Ezekiyeli 39
39
Gogu yakusumwa
1Muwaha Mulungu yakanonjela yakatya nhavi, “Gwe go munhu! Wumulonjelaje Gogu, u mutemi we zinghungugo za Mesheki na Tubali, wumumanyize Gogu nha vyono, ane nili mulugu wakwe. 2Nomupitusa, nimulongoze, nimusole ku wulawa ku lubavu lwa kusumuka kutali, nimutegule sunga ko ku matunda ga Isilayeli. 3Nane nowutoweza wupinde wakwe mu muwoko wakwe wo kucekulu wugwe hasi, ne zisonga zakwe, nozitoweza mu muwoko wakwe wo kulume, nazo zigwe hasi. 4Nayo Gogu, ne lipuga lyakwe lye wasilikale, hamonga na wose wono wali kumutaza, wogwa hasi mu matunda ga Isilayeli wakondya kufwa wose. Ne mivimba yawo, nozilecela zindeje ziyilye, hamonga ne malimu ga mu mbago. 5Nawo wogwa mwi'hala wafwiye. Vyo nghutya ane no Muwaha Mulungu. 6Nolokwasa moto mu yisi ya Magogu, na mu mhwani yose, mono wanhu wekalaga wasina magaziko. Ne wanhu wose nhondo, ho womanya vyono ane yo nene Muwaha Mulungu. 7Nane nolinoza litagwa lyangu lyono lyelile, liwe limanyice mu wanhu wangu Waisilayeli. Hamba si nololileka kanyhi litagwa lyangu likozwe cevu yaye. Na mu nzila yiyo, i wanhu we makungugo, ho wolomanyila vyono ane yo nene Muwaha Mulungu, Ane nili Mulungu mono nelile we Waisilayeli.”
8Muwaha Mulungu yakutya nhavi, “Ne lizuwa lyono nalonga, lyeza behi kuza. 9Ne wanhu wono wekaye mu makaya ga Isilayeli, wololawaniza kunze, wavikonghole vitwalo vyono vilecigwe, ho viwe ngwagu. Wolozisola zingula no wupinde, ne zisonga, ne migoha, hamonga ne zinhumbi, wazipemhele mu moto. Navyo vivyo, vyowakwila kuwa ngwagu zono zokwila myaka mupunghati. 10Nawo wolowa wasina wanjile wa ngwagu, kanyhi wolowa wasina soko yo kutenya ngwagu mwi'hala, hamba kutema mabici mu mbago, hambi nha wowa wakondya kutuga vitwalo vyono vilecigwe, navyo vyo vyolowakwila so ngwagu. Nawo wolowa teka i wanhu wono wawateka wene, wawasolele ne vinhu vyawo.” Vyo yakutya, u Muwaha Mulungu.
I maziko ga Gogu
11U Muwaha Mulungu yakatya, “Kolo zizi zikwijela, nane nolomupela Gogu ciwanza, hono kowa kuzika i wafu kuko mu yisi ya Isilayeli, mwi'lolo lya wono wakukola lya ku lubavu lwa kucilima, ye lilenga lyo Mwino. Nayo Gogu mweneco, hamonga ne Wasilikale wakwe, wolozikwa kuko, ne lilolo lilyo, lyolocemwa, ‘I lilolo lye wasilikale wa Gogu.’ 12Waisilayeli wolowa wena mulimo wo kuzika i mivimba myezi mupunghati, no kuyiwika kanyhi yisi yiwe yelile. 13Ne wanhu wose wa mu yisi, wolowataza Waisilayeli mulimo wuwo wo kuzika mivimba, nawo wolopegwa lilumbo ku soko yo mulimo wuwo, mwi'zuwa lyangu lyo wusume. Vyo nghutya ane no Muwaha Mulungu. 14Na kolo yeza kupuluta i myezi yiyo mupunghati, wolohagulwa wanhu wanji, wayipilime yisi yose, walanje i mivimba yono yowa yikali yisigaye yigwiye hasi, wayizice, ho wayezeze lukulu yisi. 15Na lono wowa kubita ako na ako, mu yisi yose, na hono wawone mafupa ga munhu gali hasi, ale, wawicile baho citanjilo, i wazika wanhu ho wasume kuhawona, no kugasola mafupa gaga, wabite wakagazice mwi'lolo lye wasilikale wa Gogu. 16(Behi na baho, howa na cikaya cono cocemelwa litagwa lilyo lye Lilolo lye wasilikale wa Gogu.) Na mu nzila yiyo, yisi yowa yakondya kwezwa kanyhi.”
17Muwaha Mulungu yakanonjela kanyhi yakatya, “Gwe go munhu, alu zicemaje zindeje zose hamonga ne zinimu zose ku wulawa hanhu hose, zilye likumbiko lyono nghuziwikaniziza. Yolowa ndigwa nyinji mu matunda ga Isilayeli, hono zosuma kulya nyama, zing'we sunga ne sakami. 18Nazo zolya i miwili ye wasilikale, no kung'wa i sakami ye wawaha wa mono'nze. Na wawo wose wowa kuwulagwa nha vyono ziwulagwaga zingholo, hamba zinyana ze zingholo, hamba zimhene, hamba zing'ombe zono zijinile muno. 19Nane lono neza kuwawulaga i wanhu wawa wose nhe makumbiko, nazo zindeje hamonga ne zinimu, zolya nyama zono zijinile, mu nghango nha vyono zosuma zeneco. Kanyhi zoying'wa sakami sunga zigale. 20Na mu meza yangu, nolozitenjela nyama ye zifwalasi na ye wapanda fwalasi, hamonga na ye wasilikale vitung'ati, hamonga ne wanhu wose wo wulugu. Vyo yakutya u Muwaha Mulungu.”
Wuwuye we Waisilayeli kuwulawa ku wuhamywe
21U Muwaha Mulungu yakatya, “Ane nowanoza i wanhu we makungugo, wayiwone nhojo yangu, niwalajile nha vyono nosuma kuwufisiliza wuhile wangu kwe ling'ani. 22Ne Waisilayeli nawo ku wulawa lulo, ho wolomanyila nha vyono ane yo nene Muwaha Mulungu, u Mulungu wawo. 23Sunga ne makungugo gose ho womanya, nha vyono i Waisilayeli wahamywa ku soko yo wubi wono wasutizya'ne. Na vyono nane nghawaleka, ne walugu wawo wakawasuma no kuwawulaga mu wulugu. 24Nane nghawalipiciza nha vyono yiwanojeye ha nghango ye masutya gawo no wubi wawo. Hodu nghawa kuwaleka.”
25U Muwaha Mulungu yakatya, “Ninga aluno hodu, nowawonela lusungu i wana wa Yakobo, i wanhu wa Isilayeli, niwamotye kanyhi. Hambi nha nghuliwonela wivu i litagwa lyangu lyono lyelile. 26Nawo kolo wekala wapolile mu yisi yawo, na hawe hasina kanyhi mono kowogofya, baho nhondo ho wolosemwela lukulu ze cevu cawo, na vyono wali wangaluka. 27Nane lu nolowagomola wanhu wangu ku wulawa mu ma'si gono wekalaga i walugu wawo, ho niwalajile makungugo menji, nha vyono ane nelile. 28Nawo i wanhu wangu ho wolomanya nha vyono ane yo nene Muwaha Mulungu, u Mulungu wawo. Nawo walosuma kuzimanya zizi, ku soko yo nene mono nawehamya wabite ku wuwanda, kuli we makungugo. Kanyhi yo nene mono nghuwakonghola no kuwenjiza kanyhi mu yisi yawo weneco. Na hamba si nomuleka yunji wo wose yaye, yasigale kuko. 29Nane nolowetila zo muhe wangu i wanhu wangu Waisilayeli, kanyhi hamba si nolowalecela lukulu ng'o. Vyo nghutya, ane no Muwaha Mulungu.”
S'ha seleccionat:
Ezekiyeli 39: LLKWW
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Cigogo Bible © Bible Society of Tanzania, 2002.