Eby'abalevita 18
18
Amahano
1Omukama agambira Musa ati, 2“Ogambire Abaisiraeli oti, Inye ndi Mukama Ruhanga wanyu. 3Mutaligira nk'okwo bagira omu nsi ya Misiri, mbali mwaturaga, mara mutaligira nk'okwo bagira omu nsi ya Kanaani, mbali ndikubatwara. Mutahondera michwo yabo. 4Mukwate emigenzo yange, muhikye ebiragiro byange; ebyo mube nibyo mukora. Inye ndi Mukama Ruhanga wanyu. 5Aha rw'ekyo mukwate ebiragiro byange n'emigenzo yange, omuntu alikora ebyo alirora: N'inye Mukama.”
6“Omuntu atalibyama na munyabuzarewe amuli haihi. N'inye Mukama. 7Otalibyama na sho; enjuro ya sho niyo ya nyoko; nyoko ni nyoko otalimujura. 8Otalibyama na mukasho; mukasho enjuro ya sho. 9Otalibyama na munyanyoko, owa sho anga owa nyoko, yaba azairwe mwanyu anga heru. 10Otalibyama na mwijukuru wawe owa mutabani wawe, anga muhara wa muhara wawe, aha rw'okuba njuro zabo njuro yawe nyabwawe. 11Otalibyama na munyanyoko owa sho. 12Otalibyama na shwenkazi, aha rw'okuba munyaruganda wa sho. 13Otalibyama na nyokwento, aha rw'okuba munyaruganda w'ahaihi wa nyoko. 14Otalibyama na shwento, nikwo kugir'oti otaligonza mukaziwe; ni mukasho. 15Otalibyama na mukamwana wawe; ni muka mutabani wawe; otalibyama nawe. 16Otalibyama na muka murumuna wawe; muramu wawe njuro ya murumuna wawe. 17Otalibyama na mukazi na muhara, otalibyama na mukamwana anga mwijukuru; banyabuzare abakuli haihi, obwo bufu. 18Otalishwera mukazi wawe kwija kugingijanyia na murumuna. Orwo omurumuna alikurora otalibyama nawe.”
19“Otaligonza mukazi okabyama nawe orwo alikwebona. 20Otalibyama na muka mwatani wawe okamuhagaliraho. 21Otalitambira Moleki mwana wawe wena wena kitambo kya kwokibwa, kityo okahagaza eibara lya Ruhanga wawe: N'inye Mukama. 22Otalibyama na mushaija nka mukazi. Elyo ihano. 23Kandi otalibyama na kigunju okakyehagalizaho, nangu n'omukazi kwegomba ekigunju kubyama nakyo; elyo ihano.”
24“Mutalyehagaliza ahali kyona kyona omuli ebi. Aha rw'okuba amahanga ago gona ago ndikubinga omu maisho ganyu gakehagaliza aha bintu ebi, 25n'ensi yahagara. Kityo nkababonabonyia aha rw'obwayo, n'ensi yatanaka abataka bayo. 26Ekiliho, inywe mwekomye ebiragiro n'emigenzo yange, mara mutalikora ihano omuli aga, yaba mutaka anga mwizi alibafurukiramu. 27Amahano aga gona abanyansi ababebembeire bakagakora, nangu n'ensi yahagara. 28Ensi mutakugihagaza ekabatanaka nk'okwo yatanakire eihanga elyabebembeire. 29Aha rw'okuba wena wena alikora eihano nk'elyo bamuchwe omu babo. 30Aha rw'ekyo mukwate ekyo ndikubaragira, mutaliziza kukora bya buhemu ebyo ababebembeire bakozire, mutaliziza kugakora mukahagara n'inye Omukama Ruhanga wanyu.”
S'ha seleccionat:
Eby'abalevita 18: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.