VAGALATIA 2
2
Paulo na Varumi valya vengyi
1Numa ya vayo kwiikisia myaaka ikumi na iina, sharwa lyingyi na kulya Yerusalemu shiryani na Barnaba, shaveipoo na Tito sheenda nawe. 2Na yeny mmbo shileenda nafo mashika elyi Nndumi aleshoora, shavaongoya kya nrumi yeyo shikeongoya vandu va masanga, lyo lwikee luveni na yewo vatiri nnduma, kulashekooya mmbo nkeetamballya ruu, ao mmbo nkeetamballya irisha ruu. 3Kyaindi Tito yeu sheriani nawe, nawe akee Ngriki, nnyaleitikkywa irinwa-fo. 4Lyo kimaruma kya vakristo va wongo yewo valeatwa siriny kirisi, valeatwa-fo kirisi naambo valumanyi shaasa lukai kunu kwa Yesu Kristo, naambo valurwaa ushingeny; 5neese nta llulekunda ivaaranya-fo, naambo dede yeyo ya Nrumi ya Nsia ikooye ikaa na yeni. 6Kyaindi valya vatiri nnduma; (na vakava inda kwakwa yeny nkimwi nsi, Iruva lyo nnalolaa fisangu fya vandu-fo), mmbo nkeyaamba valya vatiri nnduma vandu mbalesheengerya-u nta kindo-fo. 7Kyaindi mbai na efyo, kyeeri valelollya shishoongoyaa valya valakee varini Nrumi ya Nsia, shaasa Petro ekeeyoongoya valya vakee varini; 8(mashika yeto aleidimisya Petro iva nrumi wa yewo varini mmbwe yeto-da aleshiidimisya yeenda kwa vandu va masanga). 9Na llya valemeemanya kya isarya elyo shilesimbwa; varumi Yakobo na Kefa na Yohane yewo vaishiwa ni ngo ta siri, mmbo valeshiwara yeny na Barnaba ng'asa ya woko usha kya wiitanu, naambo yese lweende kwa vandu valakee Vayuda nawo veende kwa Vayuda. 10Nawo vakalukunndya kindo kimwi nsi, lukummbwe vakiva; na yeny shakutakura nnu iinutya irero elyi.
Paulo asakira Petro kulya Antiokia
11Kyaindi kyeeri Kefa alesha Antiokia mmbo shilevakyana nawe kisangu kwa kisangu, mashika mmbo asumannyi uvingo. 12Mashika kulaore vensha vauka kwa Yakobo mmbo ekeelya na vandu va masanga. Kyaindi kyeeri valesha we mmbo alekaa kwaasha nawo keereya Vayuda yewo vakee varini. 13Na Vayuda yewo vengyi vakainduka ando amwi nawe, kutani na Barnaba nawe eewa ni ukunang'ari lwawo. 14Kyaindi kyeeri shilelollya sheelyi ngata yeyo nnyisumani na Nrumi ya Nsia, mmbo shevia Kefa mbee yaawo woose, “Kwakooya yewe kukee Myuda kwasora mbuka ya vandu va masanga, ilakee ya Vayuda, a nkikyi elyi kukeitikkya vandu va masanga isora mbuka ya Kiyuda?”
Vayuda na vandu vengyi woose mmbo vakirwa ni iirikyo
15Yese llukee Vayuda tukula, lulake varekwa va masanga. 16Neese lwiishi sheelyi nndu wa vandu nnyashekennywaa usumanu kyeendwa ni mashora akwe-fo, nkyeendwa ni ikusirya Kristo Yesu naasa, yese mmbo luleirikya Kristo Yesu naambo lweekennywa usumanu kimaruma kya Kristo, nta nshi kimaruma kya mashora-fo, mashika kyeendwa ni mashora a nndu nkwiifo nta umwi asheekennywaa usumanu-fo. 17Nkyoony kwakooya yese luveni lweekennywa usumanu elyi lwairikya Kristo lukalollywa mmbo lukee valyamari-da. A Kristo mmbo akee mwirundya ulyamari? Nta-fo! 18Mashika kwakooya shawuya irosa filya shilefisammbwa, mmbo shakoora yeny shimuni sheelyi mmbo shikee nrekwa. 19Mashika yeny mmbo shilefiiya uvavaso kyeendwa ni uvavaso naambo shikee na muu kwa Iruva. 20Mmbo shilekapywa nsalabeny ando amwi na Kristo; lyo ulaalu shikee na muu, nta nshi yeny-se-fo, ni Kristo akee nnang'ani yakwa, na muu yeu nkee nato wa mwiili yeu, mmbo nkee nato kikusiryony kya Mwana wa Iruva, yeto alelukunda kakuuta we muni kimaruma kyakwa. 21Nshiminaa isarya lya Iruva na ilyaallwa ruu-fo, mashika kwakooya usumanu mmbo luwonikaa kyuukana na mashora a nndu, naasany na Kristo mmbo alefwa ruu.
S'ha seleccionat:
VAGALATIA 2: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.