Ezekiyeli 40
40
U WUGUBULILWE WE NYUMBA YO MULUNGU YA HANYUMA
(40:1–48:35)
Ezekiyeli yakusolwa no kutegulwa ku Yelusalemi
1Na mwi'zuwa lye likumi, lya mu mwamulizo wo mwaka, mu mwaka we makumi mejete ne'hano, wa mu mapango gono cali cakondya kuhamywa. Na mu mwaka we likumi na yine, ku wulawa lono Yelusalemi yatecelwa. Ale, mwi'zuwa lilyo, nghaviwona vilungo vyo Muwaha Mulungu, yakandeta kuko. 2Na mu wugubulilwe wangu, u Mulungu yasola, yakanhegula ku yisi ya Isilayeli, yakambika ku cizuli ce litunda litali muno muno. Na ha mwande yangu nghawona makaya menji, gono gejelaga nhe kaya yiwaha. 3Yakasola yakasejeleza ho behi. Baho, nghamuwona munhu mono yang'alalaga nha shaba. Munhu yuyo, yali yemile behi no mulango, yebate mu muwoko wakwe cipimo co kupimila ca citambala ca bafuta, hamonga ne nghome yo kujelela, 4Hanyuma yakanonjela yakatya, “Gwe go munhu, alu ta, wulanje kwe meso gako, wuzikamise muno muno mu nhumbula yako zose zono nghukulajila. Hambi zizi nha zo zilecile agwe nghukuleta baha. Hambi nha wowa wo mulimo wako wo kuwalonjela i wanhu wa Isilayeli nghani zose zono koziwona bahano.”
U mulango wa kucilima
5Nane nali neza kulanga, nghawona Nyumba yo Mulungu, nzenjelwe lijinji, lipilime mbavu zose. U munhu yuyo, yakayisola nghome yakwe yo kujelela, ne nghome yiyo, yali yina wutali wa mita yidatu, yakalipima lijinji. Nalyo lijinji likawa lina wutali wo kubita kucanyha, mita yidatu, no wugazi wayo, mita yidatu nhavivilya. 6Hanyuma kanyhi yakawa kubita ku mulango wono wali wulanjile kucilima yakapanda zingazi sunga ha kacanyha, na baho ha kacanyha, yakawupima u mulango zifulemu zayo. 7Na ku mhilimo yayo, kwali na cipuluto, cono cali cina nyumba yidatu zo wulindilizi mbavu zose. Ne zinyumba zizo zose, zali zina wugazi no wutali wa mita yidatu yidatu mbavu zose. Ne cilejeho co wulawa nyumba na nyumba, cali ca wugazi wa mita nyejete na nusu. Na ku mhilimo ye zinyumba zizo, kwali kanyhi na cipuluto cono cali no wugazi wa mita yidatu, naco cali co cipuluto cono cali cibitile sunga ko ku nyumba yono yali vidomile ne Nyumba yo Mulungu. 8Nayo u munhu yuyo, yakabita yakayipima nyumba yiyo. Yakayiwona yina wutali wa mita yine. 9Ne nyumba yiyo yali yili ku ndumilizo yo mulango wono wali wuli behi ne Nyumba yo Mulungu. Na ha mwande hadodo, hali holili yijinji lyono lyali lina wugazi wa mita monga. 10Ne zinyumba zizi zose zo wulindilizi, zono zali nzengwe ku mhelo ayi na ayi ye cipuluto, zose zali ziling'aniye u wuwaha wayo mbavu zose. Ne majinji gayo gose gali gena wukangazi wono wiling'aniye mose.
11Hanyuma yayo u munhu yuyo, yakawupima wugazi we cipuluto co kwinjilila ha mulango, naco cali cina wugazi wa mita mutandatu na nusu. No wutali wo mulango, wali mita yihano. 12Na ha mwande ye zinyumba zo wulindilizi, hali holili yibupa lyo wutali wa centimita makumi mahano, no wukangazi wayo centimita makumi mahano nhavivilya. Ne zinyumba zizo, u wugazi wa mugati, zose zali ziling'aniye, zali zina wugazi wa mita yidatu yidatu kose kose. 13Hanyuma kanyhi yakawupima u wutali we cilejeho co wulawa mwi'jinji lye nyumba ayi, sunga kwi'jinji lye nyumba nzagwe, yono yili ku nhumbi ye cipuluto co kwinjilila ha mulango, naco cilejeho cico, cali cina mita yikumi na nyejete wugazi wayo. 14Yakayipima kanyhi ne nyumba yono yali yili mu nzila, yono yinjiye mwi'kumbo, nayo yikawa yina wugazi wa mita yikumi. 15No wutali we nzila yono yinjiye ku mulango, ku wulawa mwi'jinji lya kunze, lyo mulango we nyumba ye ndumilizo, wali mita makumi mejete ne'hano. 16Hali ho gali madilisha mu majinji ga kunze ge zinyumba zizo, hamonga na mu majinji ga mugati ye zinyumba. Kanyhi hali na mitende mikakatwe mu majinji ga mugati gono gali vidomile ne cipuluto.
I likumbo lya kunze
17Ale, hobaho u munhu yuyo, yakawa kundeta sunga ko kwi'kumbo lya kunze. Na kuko, nghawona kwali ko zili nyumba zinji zono zali zizenjigwe, mhapicizwe mwi'jinji lya kunze. Na ha mwande yazo, hali na hanhu hono hali hasindiywe mabwe hasi, 18gono gali matandazwe hadeha, gapilime likumbo. Ne likumbo lilino lya kunze, lyali lizenjigwe hasika muno si nhe likumbo lya mugati.
19Kanyhi hali ho wuli mulango wunji wono wali wuli ha kacanyha muno, wono wali wo wokwinjilila kwi'kumbo lya mugati. U munhu yuyo, yakawupima u wutali wo wulawa ku mulango awu, sunga ko ku mulango muyagwe, yikawa wutali wa mita makumi mahano.
U mulango wa ku lubavu lwa kusumuka
20Hanyuma u munhu yuyo, yakawupima mulango wo lubavu lwa kusumuka wo kwinjilila ku luwa kwa ya kunze. 21Ne zinyumba zose yidatu yidatu zo wulindilizi, zono zali zizenjigwe mbavu zose ze cipuluto, hamonga ne majinji gayo, sunga ne balaza yo kwambila lubeho, vyali vihwanile vyose na vya ku mulango mulongozi wakulubavu lwa kucilima. No wutali wo mulango, wali mita makumi mejete ne 'hano, no wugazi wayo, mita yikumi na nyejete na nusu. 22Balaza yo kwambila lubeho, hamonga ne madilisha, ne mitende yayo mikakatwe, vyose vyali vihwanile du na vya ku mulango wa ku lubavu lwa kucilima. Langa hali ho zili, ngazi mupunghati, zono zali zibitile ku mulango. Ne balaza yo kwambila lubeho, yali yili ku ndumilizo yayo vidomile ne luwa ye kaya. 23Na lilyo likumbo ne luwa yiyo ya kugati, yali yina mulango wono wudomile ku mulango we kejete, ku lubavu lwa kusumuka, wihwanile no mulango wo lubavu lwa kucilima. Nayo u munhu yuyo, yakawupima wutali wo wulawa ku mulango awu, sunga ko ku mulango muyagwe, yakatuga wutali wa mita makumi mahano.
U mulango wa ku lubavu lwa kutakama
24Hanyuma kanyhi u munhu yuyo yakasola, yakanhegula ku lubavu lwa kutakama, nako kuko, nghawona mulango wunji kanyhi. Nayo yakagapima i majinji gayo ga mugati, hamonga ne balaza yayo yo kwambila lubeho, navyo vyose vyali viling'aniye du nhe viyawo. 25Mwali mogali ne madilisha, mu zinyumba zizi za kono mulango wuwu, gono gehwanile na gono gali gali mu milango yinji yose. No wutali wo mulango wuwo, wali wuficile mita makumi mejete na yihano, no wugazi wayo, mita yikumi na nyejete na nusu. 26Hali ho zili ngazi mupunghati zono zali zibitile ku mulango wuwo, ne balaza yayo yo kwambila lubeho, nayo yali yili ku ndumilizo, vidomile ne luwa. Baho naho, hali ho yili mitende mikakatwe mu majinji ga mugati, gono vyali vidomile ne cipuluto. 27Na baha naho, hali ho wuli mulango wono wubitile ku luwa ya mugati. Nayo munhu yuyo, yakawupima wutali wo wulawa ku mulango mulongozi, sunga ku mulango wuwu we kejete, nawo wukawa wutali wa mita makumi mahano.
Luwa ya mugati, no mulango wo lubavu lwa kutakama
28U munhu yuyo, yakasola kanyhi, yakanghoza ku mulango wo lubavu lwa kutakama, yakanyinjiza mu luwa ya mugati. Yakawupima mulango, nawo i vipimo vyayo, vikawa viling'aniye du ne vipimo vye milango yinji yose ya mwi'jinji lya kunze. 29Ne zinyumba zayo zo wulindilizi, ne balaza yayo yo kwambila lubeho, hamonga ne majinji ga mugati, vyose vyali cipimo cimonga du na vye milango yinji yose. 30Na mu zinyumba za ku mulango wuwu, nazo zali zina ne madilisha gayo nha vivilya. No wutali wayo, wali wuficile mita makumi mejete ne 'hano, no wugazi wayo wali mita yikumi na nyejete na nusu. 31Ne balaza yayo yo kwambila lubeho, yali vidomile ne luwa, ne mitende yono yali mikakatwe mu majinji ga mu cipuluto. Na hali ho zili ngazi munana zono zali zibitile ku mulango wuwu.
Luwa ya mugati, no mulango wa ku lubavu lwa kucilima
32Hanyuma kanyhi, u munhu yuyo, yakasola yakanghoza ku mulango wa ku lubavu lwa kucilima, yakanyinjiza mu luwa ya mugati. Nayo yakawupima mulango, nawo wukawa wiling'aniye vipimo vyayo ne milango yinji yose. 33Nha cinji, i zinyumba zayo zo wulindilizi, ne balaza yayo yo kwambila lubeho, hamonga ne majinji gayo ga mugati, vipimo vyayo vyose, vikawa viling'aniye ne vipimo vya mu milango yinji yose. Hali ho gali madilisha gapilime, sunga na mu balaza yo kwambila lubeho nhavivilya. No wutali wayo wali wuficile mita makumi mejete ne'hano, no wugazi wayo, nawo wali wuficile mita yikumi na nyejete na nusu. 34Nayo balaza yo kwambila lubeho, yali vidomile ne luwa ya mugati. Nayo mitende, yali mikakatwe mu majinji ga mu cipuluto. Na hali ho zili ngazi munana zono zali zibitile ku mulango wuwu.
Luwa ya mugati, no mulango wa ku lubavu lwa kusumuka
35Na hanyuma kanyhi u munhu yuyo yakawa kusola, yakanhegula ku mulango wo lubavu lwa kusumuka. Nayo yakawupima mulango, nawo wukawa viling'aniye cipimo cayo ne milango yinji yose. 36Nako kuko, kwali ko zili zinyumba zo wulindilizi, ne majinji gayo makakatwe, ne balaza yayo yo kwambila lubeho, hamonga ne madilisha gapilime mose. Ne vipimo vyayo vyose, vikawa viling'aniye du ne vipimo vye milango yinji yose. Nha cinji wutali wayo wali wuficile mita makumi mejete ne'hano, no wugazi wayo wali mita yikumi na nyejete na nusu. 37Ne balaza yayo yo kwambila lubeho, yali vidomile ne luwa ya mugati. Nayo mibici ye mitende, yali mikakatwe mu majinji gose ga mu cipuluto. Kanyhi hali hozili ngazi munana zono zali zibitile ku mulango wuwu.
I mazengo ge zinyumba, zono zali nzenje ku mulango wa ku lubavu lwa kusumuka
38Na ku luwa ya kunze, hali ho zili nyumba zinji nzengwe zipapicizwe mwi'jinji ku lubavu lwa kusumuka yo mulango. Ne milango yayo, yadigulilwaga mugati ye balaza yo kwambila lubeho, yono yali vidomile ne luwa. Baho ho wazikwemelaga zi mitugo ze makumbiko ge vilavywa vinyanywe. 39Na ha balaza yo kwambila lubeho, hali ho zili meza yine. Nazo zali mbice nyejete ku lubavu aluno, ne zinyejete nazo, ku lubavu aluno baho ha balaza. Nawo, mu zi meza zizo, mo waziwulajilaga zimitugo ze vilavywa vye makumbiko, hamba ze vilavywa vinyanywe, hamba ze vilavywa so wubi, hamba ze vilavywa vyo mulamu. 40Na kunze ye balaza yiyo, hali ho zili naho meza yine, zono zihwanile zinyawo. Nazo zali mbice ku mulango wo lubavu lwa kusumuka, nyejete ku lubavu aluno lo mulango, ne zinyejete nazo ku lubavu luyagwe lo mulango. 41Nazo hamonga zali meza munana, zono u mulimo wazo, wali wo kuziwulajila zimitugo zono zalavywaga makumbiko. Nazo zali mbice meza yine, kugati ye balaza yo kwambila lubeho, ne zi yine nazo, zali mbice hanze mugati ye luwa. 42Kanyhi hali na meza yine zinji za mabwe maseswe, zono zali mbice mugati ye zinyumba, zono wali wazenjile wazipapicize mwi'jinji lyo mulango wa mugati. Ne zimeza zizo, zali no wutali wa Sentimita makumi mahano, na mucanyha yazo, zali na wugazi wa sentimia makumi mupunghati na yihano kose kose. Ne zimeza zizo, wazitumamilaga mulimo wo kunozelezeza i vilavywa vinyanywe. Ne vitumamilwa vyose vyono wetumamilaga mulimo wo kuwulajila mitugo ye makumbiko, vyose vyawikwaga mucanyha ye zimeza zizo. 43Ne zindobogo zali nhumbice mwi'jinji zipilime zimeza zizo. Ne nyama yose yono walavyaga mu makumbiko, wayijelekaga mu zimeza zizo.
44Hanyuma kanyhi, u munhu yuyo, yakanhegula mu luwa ya mugati. Na mumo mwali na nyumba nyejete, mumo mu luwa, ne milango yayo yali yili mwazi. U mulango we nyumba monga, wali wulanjile ku lubavu lwa kutakama, vidomile no mulango wo lubavu lwe sumuka. Nawo mulango we nyumba nzagwe, wulanjile ku lubavu lwa kusumuka, vidomile no mulango wa ku lubavu lwa kutakama. 45U munhu yuyo yakanonjela nha vyono, i nyumba yo mulango wono wulanjile kutakama, yo nyumba ye wakohani wono wetumaga mu Nyumba yo Mulungu, 46ne nyumba yo mulango wono wulanjile ku lubavu lwa kusumuka, yo nyumba ye wakohani wono wetumaga ha cikumbicilo. Ne wakohani wawa, wose wo wana wa Zadoki, wa mu mhuga ya Lawi, nawo wo wali wakomboligwe du, wamwitumamile u Muwaha Mulungu.
Luwa ya mugati, ne lizengo lye Nyumba yo Mulungu
47Hanyuma u munhu yuyo, yakayipima luwa ya mugati, nayo yikawa no wugazi wa mita makumi mahano mahano, kose kose. Nyumba yo Mulungu yali yili ku lubavu lwa kumwezi, na ha mwande yayo, ho hali ho cili cikumbicilo. 48Hanyuma kanyhi yakasola yakawa kunyinjiza mu balaza ye Nyumba yo Mulungu. Yakawupima mulango, nawo wukawa wina wutali wa mita nyejete na nusu, u wugazi wayo mita mupunghati. Nago majinji go mulango, gali gena wukangazi wa mita monga na nusu mbavu zose. 49Naho baho, hali hozili ngazi zono zibitile ku balaza yo kwambila lubeho, zono zali zina wugazi wa mita yikumi no wukangazi wayo, mita mutandatu. Na ha mulango, hali ho gali masumbili mejete, nago gali mahimbile ha mulango, limonga ku mhelo ayo, ne liyagwe ku mhelo ayino yo mulango.
S'ha seleccionat:
Ezekiyeli 40: LLKWW
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Cigogo Bible © Bible Society of Tanzania, 2002.