Orubara 4
4
Emyoga y'Abalevita Abakohati
1Omukama akagambira Musa na Aroni ati, 2“Omu Balevita mubaremu Abakohati, kuhonderana n'amahiga gabo n'ebika byabo. 3Mweme aha b'emyaka makumi gashatu kutembera kimoi kugoba aha myaka makumi gatanu, abakushobora kukwata emyoga, bakakora emilimo omw'Ihema ly'Omuterano. 4Okumanya ebintu ebitakatifu muno omw'Ihema ly'Omuterano, gube mwoga gw'Abakohati. 5Abasisiire kabaraijaga kusimbura, Aroni n'abatabani batahe omw'Ihema ly'Omuterano, bahananture orutimbe aha rusika, barushwekese Esanduku ly'Endagano. 6Ahanyuma bagishwekese empu z'embuzi ezishoneraine, aho babe nirwo baraho omwendo gwa kibururu, bashokemu n'emigamba yayo. 7Aha meza y'Omukate gw'Obusinge bareho omwendo gwa kibururu, bateho n'esahani, n'esahani ezihango ez'obunuma, epakuli, n'enyabya z'ebihongo by'okunywa. Haikarweho n'omukate. 8Bashube ebyo babibunze omwendo ogulikutukura, bongereho n'empu z'embuzi ezishoneraine, bagishokemu n'emigamba yayo. 9Bakwate omwendo gwa kibururu bagushwekese ekinara ky'etara n'etara zakyo, makasi zakyo, eterei, n'ebikwato byakyo byona ebyo bafukamu amajuta g'okuhemba. 10Ekinara ekyo hamoi n'ebikwato byakyo byona babishembe omu mpu z'embuzi ezishoneraine, bakikome aha migamba y'okukitwaza. 11Altare y'ezahabu bagishwekese omwendo gwa kibururu, bongereho empu z'embuzi ezishoneraine, bagishokemu n'emigamba yayo. 12Bakwate ebikwato byona ebikozibwa ahatakatifu, babite omu mwendo gwa kibururu, babishwekese empu z'embuzi ezishoneraine, babikome aha migamba yabyo ey'okubitwaza. 13Altare bagyeye eijwi, bagishwekeho omwendo gwa zambarau. 14Bagiteho ebikwato byayo byona ebikozibwa honene: Eby'okuyoza omuliro, euma, ebitihyo, ebeseni, n'ebikwato byayo ebindi byona. Bagishwekeho empu z'embuzi ezishoneraine, bamare bagishokemu emigamba yayo. 15Orwo Aroni n'abatabani baramaraga kushweka ahatakatifu n'ebyamwo byona, abasisiire kabaraijaga kwimukya, aho Abakohati baije babitware. Kyonkai ebintu ebitakatifu batalibaikwataho bakafa. Ebi nibyo bintu by'Eihema ly'Omuterano ebyo Abakohati baratwaraga.”
16“Eleazari mutabani wa Aroni omukuhani aralebeleraga amajuta g'okuhemba, obunuma obulikunukage n'ensano elikuhongwa buli kiro, n'amajuta g'okusiiga. Alebelere n'Eihema lyona n'ebyamwo byona, amanye ahatakatifu n'ebikwato byamwo.”
17Omukama agambira Musa na Aroni ati, 18“Oruganda rw'Abakohati bataliruchwa mu Balevita. 19Mubatwaze kurungi, barore, batalifa aha rw'enshonga y'okugoba aha bintu ebitakatifu muno. Aroni n'abatabani batahe omw'Ihema, bahe buli muntu omulimogwe n'omugugu ogwo aratwara. 20Kyonkai aba abalikuhabwa emilimo, Eihema batalitahamu bataija bakabona ebitakatifu muno bakafa.”
Emyoga y'Abagerishoni
21Omukama agambira Musa ati, 22“Abagerishoni nabo obabare, kuhonderana n'amahiga gabo n'ebika byabo. 23Obare kwema aha b'emyaka makumi gashatu kuhika emyaka makumi gatanu: Abalikushobora kukora emilimo bona omw'Ihema ly'Omuterano. 24Abagerishoni eikora lyabo kutwara emigugu. 25Batware entimbe z'ekiikaro, Eihema ly'Omuterano n'eby'okulishwekesa, n'empu z'embuzi ezishoneraine ezilibunzire. Batware n'ekisika ky'omulyango gw'Eihema ly'Omuterano, 26entimbe za nyakabuga, n'ekisika ky'omulyango gwa nyakabuga ezingoire ekiikaro na alutare n'emiguha yabyo, n'ebikozo byona by'emilimo. Ebili by'okukorwa bonene babikore byona. 27Aroni n'abatabani nibo balikuha Abagerishoni emilimo: Ebyo baragiirwe kutwara n'ebyo balikuragirwa kukora. Ebyo barataga kutwara obibakwase gube mwoga gwabo. 28Eli nilyo ikora ly'Abagerishoni omw'Ihema ly'Omuterano. Omw'ikora lyabo Itamari mutabani wa Aroni omukuhani abe niwe abalebelera.”
Emyoga y'Abalevita ba Merari
29“Abamerari nabo obabare kuhonderana n'amahiga gabo n'ebika byabo. 30Obare kwema ab'emyaka 30 kugoba aha myaka buli omoi alikushobora kukora emilimo omw'Ihema ly'Omuterano. 31Eikora lyabo lyona hamoi omw'Ihema ly'Omuterano ni kushutura ebintu: Efuremu z'ekiikaro n'emihingo yakyo, enyomyo n'amaguru gazo, 32n'enyomyo za nyakabuga obuzingora n'amaguru gazo, enkondo, emiguha n'ebyabyo byona ebilikubigendaho. Buli omoi na ibara omukwase ebintu ebyo aratwara. 33Eli lyona ikora ly'Abamerari omw'Ihema ly'Omuterano. Itamari mutabani wa Aroni omukuhani niwe mulebelezi wabo aha ikora elyo.”
Abalevita nibabarwa
34Musa na Aroni n'abebembezi b'enteko babara Abakohati kuhonderana n'amahiga gabo n'ebika byabo. 35Bakema aha baina emyaka 30 kuhika emyaka 50. Buli omoi ayabaire nashobora kukora emilimo omw'Ihema ly'Omuterano bakamubara. 36Orubara rwabo omu mahiga gabo bakagoba abantu 2,750. 37Orwo nirwo rubara rw'Abakohati bona abakoraga omw'Ihema ly'Omuterano, abo Musa na Aroni babazire nk'okwo Omukama yahangiire Musa.
38Orubara rw'Abagerishoni omu mahiga gabo n'omu bika byabo, 39kwema aha b'emyaka makumi gashatu kuhika emyaka makumi gatanu, buli omoi ayabaire nashobora kukora emilimo omu Ihema ly'Omuterano, 40orubara rwabo omu mahiga gabo n'omu bika byabo bakagoba abantu 2,630. 41Oru nirwo rubara rw'Abagerishoni omu mahiga agabo, bona abakoraga omw'Ihema ly'Omuterano, abo Musa na Aroni babazire nk'okwo Omukama yahangiire.
42Orubara rw'Abamerari omu mahiga gabo n'omu bika byabo, 43kwema aha b'emyaka 30 makumi gashatu kugoba aha b'emyaka 50 buli omoi ayabaire nashobora kukora emilimo omw'Ihema ly'Omuterano, 44orubara rwabo omu mahiga gabo bakaba bali bantu 3,200. 45Aba nibo balinya ababazirwe omu ruganda rw'Abamerari. Nibo Musa na Aroni babazire nk'okwo Omukama yahangiire Musa.
46Abalevita bona abo Musa na Aroni n'abebembezi ba Isiraeli omu mahiga gabo n'omu bika byabo, 47kuruga aha b'emyaka 30 kugoba aha b'emyaka 50, buli omoi ayabaire nashobora kukora emilimo omw'Ihema ly'Omuterano n'okutwara emigugu, 48bakaba bali bantu 8,580. 49Musa hakabara Abalevita, kandi buli omoi yamuha omwoga gw'okuheleza anga kugira ekyo arata kutwara, nk'okwo Omukama yabaire amuhangiire.
S'ha seleccionat:
Orubara 4: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.