Orubara 2
2
Emikaliire y'enganda omu rusisira
1Omukama akagambira Musa na Aroni ati, 2“Abaisiraeli bona basisiire mbali ebendera zabo zili, mara buli omoi abe aina akabonero k'orugandarwe. Hona mbali baraba bali basisiire balebire Eihema ly'Omuterano. 3Ab'okusisira rubaju orw'oburugaizoba, balebire mbali eizoba lishabukira, ni balinya abaina ebendera y'orusisira rw'oruganda rwa Yuda, nk'okwo emitwe yabo eli. Mukuru w'oruganda ni Nashoni eya Aminadabu. 4Eihelye okwo libazirwe lina abantu 74,600. 5Ab'oruganda rwa Yuda batanwe ab'oruganda rwa Isakari. Mukuru wabo ni Netaneli eya Zuari. 6Eihelye okwo libazirwe lina abantu 54,400. 7Ab'oruganda rwa Zabuloni bahondereho. Mukuru wabo ni Eliabu eya Heloni. 8Eihelye okwo libazirwe lina abantu 57,400. 9Orubara rwona rw'abali omu rusisira rw'oruganda rwa Yuda, nk'okwo emitwe yabo eli, bantu 186,400. Omu kwimukya bate nibo baba nibebembera.”
10“Rubaju orwa kasi hagyeyo ebendera y'orusisira rw'oruganda rwa Rubeni okwo emitwe yabo eli. Mukuru w'oruganda ni Elizuri eya Shedeuri. 11Eihelye okwo libazirwe bantu 46,500. 12Abarasisira bataine ab'oruganda rwa Rubeni b'oruganda rwa Simeoni. Omukuru wabo w'oruganda abe Sherumieli eya Zurishadai. 13Eihelye okwo libazirwe bantu 59,300. 14Aho ahonderweho oruganda rwa Gadi. Omukuru w'oruganda abe Eliasafu eya Reweli. 15Eihelye okwo libazirwe bantu 45,650. 16Orubara rwona rw'orusisira rwa Rubeni, okwo emitwe yabo eli, bantu 151,450. Aba nibo baraimukyaga bali ba kabili.”
17“Aho Eihema ly'Omuterano libandure, kandi orusisira rw'Abalevita rwimukye nk'ensisira ezindi. Okwo balikusisira babe nikwo baimukya, buli rusisira omu mwanya gwarwo, nk'okwo ebendera zilikuhonderangana.”
18“Ab'oruganda rwa Efuraimu basisiire rubaju orw'obugwaizoba, nk'okwo emitwe yabo eli. Elishama eya Amihudi abe mukuru wabo w'oruganda. 19Eihelye okwo libazirwe lina abantu 45,500. 20Oruganda rwa Efuraimu ruhonderweho orwa Manase, mukuru w'oruganda ali Gamalieli eya Pedazuri. 21Eihelye okwo libazirwe lina abantu 32,200. 22Ahanyuma oruganda rwa Benjamini ruhondereho, omukuru warwo ali Abidani eya Gideoni. 23Eihelye okwo libazirwe lina abantu 35,400. 24Orubara rwona rw'ab'oruganda rwa Efuraimu abasisiire, okwo emitwe yabo eli, nibagoba abantu 108,100. Baraimukyaga bali ba kashatu.”
25“Rubaju orwa bikara hagyeyo ebendera y'orusisira rw'ab'oruganda rwa Dani nk'okwo emitwe yabo eli. Omukuru w'oruganda abe Ahiezeri eya Amishadai. 26Eihelye okwo libazirwe lina abantu 62,700. 27Abarasisira bataine Ahiezeri b'oruganda rwa Asheri. Omukuru w'oruganda abe Pagieli eya Okarani. 28Eihelye okwo libazirwe lina abantu 41,500. 29Ahanyuma ahondwereho ab'oruganda rwa Nafutali, mukuru w'oruganda ali Ahira eya Enani. 30Eihelye okwo libazirwe lina abantu 53,400. 31Orubara rwona rw'abali omu rusisira rw'oruganda rwa Dani bantu 157,600. Baraimukyaga bali b'enzindo, omu mihonderanganire y'ebendera.”
32Aba nibo Baisiraeli nk'okwo babazirwe kuhonderana n'enganda zabo. Bona ababazirwe omu nsisira nk'okwo emitwe yabo yabaire eli, bakaba bali bantu 603,550. 33Kyonkai Abalevita tibabalirainwe na Baisiraeli bandi, nk'okwo Omukama yahangiire Musa.
34Abaisiraeli nikwo bakozire batyo. Ebyo Omukama yahangiire Musa bakabikwata byona, basisiraga kuhonderana n'ebendera zabo; baimukyaga, buli omoi omu rugandarwe, omw'ihigalye.
S'ha seleccionat:
Orubara 2: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.