Orubara 20
20
Musa naha Embaga Amaizi
(Oku 17:1-7)
1Omu mwezi gwa mbere eihanga lyona lya Isiraeli litaha omw'Irungu lya Sinai, baikara Kadeshi. Kadeshi nimwo Miriamu yagwire, mara nimwo yaziikirwe.
2Mbali babaire basisiire bhakaba hataina maizi. Aho bahurura bageleka Musa na Aroni. 3Bakunganisa Musa nibagira bati, “Nitube twafire orwo Abaisiraeli barumuna baitu bafeleire aha Ihema ly'Omukama! 4Kubaki embaga y'Omukama egi ogilesire omw'irungu katugwamu n'ebitunganwa byaitu? 5Okatwihiraki Misiri kutuleta omu nsi egi ey'enaku? Nsi etakuleta ngano, anga tini, anga mizabibu, nangu n'amakomamanga, chei. Amaizi g'okunywa nago tigalikuboneka.”
6Aho Musa na Aroni basigaho embaga, bagya aha mulyango gw'Eihema ly'Omuterano bajumara ahansi. Omukama abahabukira omu kitinwa, 7agambira Musa ati, 8“Okwate enkoni oshube ohuruze embaga. Iwe na Aroni murumuna wawe mugambire orwazi, omu maisho gabo, rurugwemu amaizi. Mube nikwo mubaihira mutyo amaizi omu rwazi. Kityo murabona amaizi g'okuha embaga ekanywa n'ebitunganwa byabo.” 9Musa akwata enkoni omu mabona g'Omukama, nk'okwo yamuhangiire.
10Musa na Aroni bahuruza embaga aha rwazi, Musa abagambira ati, “Hulira inywe bashengi; tubaihire amaizi omu rwazi oru?” 11Musa aimukya omukono ateza orwazi enkoniye kabili. Amaizi gafumuka gangi, embaga yona enywa n'ebitunganwa byabo binywa. 12Omukama agambira Musa na Aroni ati, “Orwo mutanyikiliza kwoleka Baisiraeli okwo nyina obushobora, ensi eyo mbahaire timugibatahyemu.” 13Aga nigo maizi ga Meriba mbali Abaisiraeli bakunganisiize Omukama mara mbali yabolekire okwo aba mutakatifu.
Omukama wa Kadeshi naima Abaisiraeli omuhanda
14Musa ayema Kadeshi atuma entumwa aha mukama wa Edomu nagamba ati, “Omwisiraeli murumuna wawe nagamba ati, Nomanya enaku zona ezatugwireho, 15okwo batat'enkurw'ichwe bagiire Misiri, tukatura omu nsi egyo amakiro garai. Okwo Abamisiri bayemire kubi batat'enkurw'ichwe, nikwo na ichwe batwemire kubi batyo. 16Tukatakira Omukama yatuhulira, yatuma omumalaika yatwihya Misiri. Mbwenu tuli omu kigo kya Kadeshi, omu nsi yawe omu rubibi. 17Batujubure turabe omu nsi yawe egi. Titurabe mu misiri anga omu mizabibu nangu n'okunywa amaizi aha iziba chei. Turatwarwa Nyaihanda y'Omukama tutagirugiremu kuhika orwo turashohora kuruga omu nsi yawe.” 18Kyonkai Abaedomu bahorora Musa bati, “Ensi yaitu timulikwija kugirabamu, anga tushohore n'embanda tubarashanise.” 19Abaisiraeli babagambira bati, “Turatwarwa Nyaihanda. Katuranywa amaizi ganyu, yaba ichwe anga bitunganwa byaitu, amaizi ago turagashashura. Mutuleke turabemu n'amaguru, taliho kindi.” 20Kyonkai Abaedomu bashubamu bati, “Timulikwija kurabamu.” Aho nikwo Abaedomu abo kwimukya bangi, eihe ly'amani bakatabalira Abaisiraeli. 21Nikwo Abaedomu kwangira Abaisiraeli kuraba omu nsi yabo, bakabaleka bakatwarwa muhanda gundi.
Okufa kwa Aroni
22Eihanga lyona lya Isiraeli liruga Kadeshi ligoba aha Ibanga lya Hori. 23Omukama agambira Musa na Aroni aha Ibanga lya Hori, omu rubibi rw'ensi ya Edomu ati, 24“Aroni naija kufa aha rw'okuba tatahe omu nsi eyo nahaire Baisiraeli, enshonga mukanshengera orwo mutahikize muhango gwange aha maizi ga Meriba. 25Okwate Aroni hamoi n'omutabani Eleazari obatware aha Ibanga lya Hori eiguru. 26Ojure Aroni enyambarwaze ozijweke Eleazari. Aroni naija kufa mara agwe aha Ibanga lya Hori.” 27Musa akora okwo Omukama yabaire amuragiire; batemba aha Ibanga lya Hori, embaga yona ebalebire. 28Musa ajura Aroni enyambarwaze azijweka Eleazari omutabani. Aroni afa, agwa aha ibanga eiguru. Ahanyuma Musa na Eleazari basongoka eibanga. 29Orwo Abaisiraeli bona baboine okwo Aroni yafa, bamuchulira, bamutekera ekibi ebiro 30.
S'ha seleccionat:
Orubara 20: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.