Orubara 5
5
Abantu abahagaire
1Omukama akagambira Musa ati, 2“Ragira Abaisiraeli bona babinge omu rusisira buli mubembe, na buli omoi araba aina ekilikumurugamu, na buli muntu ahagaire aha rw'okukwata aha mufu. 3Mubinge omushaija n'omukazi omu rusisira orwo ndikuturamu na inywe bataruhagaza.” 4Abaisiraeli bakora batyo okwo Omukama yagambiire Musa, bababinga omu rusisira.
Okwatira entambara
5Omukama agambira Musa ati, 6“Ogambire Abaisiraeli oti, ‘Orwo omushaija anga omukazi arakoraga obufu bwona bwona, atabaire mwesigwa ahali inye, omuntu ogwo arabaga aina entambara. 7Obufubwe obwo yakora abwechuze mara agire enyatano egobire aha rw'obufu obwo. Enyatano eyo yagira agyongereho ekichweka kyayo ekya katanu akihe owo yaba afakaliire. 8Kyonkai kifakalirwa kayakuba yafire mara atainaho munyaruganda wa kutora nyatano egyo, aho enyatano egyo bagihe Omukama, bagigeleke aha mpaya y'entaama ey'okwatilira omuntu aina omushango, mara etwarwe omukuhani. 9Kandi ebihongo byona, buli kimoi, ebyo Abaisiraeli balikuletera omukuhani, bibe by'omukuhani ogwo. 10Ebihongo ebyo buli muntu alikuleta bibe by'omukuhani.’ ”
Abakazi abo baibabo barabubiraga
11Omukama agambira Musa ati, 12“Ogambire Abaisiraeli oti, K'omukazi arahemukaga akagokera iba, 13akasiyana kyonkai mushaijawe atabimanyiire, nawe atamanyikire n'orwo yahagara, n'ow'okumugamba atazokire n'orwo atakwatirwa aha mugogo; 14k'omushaija alibubira mukaziwe ogwo ayahagara, anga akamububira atahagaire, 15amutwalire omukuhani hamoi n'ekihongo ky'okumwatilira, nk'ekilo emoi eya efa y'eshayiri. Atakisheshaho majuta anga kukitaho bunuma, aha rw'okuba kihongo ky'ensano ekyazarukana omw'ibuba. Ekihongo ekyab'ekyo nikiijukisa entambara ekozirwe mara nikigimanyisa omu bantu.”
16“Omukuhani atware omukazi ogwo omu mabona g'Omukama amwemeleze. 17Akwate amaizi g'omugisha omu kikwato ky'eibumba, aihye eitaka omu maisho g'ekiikaro, alinage omu maizi ago agashalize. 18Omukuhani ayemeleze omukazi ogwo omu mabona g'Omukama, amuzingurure eishoke aha mutwe, amukwase omu mikono ekihongo ky'ensano ekilikwijukisa entambara, nikyo kihongo ky'ensano ekilikuzarukana omw'ibuba. Omukuhani akwate amaizi galikukambarara agaletera abantu omuraamo. 19Ahanyuma anahize omukazi ogwo nagamba ati, ‘K'oraba otagenzire na mushaija, otahagaire, mara nomanya okwo oli muk'omushaija, aho amaizi aga agakambaraire agaletera abantu omuraamo ogakireho. 20Nawe k'oraba ohemukire, mara okwo nomanya okwo oli muk'omushaija, okahagara, okabyama n'omushaija atali wawe, 21aho,’ (Omukuhani agambiire omukazi ayenahire kubi, amugambiire ati) ‘Omukama akurame n'abantu bakuchweho omugani, ofe ebyawe ogumbare. 22Amaizi aga gatahye omuraamo omu rubunda rwawe, ofe ebyawe ogumbare.’ Omukazi agambe ati, ‘Amina, Amina.’ ”
23“Aho omukuhani ahandike emiramo egi omu kitabo, ashube agifuze amaizi galikukambarara, 24aganyoise omukazi gamushase muno. 25Amwihye ekihongo ky'ensano omu mikono ekizarukaine omw'ibuba, akichunkeze omu mabona g'Omukama amare akitware alutare. 26Aha kihongo ky'ensano ayoreho ekikamato akyokeze ahali alutare, ahanyuma ashube anyoise omukazi amaizi. 27Orwo araba yamunyoisize amaizi ago, k'araba abaire ahagairekwo akagokera iba, amaizi agaletera abantu omuraamo garamutaha omu mubili gamushase muno, afe ebye, agumbare, abe muraamwa omu bantu. 28Kyonkai k'omukazi araba tahagaire, nayera, aho tabe kantu mara alizara n'abana. 29Eli nilyo iteka elirahonderwaga orwo omushaija arabubaga, anga, k'omukazi muk'omushaija arahemukaga akahagara. 30Anga orwo omushaija aragiraga eibuba akabubira mukaziwe. Omukazi bamwemeleze omu maisho ga alutare, omukuhani akore emichonchozo egi yona. 31Omushaija talikwatwa mushango, kyonkai omukazi omushango nigumukwata k'araba afakairekwo.”
S'ha seleccionat:
Orubara 5: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.