VAEBRANIA 9
9
Miindye ya Ulaniny na ya Iruveu
1Naasany naakwa nkyaasa kilya kya mbee mmbo kyevikye uramba lwa miindye, na ando a vayo eele a yaa ulaniny.
2Mashika yeema mmbo lyilesongosyo, llya lya kipooka, lyikavikyo ekyerya taa, na mesa, na mikate ya Myoorye, ng'ng'u alevaangwa Eele. 3Na yoo numa ya isullya elyo lya kavii, yeema llya lyivaangwa Eele kwa Kweele, 4lyitiri kirembo kya saabu, na isanduku lya kyaasa lyikee isengetye nsaabu riti, mfo kweiyo na ikopo lya saabu lyetiri mana, na nsengye ulya wa Aron ileshau, na mapoo alya a kyaasa. 5Na uwe ya vayo kukaa-u makerubi na itumbe, akavikya kitima ekyo kyesarya nruve; naasa nta llutiri mwaanya wa yoongwa mbony ta findo efyo fyoose kimwi kimwi-fo. 6Naasa findo efyo fikimaa isongosyo indo, wo kyeeri makohani mmbo veshangaa efo yeemeny elyo lya kipooka, vakainutya mirumwa ya miindye. 7Kyaindi efo yeemeny yelyo lya kavii nkohani nnini mmbo eshangaa-fo we muni, na lyimwi nsi wo mwaaka, na samu yeyo yeningyaa kimaruma kyakwe muni na kya ngyulyamari ta itura imanya lya vandu yewo. 8Mumuyo Mweele eshoraa mbony yei, sheelyi shia ya yaanga ando eele nnyensukuwa paa-fo, yoo yeema llya lya kipooka lyeiyo. 9Elyo llyo kyaaso kya kyeeri ekyi kya ulaalu, kyeeri ekyo fyaanu na firaso fyekora na muro, nayo filashidimaa isongovisa nndu yeto akee iindya, 10kyimmba ni uvavaso lwa ngata ya mwiili-da, fyeelya na fyeena neesamba yefyo fyekee fivavasye fika kyeeri kya usongosyo wiiya.
11Kyaindi elyi Kristo ammaa isha, akee nkohani nniini wa findo efyo fishaa, atiri yeema iniini na lyawutye fyoose, lyilakee lyisongosye mmaako, nkyo kyaamba lyilakee lya yaa ulaniny elu. 12Nta kilakee kya samu ya mburu na ngashe, kyaindi kya samu yakwe muni, mmbo aleanga lyimwi nsi ando yoo Eele, ekimaa itira iwouwa lya llung'anu. 13Mashika kwakooya samu ya mburu na ya shau na ifu lya ngashe ya ng'umbe yeyo valefwallyo yewo vetirwa nkyirinda kya mwiili nawo vakasambika, 14a samu ya Kristo nshi mmwasi, yeto kyeendwa ni Mumuyo wa llung'anu mmbo alekuuta we muni kwa Iruva kava kiraso kya ulyamari, mmbo ishemusangyaa makusaro any na mashora any mafu. 15Kimmba ni indo mmbo akee Nrumi wa Kyaasa Kiiya, naambo, ufu lukammekaa-u kimaruma kya yuuta filya fikasha filetanwa kyeeri kilya kya kyaasa kilya kya mbee, yewo vakee vavaange vawarye kyaasa kya ding'u ya llung'anu. 16Mashika alya kyaasa kya ding'u kikai, nkuti ufu lwa yeto alekivika lukee-u. 17Mashika kyaasa kya ding'u yeyo mmbo kitiri finya alya ufu lwa nndu (we Kristo) lulesheya; mashika kilya kilatiri finya, elyi ulya alekivika akee na muu. 18Naako nkyaasa kilya kya kipooka nkilevikwa kulaiyoo samu-fo. 19Mashika wo ivavaso shaasa lyilererwa ni Mose kwa vandu yewo woose, shaasa uvavaso luleamba, mmbo alewarya samu ya ngashe na ya mburu ando amwi na mafwaa a yaari adodorye na hisopo, kananatya kyitabu ekyo kyeni, na vandu yewo woose, 20kaamba, “Yei nnyo samu ya kyaasa ilevavasyo ni Iruva.” 21Na yeema elyo nalyo na fiiya fyoose fya miindye kafinanatya samu kiwo, 22neefo uvavasony kufii findo fyoose mmbo fyasangyo nsamu, na kulaiyo samu yapusuka nkwiiyo ifwaaywa-fo.
23Naasa kyikava nkuti mareiyo a mbony tikee iruveeu tifitwa-fo, kyaindi mbony ta iruveeu tiilyiso mfiraso fisha ngota to. 24Mashika Kristo nnyaleanga ando kweele kukee kusongosie mmaako-fo, nkyo kyaaso kya ando eele a dede, we mmbo aleanga iruveeu kweni, nalollyo yoo mbee ya kisangu kya Iruva kimaruma kyeru yese. 25Nta nshi akuutaa lyingyi na lyingyi-fo, shaasa llya nkohani nniini aleanga ando eele wo mwaaka na samu ilakee yakwe; 26kukooye ni indo, mmbo elyisoo ukyiva keengyi uka elyo ulana luumbwa; kyaindi ulaalu lyimwi nsi elyi kyeeri kyileinana, kaorwa paa, namaa ulyamari na kiraso kya muu wakwe. 27Na shaasa vandu vakee vavikye ufu lyimwi nsi, na numa yeefwa ni yaanduywa; 28na Kristo nawe, mmbo aleutwa kiraso lyimwi naambo neepoo ngyulyamari ta vandu veengyi, nawe mmbo asheshaa lya kavii, kulaiyo ulyamari, kwa yewo vembereya vaoni ukiro.
S'ha seleccionat:
VAEBRANIA 9: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.