Marcos 4
4
Ja senya lo'il sb'a inati
(Mt 13:1-9; Lc 8:4-8)
1Pilan k'ak'u ja Jesusi, ti cho wa'n sje'jel ja yab'al ja Dyos b'a sti' paman ja' b'a chonab' Galilea. Yuj ja jel jitsan stsomo sb'aj ja kristyano jumasa b'a oj smaklaye'i, ja'yuj ti k'e b'a jun barco ja Jesusi, ti och kulan tiw och sje' ja yab'al ja Dyosi. Jaxa kristyano jumasa, ti ch'ak kanuke tek'an b'a sti' ja'.
2Ja Jesusi, jel jitsan ja jas sje'a sok senya lo'ili. Ti yala ja senya lo'il iti:
3—Maklayik lek ja iti: Jun winik waj sts'un trigo b'a yalaji. 4Yajni wa'nxa sts'unjel ja yalaji, ay jujuntik sat inat ti ko' b'a yoj b'ej. Tsa'an jak ja yal chan jumasa, ti stuluwe ela.
5—Ay tuk inat ti ko' b'a yoj ton b'a jel t'usan ja lu'umi. Yuj ja mi pimuk ja lu'umi, ja'yuj jel juts'in eljana inati. 6Jaxa yal inat jumasa jawi mi alb'i. Yajni k'ixnaji lek ja k'ak'u ch'ak takjuk yuj ja mey lek ja yechi.
7—Cho ay inat ti ko b'a yoj k'i'ix, yajni k'i' ja k'i'ix jumasa, skomowe sk'i'el ja inati, mi ya'we k'i'uk. Ja'yuj mi satini ja inat jumasa jawi.
8—Jaxa tuk inati, ti ko' b'a lekil lu'um, jel tsamal k'i'i, sok jel tsamal satini. Ay b'a ya'a jun tajb'e sok lajune (30), ay b'a ya'a ox tajb'e sok lajune (70), sok ay b'a ya'a jo' tajb'e (100).
9Ti'xta'a ti yala ja Jesusi: —Ta yuj k'a jotan meran wa chikinexi, abyik lek sb'ej ja jas oj kali—.
¿Jas lom sok senya lo'il wa sje'a ja Jesusi?
(Mt 13:10-17; Lc 8:9-10)
10Tsa'an yajni ch'akta wajuk ja kristyano jumasa, kechanxta chab' oxe ti kan sok ja Jesusi, jaxa lajchawe (12) sneb'uman jumasa, ti sjob'owe yi'a, ja sb'ej ja lo'il it yala yuj ja a'tijum b'a alaji. 11Ti alji yabye yuj ja Jesusi:
—Ja we'nlexi, kaloj a wabyex ja jas mixa na'awex b'a yab'al ja Dyosi, jaxa tuk jumasa kechani wax b'ob' je'xuk yi'e sok senya lo'ila. 12Ja'yuj, a'nima wa'nuke k'elwanel, lajan sok mix ilwaniye, cho a'nima wax yabye k'inal, minix yabye sb'eja, kechani ta sutxita meran ja sk'ujole b'a mixa oj sle' ja smule'i, a cho sk'an'e yi ja Dyos b'a mi oj a'ji stup ja smule'i—.
Ja Jesusi, yala ja sb'ej ja lo'il sb'a inat jumasa
(Mt 13:18-23; Lc 8:11-15)
13Ti alji yabye yuj ja Jesusi:
—Ta yuj k'a mixa wabyex sb'ej ja lo'il sb'a inat jumasa, ¿Jastal oj a wabyex sb'ej ja tuk senya lo'il jumasa ta jachuki?
14—Ja winik a'tijum b'a alaji, ja lajan sok ja ma' wax yala ek' ja yab'al ja Dyosi. 15Ja inat jumasa ko' b'a yoj b'eji, ja lajan sok ja ma' wa smakla ja yab'al ja Dyosi, tsa'an ti wax jak ja tan pukuji, wax jak a'ji ch'ay sk'ujole spetsanil ja jas sneb'aweta'i.
16—Ja inat it ko' b'a yoj toni, ja lajan sok ja ma' wa smakla ja yab'al ja Dyosi, ti'xta sk'u'ane yuj ja jel tsamal yabye'i. 17Yuj ja mi yabye lek sb'eji, ja stsamalili jel t'usan alb'i. B'a' ja wil'a ti'xta jel jak ja ab'al k'umal sb'aje'i, jel och ixtalajuke yuj ja wa sk'u'ane ja Dyosi, ti ch'ay sk'ujole ja jas sneb'aweta'i.
18—Cho ay tuk ja wa slajawe ja inat it ko' b'a yoj k'i'ixi. Wax yabye ja yab'al ja Dyosi, 19B'a'ya mix ya'a sb'aje b'a oj stukb'es juke yuj ja yab'al ja Dyosi. Kechan ja wa'n ek'el sk'ujole ja jastik mey yujile'i, cho jel wax ok' sk'ujole jastal oj sta' ja stak'ine'i, b'a jach' oj b'ob' sk'u'luk ja jas wa sk'anawe'i.
20—Ja inat it ti ko' b'a lekil lu'umi, ja lajan sok ja ma' wa smakla ja yab'al ja Dyos sok wa sk'u'ani. Ja kristyano jumasa jastal jawi, wa stukb'es ja smodo'e'i, lek ja jas wa sk'u'lane'i. Ja' smoj ja inat it ay b'a ya'a jun tajb'e sok lajune (30) ja sati, ay b'a ya'a ox (60) tajb'e, asta ay b'a ya'a jo' tajb'e (100).
Ja senya jastal wax ijlab'ani
(Lc 8:16-18)
21Tsa'an ti alji yabye yuj ja Jesusi:
—¿Yajni oj ka'tik ajluk jun kandil yuj a ma ti oj muktik b'a yib' kajon ma b'a jun yib' ch'at? —miyuk— Ja yajni ka'tikta ajluk ja kandili, ti oj ka'tik kajan b'a jun cha'an, b'a jach' oj ijlab'anuk lek. 22Spetsanil ja jas nak'ul wa'non yaljeli, oj ch'ak chiknajuk sok spetsanil ja jas nak'an musan ayi, ojni ch'ak na'xuka.
23—Ja ma' meran jaman ja schikini, —a smakla ja iti, xchi ja Jesusi.
24Ti cho alji yabye yuj ja Jesusi:
—Maklayik lek ja jas oj kal awabyexi— K'elawilex, ja janek' oj a sb'is'ex ja we'nlex oj ja wa'wex yi ja wa mojexi, sok ja sb'isol jawi, jach' oj b'isjuk a wi'ex ja we'nlexi, sok ojto a'juk a wi'ex t'usan mas. 25Ja ma' ayni yi'oj t'usani, oj cho a'juk yi mas; jaxa ma' mini jas yi'oji, ja janek' t'usan yi'oji, oj ch'ak japjuk yi—.
Ja lo'il sb'a inat it wax k'i'i
26Ja Jesusi, cho yala ja senya lo'il iti:
—Ja yab'al ja Dyosi, ja lajan sok jastal sk'u'lan jun winik sts'unu jun inat b'a lu'umi. 27Ja winik jawi, a'nima wa'n wayel ma sak'an ay, a'kwal ma sat k'ak'u; jaxa inat jawi, yujni oj sak'wuka, sok ojni k'i'uka, jaxa winik ma' sts'unu mi yuj wa sna'a ja sb'ej. 28Ja lu'umi, b'ajtan wax ya k'i'uk ja ste'ili ti wax el ja ts'utuji, tsa'an wax ajyi ja ajani. 29Yajni takinxa ja ixim jawi, ja winik ma' sts'unu yujni ojxa sjach'a—.
Ja inat sb'a mostasa
(Mt 13:31-32; Lc 13:18-19)
30Ti cho yala ja Jesusi:
—¿Jasun oj slaj ja smandar ja Dyosi? ¿Jasunk'a wa slaja b'a? 31Ja oj slaj ja yal yintil mostasa, ja it yi'aj ja winik waj sts'un b'a yalaji. Ja inat jawi, kechan ye'n jel ch'in wax ilxi b'a lu'um iti, 32jaxa yajni wax k'i'i ye'n mas niwan wax ki' ja b'a yoj alaji ma' b'a yoj maka. —Ja sk'ab' jumasa niwak lek wax waji, jaxa yal chan jumasa wax b'ob' sk'u'l soje b'a sk'ab'i—.
Ja senya lo'il ya makunuk ja Jesusi
(Mt 13:34-35)
33Ja Jesusi, sje'a ja yab'al ja Dyosi, sok jitsan senya lo'il, ja'ni wa sk'ela jastal oj b'ob' yabye sb'ej ja kristyano jumasa. 34Ja yajni wa'n sje'jel ja yab'al ja Dyosi, sok toj senya lo'il wax yala, jaxa yajni stuch'il tey sok ja sneb'uman jumasa, spetsanil wax ch'ak yal ja sb'ej ja senya lo'il jumasa jawi.
Ja niwan wokoli
(Mt 8:23-27; Lc 8:22-25)
35Ja mismo k'ak'u jawi, yajni och ja a'kwali, ja Jesusi, ti yal yab' ja sneb'uman jumasa: —Wajtikik, la ek' jk'utstikik ja paman ja'i, ti' la wajtikik b'a sk'axil—.
36Ja'yuj ti ch'ak ya'we kan ja kristyano jumasa, ek' sk'uts'e ja paman ja' sok jun barco. Ay ma' waj chab' oxe b'a pilan barco.
37Ti'xta'a jak jun wokol, ja ik'i tsats lek wa spak'tsun sb'aj ja b'a ja'i, jaxa ja'i och man yoj barco, jaxa barco och b'ut' ya'lel.
38Jaxa Jesusi, ti wa'n wayel b'a spatik ja b'a'ye'i, ti k'achan sb'aj jun sen olomal. Ti yujkesji yuj ja sneb'uman jumasa, ti och awanuke tsatsa:
—Je'uman, ¿Lajan sok mixa wila ja wa'ntikxa ib'el ja'axel tak?
39Jaxa Jesusi, ti k'e'a, skomo ja ik' sok ja jastal wa'n spuk'tsijel sb'aj ja ja' b'a paman ja'i. Jaxa tsatsal ik'i, wego ni lamxi'a, jachuk laman kan spetsanil.
40Ja'yuj ja Jesusi, ti yal yab' ja sneb'uman jumasa:
—¿Jasyuj ja lom xiwelxta ayex b'a? ¿Yuj ma mito waxa k'u'anonex meran b'a?
41Jaxa ye'nle'i, jel cham k'ujol aye, ti wa sjob'tala'an sb'aje'a: —¿Ma winikil ja it ja wax b'ob' skom ja ik' sok ja ja' b'a paman ja'i, wanix k'u'aji ja yab'al taka?—.
S'ha seleccionat:
Marcos 4: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021