VAEBRANIA 10
10
1Naasa kyimmba uvavaso ni kyirishe kya mesha yoo asheshaa, lulakee fwana sheni ya findo efyo, kya firaso filya fya iniingywaa wo kyeeri mwaaka moose, nkimaa nta kinnywa isangya deny yewo vashaa-u-fo. 2Kwankooya ni indony, a kukooye firaso fyemandaa, mashika yewo veindya vakammaa iilyiswa lyimwi, mmbekilollyaa-se vatiri ulyamari? 3Lyo ando amwi na firaso efyo mmbo kwiiyo ikummbwa kya ulyamari wo mwaaka. 4Mashika samu ya shau na mburu nnyimaa yuuta ulyamari-fo. 5Nkyo elyi asha ulaniny mmbo aamba,
Firaso fyekora na muro na fyaanu nkukundye-fo,
lyo mwiili ukashideesya.
6Firaso fyekora na muro na firaso fya ulyamari
nkulesennyo mfyo-fo.
7Llyo shileamba, Lola,
shansha (mmbo shilereiyo efo kyitabuny)
shitani filya kukundye, woi Iruva wakwa.
8Yoo uwe aamba, Firaso fyekora na fyaanu fya yuuta ukulefikunda-fo (filya fikee fivavasye ni uvavaso), 9llyo aleamba, “Lola te, mmbo shasha nshetana efyo kukundye. Mmbo auta-u kilya kya mbee kavika-u kilya kya kavii.” 10Yoo efyo akundye fikai ng'u lulewonisya iilyiswa, yoo mwiili wa Yesu Kristo ulerambikywa-u lyimwi nsi. 11Na wo nkohani mmbo asalalaa wo nkonu navike miindye, neeningya firaso efyo fyeni keengyi, nafyo filashidimaa nta yuuta ulyamari. 12Kyaindi yeu, kyeeri alemaa kiraso kimwi kimaa yuuta ulyamari llung'anu, mmbo alekaa rembo woko usha lwa Iruva; 13ukau navereye kutani vakiduva vakwe vavikwa yoo si ya marende akwe. 14Mashika kwa yuuta lyimwi nsi mmbo alesongovisa deny yewo vasheilyiswaa fika llunganu. 15Na Mumuyo Mweele mmbo alukureekya, mashika ekyaamba,
16Ekyi nkyo kyaasa nshevikaa nawo
numa ya mikonu ilya.
Nshevika mavavaso akwa miriminy yaawo.
Na efo makusarony awo nsheareiya-fo.
17Lyo kaamba,
Ngyulyamari tawo na ulyang'a lwawo
nshishelukumbwaa-se-fo,
18Naasany, kwankooya yefyo fisheutwaa-u, nkukyiifo-se kiraso kimaruma kya ulyamari-fo.
19Kyasiany, vanavama, kyimmba lutiri ukaari lwa yaanga ando eele kyeendo nsamu ya Yesu, 20shia ilya aleloora shiiya, itiri muu, ishiraa isulyeny, nto mwiili wakwe; 21na iwona Nkohani nniini wa mmba ya Iruva, 22luserikyeny ng'u na nrima wa dede, na kyikusiryo kivangyi, lukee vasangye mirima yeeru lure makusaro makasha, lukee vasangye miili yeeru na mura mweele. 23Lutire nnu ikusirya llya filya luvikye nsia, lyilashaalashikaa, mashika llya aleluvikya kyaasa ni wa dede. 24Lukukaarise luveni na veni neekwitika itana mashora mesha a ikunda. 25Nta lulare ikwaanannya ando amwi-fo, shaasa vengyi vaishivye, lyo lwiikimbani; na yeengera itana indo, shaasa mulollye nkonu yeto ukee kufii.
26Mashika kwakooya lwatana ulyamari naambo lukammaa imanya ekyo kya dede, nkukisaa-u kiraso kimaruma kya ulyamari-fo; 27lyo isheshaa ngapo yeeresye, na waami lwa muro yeto ushelyaa yewo valyang'a. 28Nndu amina uvavaso lwa Mose mmbo ashefwaa kulaiyo usari, na irero lya vakureekyi vavii ao vararu. 29Mwalollya inda? Ndesa nndu yeto ashewaryaa Mwana wa Iruva nnyashewaryaase ngapo niini mwasi, neemina samu yeyo ya iilyisa sheelyi nshi kindo-fo, neemina Mumuyo mwiisarya? 30Mashika lwiishi yeto aleamba, Itaiya kiduva ni ishora lyakwa, yeny nshetaiyaa. Na lyingyi, Nndumi mmbo asheanduyaa vandu vakwe. 31Ni kindo kyeeresye iwoya maakony a Iruva muni Muu.
32Lyo kumbweny mikonu ilya ya mbee, llya kyeeri mulewona sa, mmbo mulesisirya isisirya lying'ani lya mavavyo. 33Kyeeri mulelamyo ivikywa ureeree na fyuure, na kyeeri muleakaniswa na vetannywa efyo. 34Mashika valya vekee fifingyony mmbo mulevaiya mashoya, mukairikya na nsia yuuta masaa any, mwiishi sheelyi efo nnang'ani yaany mmbo mutiri masaa ailannyi yoo, alamandaa. 35Kyasia mulashereta ukaari lwany, mashika lutiri simbo niini. 36Mashika mukundye usisiryo, naambo mukammaa itana filya Iruva akundye muwonise kyaasa kilya.
37Mashika nkyeeri kyaangu deny kiiyo.
Yeto avereyo asheshaa, nta nalakeywa.
38Lyo yeto wakwa wa usumanu mmbo
ashewonaa muu na iirikyo,
kwakooya atirwa nnyinyira,
nrima wakwa mmbutiri ifura nawe-fo.
39Kyaindi lyo yese llusangyi na yewo vatirwa nnyinyira na vakeereka-fo, mmbo lukee na yewo vakikusiryo ekyo kikiraa mirima yeeru.
S'ha seleccionat:
VAEBRANIA 10: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.