Eby'abalevita 19
19
Emiku y'obutakatifu n'amazima
1Omukama agambira Musa ati, 2“Ogambire enteko yona y'Abaisiraeli oti, Mube batakatifu aha rw'enshonga inye Omukama Ruhanga wanyu ndi mutakatifu. 3Buli omoi akunire ishe na nyina, mara mwekomye Sabato zange: N'inye Omukama Ruhanga wanyu. 4Mutaligya aha bishushani anga kuhesha baruhanga; n'inye Omukama Ruhanga wanyu. 5Kamurahongeraga Omukama ekitambo ky'ebihongo by'emilembe, mukihonge omu mihongere eyo murashobora kwikilizibwa. 6Kilibwe kiro kyonene kyonene orwo mwakihonga, anga bukeire. Ekilisigaraho kugoba ekiro kya kashatu kyokibwe. 7Kakiliziza kulibwa aha kiro kya kashatu kyabaire muziro, tikilikundwa. 8Buli omoi alikilya alyeletera entambara, aha rw'okuba yahagaza ekitakatifu ky'Omukama; mara omuntu ogwo bamuchwe omu babo.”
9“Kamurageshaga amagesha g'ensi yanyu, otaligesha musili gwawe kugugobya mu mperero bwoli. Nangu n'eby'oliba osigiremu otalibishombokya. 10Kandi endimiro yawe y'emizabibu otaligigesha okagimaramu birondarondo. N'eziliba ziragaire otalizirondaronda Ozilekere omunaku n'omufuruki: N'inye Omukama Ruhanga wanyu.”
11“Mutaliiba anga kubeiya, handiki kubeiyangana. 12Mutalinahira bishuba mukajuliza ibara lyange, kityo okahagaza eibara lya Ruhanga wanyu: N'inye Omukama.”
13“Otalibonesa mutahi wawe naku anga kumunyaga. Empera y'omupakasi otalirara nayo kuturuka bwankya. 14Otalihera mwigazi wa matwi anga mpume anga kumutega eky'okumusiitaza, ekiliho otine Ruhanga wawe: N'inye Omukama.”
15“Mutalikora bitali bya mazima mw'iramu; otaligilira munaku kigonzi handiki kwegongosheleza omuhango, ekikuru mutahi wawe omuramuze amazima. 16Otaliruga oku nogya oku nosimanganisa abawe emitwe, nangu n'okwosa mutahi wawe: N'inye Omukama.”
17“Otalinoba murumuna wawe aha mutima. Ekiliho mutahi wawe omugambire omwatulire, otaija okakwatwa entambara aha rwa wenene. 18Otalyehoroza anga kugilira bantu ba ihanga lyawe nzigu. Ogonzega mutahi wawe nka iwe wenene: N'inye Omukama.”
19“Mwekomye ebiragiro byange. Otalikunda bitunganwa byawe kwemyangana na bya ruganda rundi. Otalibiba ngeli ibili za mbibo mu ndimiro yawe. Kandi otalijwara mwendo gushonirwe mu ngeli ibili za bitambara.”
20“K'omushaija arabyamaga n'omuzana ensholeke ya mushaija ondi mara atakachungwirwe anga kutaishurwa, bamanyuruze. Batabaita, aha rw'okuba omukazi yaba atali mwegeleere. 21Kyonkai omushaija aletere Omukama ekihongo ky'enyatano y'obufu, akilete aha mulyango gw'Eihema ly'Omuterano. Agire empaya y'entama y'ekihongo ky'enyatano y'entambara. 22Omukuhani amwatililire n'empaya y'entama y'ekihongo ky'enyatano y'entambara omu maisho g'Omukama aha rw'entambara eyo akozire; mara entambara eyo akozire aligigarulirwa.”
23“Kamulitaha omu nsi elinya mukabyara emiti y'engeli zona y'ebyakulya, aho ebiraba byayo mubibone nk'ebiherano, mulibitangwa emyaka eshatu, bitalilibwa#19:23 Bitalilibwa Ebiraba by'emiti eby'emyaka eshatu eya mbere byabonekaga nk'ebihagare.. 24Omu mwaka gwa kanai ebiraba byayo byona birabaga bitakatifu, ekihongo ky'okuhaisiliza Omukama. 25Kyonkai omu mwaka gwa katanu mwakulya ebiraba byayo, nirwo mulirabisa ebishagiireho: N'inye Omukama Ruhanga wanyu.”
26“Mutalilya nyama yona yona einamu bwamba. Mutaliragura anga kuroga. 27Mutalishara memba anga kushara bileju kubilengya. 28Mutalyesharashara mibili yanyu kuchulira abafire anga kwetera ndindi zona zona, n'inye Omukama.”
29“Otalihagaza muhara wawe kumuteza bumalaya, ensi etaija ekatera bumalaya kandi ekaijurwa amafu. 30Mwekomye Sabato zange mara mukunire ahatakatifu hange: N'inye Omukama.”
31“Mutaligya aha batungamiirwe bazimu anga barogi; mutalibagyaho bakabahagaza: N'inye Omukama Ruhanga wanyu.”
32“Kamurabonaga omugurusi mwemelere, mukunire obugurusibwe, mara otinega Ruhanga wawe: N'inye Omukama.”
33“K'omwizi alitura naiwe omu nsi yawe otalimukora kubi. 34Omufuruki alikutura naiwe akushanire omuzarwa wanyu, mara omugonze nk'okwo iwe olikwegonza; aha rw'okuba nainywe mukaba muli bafuruki omu nsi ya Misiri: N'inye Omukama Ruhanga wanyu.”
35“Mutalitaza mw'iramu, omu bipimo eby'oburai anga eby'obusikiizi anga eby'obungi. 36Mukoze ebipimo eby'amazima, amabare g'amazima, efa y'amazima n'elita y'amazima: N'inye Omukama Ruhanga wanyu, ayabaihire omu nsi ya Misiri. 37Mwekomye ebiragiro byange byona, n'emigenzo yange yona, mubihikye: N'inye Omukama.”
S'ha seleccionat:
Eby'abalevita 19: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.