaango ukee murwe mbee yafo, nato kulaifo aidima iuraya, mashika ukeemwikare, na yewe mmbo kulelatya irero lyakwa, nta nkulemina irina lyakwa-fo. 9Lola mmbo shakuniinga yewo va ironda lya Satana, yewo vashambaa wo ni Vaisraeli nawo nshi wo-fo, mmbo vakeyaamba wongo, lola mmbo nshevarumaa vashefirya ndi yoo marendeny afo, na imanya sheelyi mmbo shikukundye. 10Mashika elyi kulekutira na irero lya usisiryo lwakwa, na yeny mmbo nshekuringaa, kukye fyeeri efi fya yeeswa yefyo fisheyaa ulana loose, nafyo mmbo fisheesaa yewo woose vakee urukeny. 11Mmbo nkeesha uviny. Tira ekyo kutiri tapu, naambo kulave nndu akusoka ureto lwafo. 12Yeto mwiivinga mmbo nshemwallwa ngo ya mmba ya Iruva wakwa, nta nnyashukaafo-fo, na yeny mmbo nshereiyaa yoo uwe yakwe irina lya Iruva wakwa, na irina lya Yerusalemu yeyo shiiya, ushoolokaa uuka iruveu kwa Iruva wakwa, utiri irina lyakwa elyo iiya. 13Yeto atiri kuri navearannya irero elyi Mumuyo aifo ivia siri.”
Nrumi kwa Laodikia
14“Na kwa nsu wa siri ya Laodikia reiya indi: Efi mfyo akeyaamba yeto akee Amen, akee Nkureekyi wa dede nawe eefo uka elyo Iruva aleumba ulana. 15Shiishi mashora afo sheelyi nkukee mbeo nta muro-fo, kyeevaa kyeni kukooye kwevaa mbeo ao muro. 16Kyasiany, kimmba kutiri ngukumu, kulakee nta mbeo nta muro, mmbo shikumishaa kuuke kaniny kyakwa. 17Mashika mmbo kukeyaamba, yeny mmbo shikee isimba, mmbo shankuvika isimba, nkwiifo nta kindo kishitinnyi-fo, na yewe nta nkwiishi sheelyi kukee nkiva, kwavetirwa nnyinyira, na nkiva na mfu miso na mbereto. 18Mmbo nkee ikuniinga urango, kuure kwakwa saabu ikee shisangye na muro, llyo kuveny isimba; kuraa na soori shaa pyai, sony tafo teeva mbereto tisikkywa, na nri wa yaamba miso afo naambo kulollye. 19Woose yewo shivakundye mmbo shavakyeemya na ivakapa; naasany marukkya kukurye. 20Lola-te, ekakau shisalalyi yoo mwaangony shyuukapa-kapaa; kwakooya nndu aita unyanga lwakwa kashiruya mwaango, mmbo nshangaa kwakwe shilye nawe shoonga, nawe nalye na yeny. 21Yeto mwivinga mmbo nshenningaa mwaanya wekaa na yeny kitiminy kyakwa kya itumbe, shaasa na yeny shilevinga shakaa na Ndeakwa kitiminy kyakwe kya itumbe. 22Yeto atiri kuri navearannya irero elyi Mumuyo avia siri.”
S'ha seleccionat:
USUKUYONY 3: MAS2
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.