Orubara 19
19
Eijwi ly'Enyana Elikutukura
1Omukama akagambira Musa na Aroni ati, 2“Eiteka elyo ndikuragira ligende liti: Ogambire Abaisiraeli bakuletere enyana bihogo ey'enkiraiziba etaina kamogo, enzira katalizi, etakakomwaga nkomo mu bikya. 3Ogihe Eleazari omukuhani, bagihye omu rusisira, bagibage agyemelereire. 4Aihiseho obwamba bwayo ekyara abushaimulire ekishasi ky'Eihema ly'Omuterano emirundi mushanju. 5Enyana egyo y'enkiraiziba bagyokye agyemelereire. Oruhu rwayo, enyama yayo, obwamba bwayo n'obusha bwayo byona ebyo byokibwe. 6Omukuhani akwate akati k'omwelezi n'aka hisopo n'akendo akalikutukura, abinage omu muliro ogulikwokya enyana egyo y'enkiraiziba. 7Ahanyuma omukuhani ogwo ayogye emyendoye, ashube akwate amaizi ayoge, aho abe nirwo araija kutaha omu rusisira, kyonkai araikara ali muhagare kutobeza eizoba. 8Alikwokya enyana egyo y'enkiraiziba, akwate amaizi ayogye emyendoye, mara ayoge. Kyonkai naikara ali muhagare kutobeza eizoba. 9Omuntu atahagaire abe niwe akumakuma eijwi elyo ly'enyana y'enkiraiziba, aliteke enjai y'orusisira ahalikwera. Libikwe aha rw'Abaisiraeli, libe ly'okusiha omu maizi aha rw'emichonchozo y'okuhasilira omuntu akozire obufu. 10Omukumakumi w'eijwi elyo ly'enyana y'enkiraiziba, afure ebijwarobye kandi aikare ali muhagare kuhika bwaigoro. Ebiro byona eki kiliba kiragiro aha Baisiraeli n'aha mufuruki abafurukiiremu.”
Okukwata aha Mutumbi
11“Omuntu alikora aha mufu aliba muhagare ebiro mushanju. 12Aha kiro kya kashatu n'aha kya mushanju akwate amaizi ayoge, mara aho alyera. Nawe k'aliba atogire aha kiro kya kashatu n'aha kya mushanju, talyera. 13Weena wena alikora aha mufu, mara akabura kwoga, ogwo alihagaza ekiikaro ky'Omukama. Omuntu ogwo bamuchwe omuli Isiraeli. Alikara ali muhagare aha rw'okutashaimulirwa maizi ga kumuhasilira. Obuhagarebwe bulimwikaraho.”
14“K'omuntu aligwa omw'Ihema, eiteka ely'okuhonderwa nily'eli: Kaishemuntu alitaha omw'Ihema elyo, ely'omufu yagwamu, na buli muntu alishangwa alilimu, alihagara ebiro mushanju. 15Na buli kikwato ekilishangwa kitafundikire, kilihagara. 16Aliba ali aheru akakwata aha muntu owo baisire, anga aha mutumbi gwona gwona, anga aha igufa ly'omufu, anga aha nyanga, aliba muhagare ebiro mushanju.”
17“Kugya kuhasilira abahagaire, bakwate eijwi ly'ekitambo ekyokiibwe eky'enyatano y'amafu balite omu nyungu, bongeremu amaizi agatahwa aha mugera. 18Omuntu atahagaire akwate hisopo agiibike omu maizi, agashaimulire Eihema n'ebyamwo byona, n'ababaire bhalimu, n'ayakwete eigufa anga aha muntu owo baisire anga aha mufu wena wena anga aha nyanga. 19Omuntu atahagaire abe niwe ashaimulira omuhagare amaizi aha kiro kya kashatu n'aha kya mushanju, abe nikwo amuhasilira atyo aha kiro kya mushanju. Kihasilirwa ayogye emyendoye, akwate n'amaizi ayoge, aho omw'izoba lya bwaigoro arayera.”
20“Omuntu alihagara akaburwa kwehasilira, ogwo bhalimuchwa omu Baisiraeli aha rw'okuhagaza Eihema litakatifu ly'Omukama. Orwo batamushaimuliire maizi ga kumuhasilira, nasigara ali muhagare. 21Eiteka eli Abaisiraeli baliragirwa kulikwata ebiro byona. Na kishaimura maizi g'okuhasilira aliragirwa kufura ebijwarobye. Kaishe muntu ayakwata amaizi g'okuhasilira nahagara kutobeza eizoba. 22Buli kantu ak'omuhagare alikwataho kalihagara. N'omuntu alikukwata aha kihagaire nahagara kutobeza eizoba.”
S'ha seleccionat:
Orubara 19: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.