Zacarias 1
1
Ja Dyosi, mini t'un wax yala mi oj sch'ay ja mulala
1-3Ke'non ja aluman Dyos Zacarias yunin ja Berequias sok ja yij ja Ido. Ja Dyos it jel ja yipi, ja sk'umanon ja b'a yixawil Buli,#1:1-3 yixawil Buli: Ja swaxakil ixaw b'a jab'il yuj ja judio jumasa. Jaxa b'a jtiempo ke'ntiki, snalan ja ixaw b'a octubre sok snalan ja yixawil noviembre. spetsanil ja b'a schab'il jab'il wa'n a'tel ja Dario mandaranum b'a Persia. Yala kab' oj kal yab' jastal it ja israelenio jumasa:
—Ja ke'n jel tajkiyon sok ja ma' ek' paxta a wujilex ja we'nlexi, jaxa ya'n chapan ayon b'a mi oj ka stup ja smule'i, pero ja' ta yuj k'a oj ja k'an'exki perdon ja we'nlexi. Ke'non ja Dyos it jel ja kipi, ja jas wax kala yujni jach' oj k'u'l merana. 4Ja tiempo b'a ek'ta kani, alji yabye ja ma ek' paxta a wujilex mok xa sle mas smule jmok ja ke'n. Jachuk, jaxa we'nlexi, mini t'un a wa'wonex kaso'a; toj spakaxil a wi'ajex mini t'un a k'u'anonexa. Ke'non jas Dyos yujile', wax kala wabyex ja smeranili yujni jach' waj ja.
5—Ja aluman Dyos jumasa sb'a najate ma'tik wa'ne a'tel jmoki, ch'akta chamuke, jach'ni ja ma ek' paxta awujilexi chamyeta ni'a. 6Ja ye'nle'i, ka'ni stup ja smule jastal a'ji sna'e yuj ja kaluman jumasa'a. Jaxa ye'nle'i, kumxiye cho sk'u'ane'ni ja kab'ala, porke sna'awe yujni ke'n ka' stup'e yuj ja lom jel sle'a ja smule'i—.
Ja kawu jumasa tuktukil yelawi
7-8Ja Dyosi, cho sk'umanon pilan majke b'a jwayich b'a yixawil Sebat#1:7-8 yixawil Sebat: Ja sjuluchil ixaw b'a jab'il yuj ja judio jumasa, snalan ja ixaw b'a enero sok snalan ja yixawil febrero. b'a yajtab' jun tajb'e sok chane, cho ja ni ja b'a schab'il jab'il wan sk'ulajel mandar ja mandaranum Dario. B'a yoj a'kwal, ja b'a jwayich jawi, kila jun winik k'e'el jun chakal kawu. Ja winik jawi, ti tek'an b'a snalan ja loman yaman jumasa. B'a loman yaman jumasa jawi, b'ut'el toj k'i'ix k'ul sb'i'il mirto. B'a spatik ja ye'n cho ay otro winike mas ja skawu b'a k'e'ele'i, ay b'a chak, ay b'a k'ik' muk muk, sok ay b'a sak. 9Ja b'a jwayichi, jun anjel wa'n lo'il jmok, ja'yuj, ti job' yi'a:
—¿Oj ma b'ob' a wal kab' mach'tik junuk ja winike jumasa jawi?
Jaxa anjeli, ti yala kab'a:
—Ja juts'in oj ni kala wab'a.
10Jaxa yajni mito jas wax yala kab'i, ja winik it ti tek'an b'a yoj mirto jumasa, ti yala kab'a:
—Ye'n sjekunej ja Dyosi ja winike jumasa it kajane kawu b'a oj sb'ejtese spetsanil ja lu'um iti.
11Jaxa anjeli, tixa ni kan b'a yoj mirto jumasa'a. Ja ora jawi, ja winik jumasa ma'tik kajane kawu, ti och schole'a:
—Ch'akta jb'ej tatikon spetsanil ja lu'umi, ja jas kilatikoni, jel gusto sok jel laman ay.
12Jaxa anjeli, ti sjob'o'a:
—Dyos jel ni wa wipa, ay xa ox tajb'e sok lajune (70) jab'il tajkela sok ja swinkil ja Jerusalen sok ja swinkil ja chonab' jumasa b'a Juda. ¿Jasto ora mi oj ja talna sya'ujlale b'a?
13Jaxa Dyosi, ti yala'a, ja sk'umali jel k'un sok jel tsamal. Tsa'an ja anjeli 14ti yala kab' oj kal b'a sparte ye'n ja Dyos ja lo'il iti:
—Ja ke'n jel yaj wax kab' ja swinkil ja Jerusaleni,
sok jel yaj wax kab' ja jnaji.
15A'nima ek' jun tiempo
tajkel ajyiyon sok ja chonab'ili,
jel wala tajkiyon ja wax kila ja niwak chonab' jumasa
jel wa stoyo sb'aje'i,
sok ja ya'we makunuk ja yilawe tajkeloni
b'a ya'we yi wokol ja swinkil ja Jerusaleni.
16—Kechan wax k'ana oj ja na'ex
oj ni k'e jtojb'es ja jchonab'ila,
cho jach'ni ja jnaji.
—Oj je' a wi'ex janek' wax k'anawex—
Ke'n ja Dyos it jel ja kipi,
ja jas wax kala yujni jach' oj k'u'l merana—.
17Cho yalto kab' ja anjel oj kal pilan majke b'a sparte Dyos ja otro lo'il iti:
—Oj cho ka stul sb'aj pilan majke
spetsanil ja jchonab'il jumasa;
oj je' a wi'ex ja syajal jk'ujol yuj ja jnaji,
sok ja Jerusaleni cho ye'nani
ja jchonab'il tsa'ub'ala—.
Ja xulub' jumasa sok ma'tik wax ya'telta tak'in jumasa
18-21Mas tsa'an ti jk'ela cha'ana, ti kila chane xulub' jumasa. Ti'ni ay b'a jts'e'el ja anjeli, ti job'oyi'a:
—Jaxa xulub' jumasa iti, ¿jasun wa sk'ana yal b'a?
Jaxa anjeli, ti och schol kab'a:
—Ja xulub' jumasa iti, ja wa sk'ana yal yuj ja chonab' jumasa sok ja yipi, ch'ak ya spil sb'aj ja kristyano jumasa b'a Juda, b'a Israel sok b'a Jerusalen.
Jaxa Dyosi, tsa'an ti sje'aki chanwane k'ulu machit. Jaxa ke'n ti job'oyi'a:
—¿Jasunk'a oj sk'ul ja k'u'lu machit jumasa iti?
Jaxa ye'n, ti yala kab'a:
—Ja oj ya' och sxiwele ja swinkil ja chonab' jumasa jawi. Oj ch'akuk ja yipe yuj ja lom ja jas ch'ak sk'u'luke yi ja swinkil ja Juda.
S'ha seleccionat:
Zacarias 1: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021