2 VATESALONIKE 3
3
Luterevvyeny
1Na kya ifurumya, vanavama, luterevyeny, naambo irero lya Nndumi lyeende na mbee, nerumishwa kiwo shaasa kyikee efo kwany; 2naambo lwauwa maakony a vandu valakee va usumanu, varavi, mashika vandu woose mmbatiri kikusiryo-fo. 3Kyaindi we Nndumi ni nsaari mmbwe yeto ashemukaarisaa nemuringa mulaevetwa ni nravi yeto. 4Neese mmbo lulevika Nndumi nsia kimaruma kyany, elyi muletana kilya lulemulosha, na mweengere itana indo. 5Nndumi namutetere efo miriminy yaany naambo muwoni ikunda lya Iruva na usisiryo lwa Kristo.
Mbony ta Irunda Mashora
6Vanavama, mmbo lwamwiikimba na irina lya Nndumi Yesu Kristo, kwiiseny na wo nndu nkristo akee nroko, nta nalasoraa mikaaye ilya lulemulosha. 7Yeni mwiishi shaasa kimusumannyi ilulatya mashika naakwa ni yese llulekaa kwany lulatiri waarya-fo; 8nta llulelya shoonga ya nndu ruu-fo, mmbo lulelya shoonga lwannyivinnya nnu, lwirundaa kio na nsanyiny, naambo lulasheeva irio kwa nndu wa kwany na kava-vi. 9Nshi mashika elyi kulore lweetiri mumu-fo, kyaindi naambo lumureeye kyaaso kyeelola, mulusore yese. 10Mashika naakwa nkyeeri kilya lweekee kwany mmbo lulemuvia mbony yei, sheelyi, kwakooya nndu nalakundye irunda, naasa, na shoonga nalailye-fo, 11mashika lwiitye efo kwany kwiifo vandu valatiri uramba, valatiri ishora vakeerunda, kyaindi vakakwaataa-ata findony fya vengyi. 12Kyasia yewo lwavaikimbany na ivavia na irina lya Nndumi Yesu Kristo, varunde mashora na usaari neelya shoonga vaivinnya wo veni. 13Lyo yeni vanavama, mulafwe nrima kya itana mesha-fo. 14Na kwakooya nndu moose ara nalawarya kirero kya barrwa yei yeeru na kava vi, kwiiseny nawe, nta mularere nawe-fo, naambo nasuke deny; 15lyo mulamwaallwe nkiduva-fo, mmbo mumwiikimbaa sha umwi waany. 16Kyasiany, Nndumi muni urilalyi we muni namulyimmyi urilalyi wo kyeeri shieny toose. Nndumi nakae neeni moose.
17Yefi mfiidikiro fyakwa yeny Paulo, shareiya na woko lwakwa shimuni. Ekyi nkyo kiringyisyo barrweny takwa toose, llo woko lwakwa. 18Isarya lya Nndumi weeru Yesu Kristo lyimukaye yeni moose.
S'ha seleccionat:
2 VATESALONIKE 3: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.