Eby'abalevita 11
11
Enyamaishwa ezakulibwa
(Obw 14:3-21)
1Omukama agambira Musa na Aroni ati, 2“Mugambire Abaisiraeli muti, Ebi nibyo birora ebyo mwakulya omu bigunju byona ebikatura omu nsi: 3Omu nyamaishwa yona yona etaishukaine ekinono, nikwo kugir'oti eyasizemu ekilenge mara eyekuma, egyo mwakugilya. 4Kyonkai kandi omuli bilinya ebyekuma anga ebitaishukaine ekinono ebyab'ebi mutalibilya: Engamia, aha rw'okuba eyekuma kyonkai tetaishukaine kinono, ahali inywe nezira. 5Kandi embuzi ishwa, aha rw'enshonga eyekuma kyonkai tetaishukaine kinono, ahali inywe muziro. 6N'orumi, aha rw'enshonga rwekuma, kyonkai tirutaishukaine kinono, ahali inywe muziro. 7Empunu kwakwo, aha rw'enshonga etaishukaine ekinono, nikwo kugir'oti ekinono kyayo kyasizemu kyonkai teyekuma, ahali inywe muziro. 8Mutalilya nyama zabyo, handiki kukwata aha mitumbi yabyo; ahali inywe egyo miziro.”
9“Byona ebikali omu maizi mwakubilya. Buli kintu ekikali omu maizi ekina amashanda n'ebikarakamba, halikaba mu nyanja anga mu miga, mwakulya. 10Kyonkai ekitondwa kyona kyona eky'omu nyanja anga omu miga ekitaina mashanda na bikarakamba, ahali inywe miziro. 11Ebyo biliikara bili miziro ahali inywe; mutalilya nyama zabyo, n'emitumbi yabyo mugizire. 12Buli kintu eky'omu maizi ekitaina mashanda na bikarakamba muziro ahali inywe.”
13“Omu binyonyi ebi mubizire, bitalilibwa, miziro: Enkwaju, kagoma, empungu, 14oruhumi, malere kuhonderana n'engeli yayo, 15buli kikona kuhonderana n'engeli yakyo, 16enyonjo, embandansi, enyange, akahumi kuhonderana n'engeli yako, 17ensindizi, orunyabaisiki, ensindizi empango, 18enkukumi, ekimbara, ekitwatwa, ekishemututu, 19entuhwa, ekinyahwahwa kuhonderana n'engeli yakyo, orutaratambi n'oruhuguhugu.”
20“Ebihuka byona eby'amapapa ebikagendesa amaguru ganai, ahali inywe muziro. 21Kyonkai omu bihuka byona eby'amapapa ebikagendesa amaguru ganai, mara ebina emirundi n'ebilenge bikashobora kucho kachoka ebyo mwakubilya. 22Omuli ebi mwakulya: Enzige kuhonderana n'engeli yayo, wankeke kuhonderana n'engeli yayo, ekijere kuhonderana n'engeli yakyo n'ensenene kuhonderana n'engeli yayo. 23Kyonkai ebihuka ebindi byona eby'amapapa ebikagira amaguru ganai ebyo miziro ahali inywe.”
24“Ebi birabahagazaga; wena wena arakwataga omutumbi gwabyo arahagaraga kugoba bwaigoro. 25Kandi wena wena aratwaraga ekintu aha mutumbi gwabyo arafuraga emyendoye, mara nawe arahagaraga kugoba bwaigoro. 26Buli nyamaishwa etaishukaine ekinono kyonkai ekilenge tikyasizemu handiki yonene kwekuma, ahali inywe muziro. Buli muntu alikazikoraho alihagara. 27Enyamaishwa zona ezikagendesa amaguru againa amagembe, ezo ahali inywe miziro. Alikakwata emitumbi yabyo alihagara kugoba bwaigoro. 28Kandi aligishutura afure emyendoye, ashube aikare ahagaire kuturuka bwaigoro; ebyo ahali inywe miziro.”
29“Kandi ebi, ebintu ebyehara aha itaka, miziro ahali inywe: Enfukuzi, ekibebaishwa, ekisibutuki kuhonderana n'engeli yakyo; 30ekikomakome, enshwanshwa, akamina, omunyai n'embararuju. 31Ebyekurura byona ebyab'ebi, ahali inywe miziro. Wena wena Alibikwata bifire ahagare kugoba bwaigoro. 32N'ekintu kyona kyona ekiragubwagaho ekyab'eki kifire kirahagaraga, kyaba kiti anga mwendo anga ruhu anga gunia, na kaishe kikwato ekikakozibwa aha mulimo gwona gwona. Nikiragirwa kutekwa omu maizi, kandi kirahagaraga kuturuka bwaigoro; nirwo kirayeraga. 33Ekyab'eki kakiligwa omu kikwato ky'eibumba kyona kyona, byona ebirabaga bikilimu birahagaraga, aho ekikwato ekyo mukyate. 34Ekyakulya kyona kyona ekikilimu eky'okuliibwa kakyakugobwaho amaizi kirahagaraga; na buli kyakunywa ekili omuli kikwato ekyab'eki kirahagaraga. 35Na buli kintu ekiragubwagaho akaruga aha mutumbi nk'ogwo kilihagara. Kyaba kyoto kya ibumba anga kyotezo bakyatayate. Biliba bihagare mara miziro ahali inywe. 36Kyonkai kandi, enchuro anga eiziba kushangwa binamu amaizi ebyo birayeraga, kyonkai ekirakakoraga aha mitumbi y'ebintu ebyo kirahagaraga. 37Omutumbi nk'ogwo kagulirugwaho ak'okugwa aha mbibo yona yona ekabibwa, kushangwa eli y'okubibwa egyo erayeraga. 38Kyonkai k'embibo ziiliba zibikirwe omu maizi, emoiho ekagwa aha mutumbi nk'ogu embibo egyo eliba muziro ahali inywe.”
39“K'enyamaishwa yona yona eyo mushobora kulya yakufa, ayakukora aha mutumbi gwayo ahagara kugoba bwaigoro. 40Kandi aligilya efire afure emyendoye ashube aikare ahagaire kuturuka bwaigoro. Kwakwo n'omuntu alitwara omutumbi gwayo, afure emyendoye amare aikare ahagaire kuturuka bwaigoro.”
41“Buli kyekwesha aha itaka muziro; kitalilibwa. 42Ekikagenza orubunda kibe kya ngeliki, ekikagenza amaguru gonai kibe kya rugandaki, handiki ekikagira amaguru gangi, byona ebebyekurura aha itaka, mutalibilya; aha rw'enshonga miziro. 43Ebyekurura byona mutalibilya mukahagara; mutalibilya bikabahagaza. 44Aha rw'enshonga inye ndi Mukama Ruhanga wanyu. Aha rw'ekyo mwikare nimwera mara mube batakatifu, kuba inye ndi mutakatifu. Mutalilya kyekurura kyona kyona mukahagara, ekyekwesha ahansi mutalilya. 45Aha rw'okuba inye ndi Mukama ayabaihire Misiri, mbone kuba Ruhanga wanyu. Aha rw'ekyo mube batakatifu aha rw'okuba inye ndi mutakatifu.”
46Eli nilyo iteka elikwete ekigunju n'ekinyonyi na buli kitondwa ekikarora eky'omu maizi na buli kitondwa ekyekurura aha itaka, 47kwahurana ebihagare n'ebyera, n'ekitondwa ekilikurora ekyakulibwa, n'ekitondwa ekilikurora ekitakulibwa.
S'ha seleccionat:
Eby'abalevita 11: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.