2 VATESALONIKE 2
2
Nravi ulya
1Kyasiany vanavama, lwamooshora, kya isha lya Nndumi weeru Yesu Kristo, na kya ishekuumbya yoo mbee yakwe, 2mulaatarike nnu mure kilya mukee ivinya-fo, nta mulaawukwa efo nriminy-fo ao nta na marero-fo, ao na barrwa mukusare nkweru yauka-fo, kyeyaamba sheelyi nkonu yeto wa Nndumi mmbo ulemmaa isha-fo. 3Kulave nta nndu umwi amulemba-fo, mashika nkonu yeto mmbusheshaa kulaore mbele umini llwa lwansha-fo, na nndu yeto kilemi noorwa paa yeto akee mwana wa ureti; 4yeto akee kilemi, yeto mwiikurosa muni mbee ya Iruva yeto mwiindyo, nawe muni kakutemira yoo mmba ya Iruva kakwaa lwa mmbwe Iruva. 5A-ndesa mmbo mulakumbuye sheelyi kyeeri shekee neeni shilemuvia mbony yeti? 6Neekyo kyikee iima nravi yeto nalamanyike ulaalu mukiishi kutani kyeeri kya vayo kyasha. 7Mashika kyama kya urekwa elo kyikee ikoora ulaalu lyo kwiiyo umwi akee iima finya ya vayo, na kutani kyautwa-u deny. 8Lyo yeto akee kilemi asheorwaa paa, nawe Nndumi Yesu ashemwiviaa mumuyo wakwe ummbwaa, na inrumata deny elyi aiyo. 9Isha lya kilemi ekyo mmbo lyivakye elyo lya mmbishwa, na wiidimi lwakwe ekooraa na wongo uniini; 10neefo ulembiny lwa yewo vakee ireka, mashika elyi kulaore valekunda dede yeyo naambo vakirwa. 11Nkyo kimaruma kavaora finya ya ureti shaasa ikai, vengere ikutira na wongo; 12naambo yewo woose valelema iirikya dede yeyo vautyo uvingo, mashika elyi valefurya uravi.
13Kyaindi yese kilukooye yaana Iruva wo nkonu kimaruma kyany, yeni vanavama mukundyo indo ni Nndumi, mashika elyi alemusauwa yeni uka elyo mbee naambo muwoni ukiro, mushillyiswaa Mmumuyo na iirikya dede; 14yefyo Iruva alemuvaangya na Nrumi ya Nsia yei yeru, naambo muwoni itumbe lya Nndumi weeru Yesu Kristo. 15Kyasiany, vanavama, salaleny kyuumi, muwarani na mikaye ilya muleloshwa, kyikee kya marero ao kya barrwa yei yeeru.
16Na Nndumi weeru Yesu Kristo we muni, na Iruva Nde weeru, yeu alelukunda kalusimba iviirywa muu yelyo lyishendee ivika nsia lya llung'anu kyeendwa ni isarya lyakwe, 17namuviirye muu efo miriminy yaany, na imuvangisya efo irerony na ishoreny isha.
S'ha seleccionat:
2 VATESALONIKE 2: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.