VAGALATIA 1
1
1Ni yeny nrumi Paulo, (indi nshi nrumi wa vandu-fo, nta nshi alerumwa ni nndu-fo, ni Yesu Kristo na Iruva Nde yeto alennruta kooka kwa vafu). 2Na vanavama yeva vakee na yeny, shamureiya yeni siri ta Galatia. 3Isarya lyikae na yeni, na ufoo, lyuukye kwa Iruva Nde, na kwa Nndumi weeru Yesu Kristo; 4yeto alekurambikya-u we muni kimaruma kya ngyulyamari teru, naambo nalukire ulaniny elu uravi lwiiyo ulaalu, shaasa Iruva Nde weeru alekunda we muni. 5Nnduma ni wakwe llung'anu na llung'anu, Amen.
Nrumi ya Nsia imwi nsi
6Mmbo shifulukkywa nnu mashika elyi mwara yeto alemuvaangya isarya lya Kristo uviny indo, na iindukya nrumi ya ngata ingyi. 7Nta nshi ingyi-da-fo, kyaindi kwiifo vandu vakeemwerevise vakunndye ifullwa nrumi ya nsia ya Kristo. 8Lyo naakwa lwava yese ao nsu wa iruveeu kwakooya ashemoongoyaa nrumi ingyi kuuta yeyo lulemmaa imwoongoya, nave n-denge. 9Shaasa lulemmaa imuvia, na ulaalu shawuiya-se yaamba, kwakooya nndu ashemoongoyaa nrumi ingyi kuuta yeyo muleiwarya, nave n-denge.
10Mashika-le ndesa, ni vandu nkeevalelemba, a-ni Iruva? Ao ndesa mmbo shikunndye isennya vandu? Kukooye fika ulaalu mmbo shikeesennya vandu, nta nshevaa ishinga lya Kristo-fo.
Uvaango lwa Paulo
11Mashika vanavama vakwa, nrumi yeyo shilemoongoya mmbo shamuvia deny, nshi ya mbuka ya kivandu-fo. 12Mashika nshileyuuta kwa nndu-fo, nta nshileloshwa ni nndu-fo, ni Yesu Kristo muni aleshirambuya. 13Mashika mulemmiita muveni mbony ta ngaa yakwa llya shekee na ufundo lwa Kiyuda. Mashika mmbo shesisya siri ya Iruva kikailannya kyeeso, shakunda iilyamara deny. 14Neeny shatumaa efo ufundony lwa Kiyuda ngota veengyi yewo vekee va irika lyakwa na efo vanduny vakwa, shakutakura nnu itira ngyufundo ta kasha ta vande vakwa. 15Kyaindi lyo Iruva yeto aleshisauwa uka shilandewonika kwa ma, kashivaangya isarya lyakwe, 16shaasa kilensenya ishisunundya mbony ta mwana wakwe, naambo neeny shiidimi yoongoya vandu va masanga mbony yeto takwe, neeny nta nshilevesa mbele nta nndu-fo. 17Nta nshilerwa na kulya Yerusalemu indekwaanannya na yewo valeshisongoya iva varumi-fo, mmbo shileenda kulya kasa kya Vaarabu, shooka-fo shawuya na Dameski.
18Numa ya vayo kwiikisia myaaka iraru, sharwa na Yerusalemu naambo shindekwaanannya na Kefa, shakaa kwakwe ando a mikonu ikumi na iraanu. 19Lyo nta nshilelollya-fo nrumi ungyi-fo, kuuta Yakobo muni, we mwanamaye wa Nndumi weeru. 20Neefyo shikeemureiya, loleny nnu, shikee mbee ya Iruva nta nshireraa wongo-fo. 21Numa ya vayo sheenda taari ta Siria na Kilikia. 22Lyo siri ta Kristo ta kulya Uyuda ntileshilollya tishimanyi-fo. 23Kuuta elyi valeeta-da, sheelyi yeto ekeelusaveesa elyo mbee, ulaalu mmbo akeevambisa kyikusiryo ekyo llya kasha ekeekimamita. 24Vakaitikisa Iruva kimaruma kyakwa.
S'ha seleccionat:
VAGALATIA 1: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.