VAEBRANIA 6
6
1Kimmba ni indo, lukara lulasenda ufundo lwa mbee lwa Kristo, lwangusye yeenda lwaawutye, lulasheva-se vekaa uvasheny lwa mashora alakee a muu, neera kyikusiryo kwa Iruva, 2na ufundo lwa ubatiso, na yeekeryo maako, neeruka lya vafu na mwaandu wa llung'anu. 3Na efyo mmbo lutanaa kwakooya Iruva alwiidimisya. 4Mashika yewo valemmainingwa sa, na ishosha simbo yeyo ya iruveeu na iwona yaakaniswa na Mumuyo Mweele, 5na ishosha irero yelyo lyirolaa lya Iruva, na wiidimi lwa fyeeri efyo fishaa, 6vakawuya iwa-da numa ya efyo, nkikiidimikaa-se ivaviira wiiya kutani vakurya-fo, mashika mmbo vakeekapya Mwana wa Iruva nsalabeny lya kavii, na insuta wo veni. 7Mashika naakwa ni sumbai yeyo yana mura wa mmbwa yeyo ikapaa-u wo kyeeri na ivikya yewo varema ndunda shisha, wo mmbo vawaryaa mbora tishukaa kwa Iruva; 8lyo kwakooya sumbai yeyo yauta miinga tupu na mooro, mmbo ivaa sheelyi yadengwa nyishirikyoo-fo, nayo mmbo ishelyamarwaa.
9Kyaindi vakunde vakwa, lla elyi lwaamba indo, mmbo lwiishi mbony tany, tikee shisha mmwasi, tikee ta ukiro. 10Mashika Iruva nshi nrekwa kutani arekyo mashora any-fo, na ukundi lulya muleora kimaruma kya irina lyakwe, llya mulefurukannya veele, na fika ulaalu ni indo-da mukeetana. 11Neese mmbo lukee mwikima nnu naambo mutire usasari yelo weni na yaawutya ekyo luvereye fika mafurumyony; 12naambo mulasherokkwa, naambo musheva vamwi neewo va fyaasa efyo vekee na kyikusiryo sanda na usisiryo.
Kyaasa Kya Iruva nkya dede
13Mashika kyeeri Iruva alevika kyaasa na Abrahamu, mashika elyi kulaore eiyo ungyi nniini ngota we wellyisa mboo, mmbo alelya mboo we muni, 14kaamba, ni dede ivikya mbora nshekuvikyaa, na ikufumbuta nshekufumbuta. 15Na kyeendwa ni ivika nsia kashefityo kyaasa ekyo.
16Mashika nndu mmbo alyee mboo na yeto amwilannyi, na yekyo kyailannya marero moose ni ilya mboo, evikaa kyiringyisyo. 17Kyikeeny indo Iruva ekundye yoora valya vashewaryaa kyaasa kilya, shaasa fyaasa fyakwe filashaalashikaa, kavika-u kyaasa. 18Naambo kimaruma kya findo fivii filashaalashikaa, nang'u Iruva nalashambaa wongo, lukaariswa lwivirywaa muu, yese lukeetamballya efyo luvikye nsia fikee mbee yeeru, 19nakyo mmbo kivakye kya nrima, kyeluuta nrengeny, itiri finya, yeelwaata efo nnang'ani ya ando eele, 20yefo Yesu aleanga nafo kimaruma kyeru, nsongoru weeru, kava Nkohani Nniini fika llung'anu avakye Melekizedeki.
S'ha seleccionat:
VAEBRANIA 6: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.